Hatutan.com (24 Janeiru 2022), Díli—Ministeriu Publiku (MP) ne’ebé reprezenta hosi Prokuradora Lídia Soares iha Segunda 24 fulan ne’e, liu hosi alegasaun, husu ba Tribunál Distritál Dili (TDD) atu aplika pena prizaun tinan tolu no indemizasaun ba Funsionáriu Tezouru rekolla taxa Diresaun Nasionál Polísia Imigrasaun, arguidu Jerónimo António Freitas ba krime pekulatu relasiona ho rekollamentu taxa ne’ebé fo prezuizu ba Estadu ho montante $13.200.

Tribunál Distritál Díli. Foto/Hatutan.com.

MP husu pena ne’e tanba konsidera faktus provadu bazeia ba deklarasaun arguidu ne’ebé konfesa parsiál inklui deklarasaun sasin sira katak, maski arguidu utiliza osan hosi rekollamentu taxa mai hosi pontu entrada sira ba nesesidade servisu, maibé tenki hetan uluk aprovasaun hosi ierarkia no arguidu inklui sasin la justifika kona-bá utilizasaun osan ne’e, tanba laiha resivu.

Parte Defeza Jonas Henrique husu ba Tribunál atu tetu didi’ak desizaun ba nia kliente, tanba maski arguidu rekoñese uza osan ba nesesidade iha servisu fatin, maibé osan balun depozita iha Banku.

Maski nune’e, to’o agora arguidu nafatin hetan konfiansa hodi kontinua asumi kargu hanesan Tezouru rekolla taxa Diresaun Nasionál Polísia Imigrasaun, tanba ne’e laiha dúvida katak, arguidu servisu ho honestu.

Antes ne’e, MP akuza arguidu ba prátika krime pekulatu ne’ebé previstu iha artigu 295 hosi kódigu penál Timor-Leste, relasiona ho rekollamentu taxa ba kofre Estadu iha kada pontu entrada sira hanesan aeroportu Díli, Portu Díli, Batugade, Salele, Aeroportu Suai no Sakato-Oé-Cusse ne’ebé fó prezuizu ba Estadu ho montante $13.200.

Audiénsia julgamentu prezide hosi juiz koletivu Alvaro M. Freitas, Evangelino Belo, José Gonçalves, MP  reprezenta hosi Prokuradóra Lídia Soares no arguidu hetan asisténsia legál hosi Defensór Públiku Jonas Henrique.

Jornalista: Carmelita Isaac