Hatutan.com, (26 Dezembru 2021), Díli—Autoridade Seguransa Indonézia deporta fali suspeitu mane ida ba kazu violasaun seksuál hasoru nia oan ho naran inisiál CeD, idade 11 no baku mate tán vítima, iha Aldeia Moris Foun, Suku Comoro.

Autoridade Seguransa Indonézia deporta fali suspeitu mane ida ba kazu violasaun seksuál hasoru nia oan ho naran inisiál CeD, mai TL, Sábadu (25/12/21). Foto/Média MI.

Suspeitu ne’e hakat fronteira terrestre liu dalan ilegál no hetan kapturasaun hosi Polísia Repúblika Indonézia (PolRes) Kupang Timur no entrega hikas mai Migrasaun Timor-Leste (TL) iha Batugade.

Hafoin Suspeitu ne’e halai sai hosi Timor-Leste ba Indonézia, Komandu Jerál PNTL liu hosi Serbisu Informasaun Polísia(SIP) halo kedan koordenasaun intensivu ho Serbisu Informasaun Polísia Indonézia-NTT nian no menus husi oras 72 suspeitu ne’e hetan kapturasaun iha rezidénsia família área Kupang Timur ne’ebé partense ba Polres Baubau.

Diretór Jerál Serbisu Migrasaun, Superintendente Asistente Polísia Luis Barreto, hateten desizaun Governu Indonézia atu entrega timoroan ne’e bazeia ba kooperasaun di’ak entre autoridade Seguransa Indonézia ho PNTL.

“Suspeitu ba kazu insestu iha Comoro ho naran inisiál VftS tinan 33, hosi Munisipiu Manatuto, ne’ebé halai ba Kupang-Indonézia hetan kapturasaun hosi Polres Baubau Provínsia NTT Kupang Timur iha loron 23 dezembru 2021,” Hatutan.com sita komunikadu, Domingu (26/12/21).

Kaptursaun ne’e bazeia ba kooperasaun di’ak entre autoridade Seguransa Indonézia no PNTL horisehik Migrasaun Indonézia entrega hikan suspeitu mai iha Batugade, hodi kontinua halo prosesu.

Hafoin halo identifikasaun iha Postu Integradu Fronteira Mota-Ain-Batugede, Komandante Postu Servisu Migrasaun Batugade entrega fali suspeitu ne’e ba iha Servisu Investigasaun Kriminál Nasionál (SIKN), hodi submete ba prosesu investigasaun.

Prosesu deportasaun ne’e akompaña mós hodi Konsul Timor-Leste iha Kupang, Gito Matos, Komandante SIP, Superintendente Polisia Boavida Ribeiro, Komandante Operasaun SIKN Inspetór Xefe Polísia Mouzinho Correira, reprezentante Servisu Nasionál Intelijénsia (SNI) no-mós Komandante Postu Servisu Migrasaun Batugade.

Jornalista: Cipriano Colo