Hatutan.com, (23 Dezembru 2021), Dili—Serbisu Kuarentena no Bio-Seguransa seidauk simu relatóriu kona-bá sidadaun importa manu madena tama illegal hosi fronteira.

Iha Kuarta 15 fulan Dezembru 2021, Ministru Agrikultura no Peska (MAP), Pedro dos Reis, hala’o lansamentu ofisiál ba atividade importasaun manu-futu hosi Indonézia iha Pontu Entrada Fronteira Terrestre, Batugade, Bobonaro. Foto/Hatutan.com.

Diretór Serbisu Kuarentena no Bio-Seguransa, Venâncio Oliveira ba hatutan.com, via telefónika informa, nia parte seidauk simu relatóriu ruma hosi nia ekipa ne’ebé destakadu iha liña fronteira, kona-bá manu madena ne’ebé ema hatama ilegál.

Notisia iha Relasaun:Ministru Pedro Reis Lansa Importasaun Manu-Futu

“Ha’u seidauk simu relatóriu, manu madena tama ilegál mai TL. Fahi, iha. Maibé ida ne’e mós ha’u seidauk klaru, no ha’u presija atu konfirma lai ho kolega sira ne’ebé serbisu iha ne’ebá, depois mak ha’u fó informasaun klaru ba ita,” Venâncio Oliveira hateten ba Hatutan.com,  Kuarta (22/12/21).

Advertisement

Nia esplika, tuir prosedimentu katak, aninál saida de’it mak ema hatama ho illegal, ikus-mai hetan prende hosi autoridade sira iha lutu fronteira, normalmente Serbisu Kuarentena sempre koordena ho UPF, hafoin halo destruisaun ka sunu.

Tuir prosedimentu anteriór nian, bainhira PNTL, liuhosi Unidade Patrullamentu Fronteira (UPF) kaer, diretamente prosesu ba Tribunál, nune’e parte Serbisu Kuarentena labele halo buat ida, tanba ne’e sai hanesan evidénsia ba Tribunál no Ministériu Públiku (MP).

“Maibé, como la liu hosi prosesu ba Ministériu Públiku nian, entaun sira halo guia de entrega mai Serbisu Kuarentene  atu halo tuir medida ne’ebé iha,” Diretór ne’e esplika.

Kona-bá ne’e, Komandante UPF, Superintendente Polísia, Euclides da Costa Belo via telefónika hateten, antes ne’e konsege halo apreensaun ba manu atu hanesan ho manu Madena, ne’ebé deskonfia hatama ilegál hosi komunidade iha área fronteira Batugade.

Euclides Belo hatutan, la’ós prende de’it manu ne’ebé atu hanesan ho madena, maibé iha mós animál sira seluk hanesan fahi ne’ebé komunidade halo transaksaun ilegál la liu hosi portaun boot no membru UPF prende hotu objetu sira.

Advertisement

“Altura ne’ebá, manu ne’ebé mak ami kaer, la to’o 10. Ami prende mós fahi no entrega diretamente ba Komandu munisípiu,” Euclides Belo, dehan.

Manu ilegál ne’ebé UPF prende iha área fronteira, entrega kedan ba komandu PNTL munisipiu Bobonaro, liuhosi eskuadra ne’ebé besik, liu-liu iha Postu Seguransa Batugade.

“Bainhira, laiha ona na’in ka ema ruma mai reklama, UPF hamutuk ho Komandu eskuadra entrega ba Serbisu Kurentena depois halo destruisaun ka sunu. Tanba, serbisu kuarentena, sira prepara hela fatin ida, atu bele sunu balada sira ne’ebé tama ilegalmente,” nia subliña.

Euclides mós rekoñese katak, foin lalais Ministru Agrikultura no Peska (MAP), hala’o inaugurasaun ka lansa manu-futu iha liña fronteita, tanba ne’e, UPF hanesan ajente seguransa Estadu nian ne’ebé garante lei no órden, kontinua asegura nafatin fronteira hosi movimentu ilegál.

“Importante maka manu sira ne’ebé mak tama ne’e tuir padraun ne’ebé mak hakerek iha diploma. Ami espera katak ho legalizasaun ne’ebé iha, bele iha importasaun manu no na’in ne’ebé atu simu ne’e, ami sei koordena atu buat hotu la’o tuir prosedimentu legál tuir lei ne’ebé mak iha,” nia hateten.

Advertisement

Iha Kuarta 15 fulan Dezembru 2021, Ministru Agrikultura no Peska (MAP), Pedro dos Reis, hala’o lansamentu ofisiál ba atividade importasaun manu-futu hosi Indonézia iha Pontu Entrada Fronteira Terrestre, Batugade, Bobonaro.

Lansamentu importasaun manu-futu dahuluk hosi Indonézia ne’e ho manu hamutuk 13  no serimónia ne’e partisipa mós hosi dirijente sira ne’ebé hala’o knaar  iha Fronteira Terrestre Batugade, kompostu hosi Diretór  Nasionál Serbisu Kuarentena no Bio-Seguransa, Venâncio  de Oliveira, reprezentante Unidade Patrullamentu Fronteira (UPF), Alfándega, reprezentante Servisu Migrasaun Timor-Leste iha Batugade inklui  autoridade kompetente sira hosi Indonézia ne’ebé hala’o knar iha Motain nian, liuliu reprezentante Servisu Kuarentena Indonézia nian iha Motain.

Iha abertura lansamentu importasaun manu-futu ne’e, Diretór  Nasional Kuarentena no Bio-Seguransa, Venâncio  de Oliveira, importasaun ne’e iha baze legal tanba dokumentu komprovativu sira prienxe rekizitu no hetan sertifikasaun.

Ministru Pedro dos Reis iha nia diskursu, lori Governu nia naran agradese ba Diretór Nasionál Kuarentena no Bio-Seguransa tanba kumpre orientasaun  hodi responde preokupasaun balun, liuliu  oinsá kria dalan legaliza importasaun manu-futu ho nia rekizitu no padraun legál sira mak vigora.

Jornalista: Rogério Pereira Cárceres

Advertisement