Hatutan.com (23 Fevereiru 2022), Viqueque-Organizasaun La’ós Governu nian (ONG-sigla portugés), liuhosi Adventist Development Relief Agency (ADRA) apoiu Servisu Saúde Munisípiu Viqueque, hodi harii ona fatin lixu ida iha internamentu munisipál, ho objetivu atu bele “sunu” no destroi material sira médiku nian ne’ebé deskonfia hada’et virus COVID-19.

Notísia iha Relasaun: Ortikultura “Marcha da Paz” Lacluta Simu Fasilidade hosi CARE International

ADRA Internationl apoiu Servisu Saúde Munisípiu Viqueque harii fatin lixu hodi sunu materiál mediku nian ne’ebé uzadu. Foto/Hatutan.com

Manager projetu iha ADRA International iha Timor-Leste, Elizeu Silva hateten, fatin lixu ne’e sira instala besik iha internamentu Munisípiu Viqueque nian, tanba durante ne’e, haree katak, kuaze material sira médiku nian ne’ebé utilizadu, soe lekar de’it, tanba seidauk iha fatin ruma mak espesífiku.

“Ita haree katak fo’er sira mai hosi médiku ninian sira-ne’e, naklekar arbiru de’it, halibur fatin ladún di’ak. Entaun, ita koopera hamutuk ho Servisu Saúde Munisípiu Viqueque, hodi konstrui fatin lixu ida iha fatin internamentu munisípiu nian, atu sira bele utiliza hodi sunu fo’er sira ne’ebé mak liu-liu hanesan máskara, luvas, no mós hena sira ne’ebé staff saúde sira uza hodi proteje sira-nia aan, hanesan Personal Protection Equipment, sira ne’e ita halibur hamutuk, hodi sunu iha fatin ne’ebé mak ita fornese bá,” Manager projetu iha ADRA International iha Timor-Leste, Elizeu Silva hateten ba jornalista sira iha SSMV, Suku Caraubalo, Viqueque Vila, Kuarta (23/02/2022).

Jestór programa ADRA International nian iha Viqueque ne’e, esplika, razaun fasilidade sira médiku nian ne’ebé utilizadór ne’e, tenke rai-ketak, hodi destruisaun, tanba iha virus ne’ebé fó perigu ba ema nia vida.

Bainhira fasilidade sira ne’e mak la halo destruisaun sedu, iha posibilidade boot atu hamosu kontaminasaun virus ba ema seluk, tanba fasilidade médiku hirak ne’e, durante uza hodi fó asisténsia saúde ba pasiente sira covid-19 nian.

“Ho razaun ida ne’e mak tenke tuir servisu saúde públiku ninian, katak ita presiza haketak fo’er hirak ne’e, hosi fo’er sira selu-seluk,” Elizeu Silva esplika tán.

Prosesu atu destrui fasilidade médiku sira ne’e, ADRA International iha TL servisu hamutuk ho Servisu Água no Saneamentu (SAS) Viqueque.

Halo Kampaña Vasinasaun Kontra COVID-19

Prepara bee-moos hodi fasilita komunidade fase-liman nudár parte ida luta ba prevensaun Covid-19. Foto/Hatutan.com

Hahú inísiu bainhira deteta kazu pozitivu sira COVID-19 nian iha TL, ADRA International liuhosi nia pesoál responsavel programa nian iha Viqueque, servisu hamutuk kedan ona ho servisu saúde munisípiu nian, hodi halo atividade kampaña vasinasaun Covid-19, liuhosi disemina informasaun ba komunidade kona-solusaun sira ba prevensaun Covid-19 nian.

Iha atividade sira ba diseminasaun informasaun ne’e, parte ADRA International, distribui mós fasilidade bázika sira ba prevensaun Covid-19 nian, mak hanesan máskara, luvas, broxura, no konvense komunidade sira atu partisipa ho másimu iha kampaña nasionál vasinasaun Covid-19, no liu-liu atu bele oferese aan ba simu vasina.

