Hatutan.com, (08 Janeiru 2022), Díli—Polísia Nasionál Timor-Leste (PNTL), Komandu Munisípiu Manufahi, hahú kombate utilizasaun motór kanu-resin, nune’e iha loron 02 Janeiru 2022 halo aprensaun ba motorizada hamutuk ualu, hosi joven sira ne’ebé hala’o konvoi área tasi-ibun, Betano.

Komandante PNTL, Munisípiu Manufahi, Superintendente Polísia, Joni Viana. Foto/News Roman ba Sosiedade ARS.

Komandante PNTL, Munisípiu Manufahi, Superintendente Polísia, Joni Viana, informa, alende halo aprensaun, kaptura mós na’in ba evidénsia sira maka motorista na’in-ualu, hodi halo identifikasaun.

“Ita la halo operasaun, maibé prontu, iha movimentasaun motorizada sira ne’ebé uza kanu-resin, ne’e laiha. Maibé, depois de tinan foun, ne’e mak sira kala ba paseiu iha tasi, uza fali kanu resin. Prontu, ita tenke kaptura. Tanba ne’e viola lei kódigu Estrada,” Superintendente Polisia, Joni Viana, informa ba Hatutan.com, via telefónika, Sábadu (08/01/2022).

Maski nune’e, motorista sira ne’e, PNTL halo de’it identifikasaun hodi fó mós edukasaun sívika no  evidénsia sira ne’ebé prende, hasai de’it kanu resin no entrega kedan ba na’in, hanesan edukasaun sívika ida atu respeita nafatin kódigu Estrada no sinais tránzitu.

Advertisement

Kona-bá situasaun jerál iha Manufahi durante selebrasaun Natál no tinan foun laiha perturbasaun, nune’e buat hotu la’o hakmatek to’o oras ne’e daudaun tanba hetan seguransa másimu hosi ajente seguransa, apoiu ho kontribuisaun hosi autoridade munisipál, Igreja, autoridade lokál no komunidade rasik.

Jornalista: Rogério Pereira Cárceres