Hatutan.com, (17 Janeiru 2022), Díli—Xefe Estadu Maiór Jenerál FALINTIL Forsa Defeza Timor-Leste (F-FDTL), Tenente Jenerál Lere Anan Timur deklara prontu ona atu kandidata aan sai Prezidente Repúblika (PR) ba periudu 2022 to’o 2027, tanba ne’e, laiha ema ida mak atu halo boikota ba ninia objetivu.

Komandante PM, Majór de Infantaria, Abel da Costa Xavier “Niki” halo kontinénsia ba Xefe Estadu Maiór Jenerál FALINTIL Forsa Defeza Timor-Leste (F-FDTL), Tenente Jenerál Lere Anan Timur, iha serimónia aniversáriu Polísia Militár (PM), ba dala-17, iha Kuartél Kintál-boot, Segunda (17/01/2022). Foto/Hatutan.com.

“Ha’u deklara ona katak, ha’u prontu kandidata aan, ema ida laiha impedimentu ba ha’u nia objetivu. Tanba, agora ne’e hotu-hotu iha interese polítika, boikota-malu,” Tenente Jenerál Lere Anan Timur, hateten ba jornalista sira, hafoin partisipa serimónia aniversáriu Polísia Militár (PM), ba dala-17, iha Kuartél Kintál-boot, Segunda (17/01/2022).

Notisia iah Relasaun:Papél Polísia Militár atu Kontrola Membru Forsa Armada Ne’ebé Halo Krime

Tenente Jenerál Lere Anan Timur, deklara nia prontidaun ne’e, hodi hatán kona-bá prosesu sira liga ho asuntu reforma nian, tenke liuhosi tempu no prosesu ne’ebé naruk.

Antes ne’e, Lere Anan Timur rasik mós hato’o ona pedidu rejignasaun ba Governu, hodi hasees aan hosi instituisaun F-FDTL.

“Ha’u Hanoin katak burokrasia. Ne’e mak uluk ha’u hateten, ha’u kuandu halo funu mós, ha’u la halo rekerimentu ba ema ida, kuandu halo funu mós laiha konstituisaun. Mais ida ne’e forsa ida ne’ebé ki’ik oan, mas manobras politika, buat sira ne’e hotu, lori tempu ba ema nia interese. Ita nia forsa ne’e la’ós rihun 50 ka 60. Mas rejignasaun ne’e últimu via ne’ebé mak ha’u atu tuir,” Tenente Jenerál, Lere Anan Timur, hateten.

Lere mós fó fiar ba Prezidente Repúblika (PR), Francisco Guterres “Lu Olo”, tanba sira na’in-rua la’ós ema seluk, ema leet. Tanba ne’e, PR “Lú Olo” sei dekreta duni karta rejignasaun ne’ebé Lere hato’o ona.

Tuir Lere, PR “Lú Olo” asume ona pozisaun iha órgaun sira Estadu Timor-Leste (TL) nian, ba dala-tolu no, pozisaun sira ne’e maka hanesan, sai Prezidente ba Assembleia Konstituinte, Prezidente Parlamentu (PN), no ikus liu mak sai ona Prezidente Republika (PR).

“Ami na’in-rua mesak maun-alin, ami uluk komprimenta, ami jura, katak, ita na’in-rua mate hamutuk, ita na’in-rua terus hamutuk, ita prontu ona. Sé karik ha’u avansa, ha’u taka dalan ba jerasaun tuan mak ida ne’e ona,” Lere Anan Timur, hateten ho fiar-aan.

Lere oras-ne’e iha ona forsa polítika ne’ebé bele fó apoia nia kandidatura ba PR iha eleisaun Prezidensiál 19 Marsu 2022.

Alende ne’e, sei apoia mós hosi veteranu no rejisténsia tomak, tanba ninia kandidatura ne’e reprezenta sira hotu iha TL.

“Ha’u hetan ona forsa politika. Forsa politika ne’e ita nia povu, la’ós partidu de’it. Povu, signifika iha partidu hotu-hotu, maibé ha’u FRETILIN,” Lere afirma.

Lere Seidauk Hatama Karta Rejignasaun

Tenente Jenerál Lere Anan Timur to’o oras-ne’e, nia parte seidauk hatama karta rejignasaun ba Governu, tanba Karta ne’ebé antes ne’e nia hatama ba Ministru Defeza, Filomino da Paixão de Jesus, konteúdu husu kona-bá atu reforma hosi nia kargu Xefe Estadu Maiór Jenerál F-FDTL, tanba kestaun idade.

“Karta reforma ne’e sé laiha rezultadu, ha’u sei hatama karta rejignasaun. Ohin ko’alia ne’e kona-bá reforma. Mas sé rejignasaun, lakleur, bele aban, ou bainrua, hatama karta rejignasaun,” Lere Anan Timur, afirma.

Tanba ne’e, Lere husu ba ‘politiku na’in’ sé de’it atu labele impede fali desizaun ne’ebé nia halo, tanba nia direitu tomak atu hili tuir saida mak nia hakarak.

“Ha’u Hanoin katak, ida ne’e ha’u nia direitu, ema ida, labele impede ha’u nia direitu. Rejignasaun, ha’u sakrifika ha’u nia karreira, reforma ne’e. Purke reforma labele, ha’u tenke rejigna aan,” Lere, subliña.

Komprimisiu ne’ebé Lere Anan Timur iha, hodi kandidata an ba PR, tenke la’o tuir saida mak hateten iha konstituisaun,  ida maka, sai símbolu ba Unidade Nasionál, nu’udár Komandante Supremu ba forsa sira armada nian.

Maski nune’e, Lere Anan Timur, seidauk bele halo deklarasaun ofisiál ba públiku, kona-bá bainhira mak atu kandidata an ba PR, maibé Lere ‘promete’ katak, iha tempu besik, sei fó-sai ba públiku atu bele hatene.

“Ida ne’e, agora ha’u seidauk bele deklara, mais to’o tempu, imi sei hatene,” Lere, dehan.

Jornalista: Rogério Pereira Cárceres