Alende ne’e, halo mós instalasaun ba tanke bee nian iha Postu Saúde haat iha Munisípiu Viqueque, atu fasilita no eduka sidadaun sira bele fase-liman bebeik, hodi evita propagasaun virus Covid-19.  

 Maske populasaun Viqueque hatudu partisipasaun ne’ebé di’ak tebes iha vasinasaun, maibé parte ADRA International ho ekipa sira saúde munisípiu nian, konvense inan-aman sira hotu ba vasina.

Iha programa prevensaun ba Covid-19 ne’e, ADRA International nia alvu ba komunidade iha suku hamutuk 18, aldeia 115, no totál benefisiáriu tuir uma-kain 5750 iha Munisípiu Viqueque.

Fatin hirak ne’ebé ADRA International fornese ona tanke bee fase-liman nian mak hanesan, Servisu Saúde Munisipiu Viqueque, fatin ba izolamentu, internamentu saúde, iha kuarentena nomós, ida ida tán, instala iha Ospitál antigun, ne’ebé sai hanesan fatin ba enkontru jerál entre ekipa servisu saúde hotu-hotu iha Viqueque.

Projetu ida ne’e, finansia hosi Governu Australia, liuhosi Australian Humanitarian Partnership (AHP), ho konsórius ONG internasionál sira mak hanesan, CARE International, Caritas Australia (CAN-DO), Oxfam, Plan International no World Vision, maibé projetu sira ne’ebé daudaun implementa hela hosi ADRA International iha munisípiu sira, hetan apoiu orsamentu hosi Caritas Australia (CAN-DO) iha TL.

Diretór Servisu Saúde Munisipiu Viqueque (SSMV), Francisco de Carvalho rekoñese, durante ne’e, sempre servisu hamutuk ho ekipa sira ADRA International nian mak destakadu iha munisípiu, iha ámbitu ba prevensaun no kombate virus Covid-19.

Kona-bá fornesimentu tanke bee nian ba postu saúde sira, responsabilidade hosi parte Servisu Saúde Munisípiu Viqueque nian maka, enxe ka apoiu bee. Bainhira bee hahú menus, SSMV husu tulun ba karreta Bombeiru hodi transporta bee, nune’e bele enxe fila-fali ba tanke sira bee nian.

“Ami agradese tanba ita-boot sira (CARE International ho ADRA) bele mai haree ho matan, situasaun iha terrenu ne’e oinsá kooperasaun entre ami ho parseiru sira ninian, la’ós ADRA de’it, maibé iha parseiru sira selu-seluk mós iha ne’e, hanesan ajénsia sira seluk ne’ebé mak iha ne’e, halo parseria ho servisu súde munisipiu Viqueque, ami kooperasaun oinsá, tanba ita-boot sira bele mai haree diretamente realidade saida mak akontese iha terrenu. Ida ne’e mak importante,” diretór SSM Viqueque, Francisco de Carvalho afirma.

Liga fali bá material sira médiku nian ne’ebé mak bainhira uzadu ona, no merese ba halo destruisaun mak hanesan, gaom ka material ida ne’ebé mak utiliza lori atende pasiente Covid-19, luvas, no espesífiku liu maka botir sira ba fatin ai-moruk nian. Maibé, presija utiliza material insineradór mak bele sunu sasán médiku sira ne’e.

Reprezentante komunidade hosi Suku Wagia, Postu Administrativu Ossú, Francisco dos Santos Marques hato’o katak, hafoin rona tiha esplikasaun sira kona-bá moras Covid-19, sira konsiente hodi koopera ho pesoál saúde sira, inklui staff ADRA International, tanba hakbesik ba sira nia leet, hodi distribui ekipamentu sira ba prevensaun moras ne’e iha aldeia laran.

Jornalista: Rogério Cárceres