Hatutan.com, (27 Janeiru 2022), Díli-Komunidade Suku Becora, Postu Administrativu Cristo Rei, Munisípiu Dili, lamentavel ho empreza DILI ETERNAL INNOVATION INFORMATION, Lda, ne’ebé la hala’o nia obrigasaun hodi halo instalasaun Set-top Box/dexodificador Rádiu Televizaun Timor Leste, Empreza Públiku (RTTL,E.P) ba sira-nia uma. Tanba ne’e,  komunidade hola inisiativa  rasik  halo instalasaun Set-top Box ne’e iha sira ida-idak nia uma. 

Notísia iha Relasaun: Iha Vila Verde, Set-top Box RTTL,E.P Rai De’it iha Sede Suku

Komunidade Becusse Kraik, Suku Becora, Ana Rosa da Costa, hatudu hela Set-top Box RTTL,E.P ne’ebé nia rai de’it iha nia uma tanba la iha koñesimentu halo instalasaun, 27 Janeiru 2022. Foto/Hatutan.com

Iha kontratu servisu ne’ebé Governu liuhusi Ministru Asuntu Parlamentár Komunikasaun Sosiál (MAPKOMS), Francisco Pereira da Costa Jerónimo, estabelese ho empreza DILI ETERNAL INNOVATION INFORMATION, Lda, atu halo instalasaun Set-top Box/dexodificador  RTTL,E.P ba komunidade benefisiáriu hamutuk 30.000 (rihun tolu-nulu) iha Munisípiu Dili, Liquiça, Ermera ho Manatuto, ho nia valor $900,000.00.

Kada instalasaun  Set-top Box/dexodificador  RTTL,E.P ba kada uma-kain ho nia kustu $30.00. Maibé, realidade balun hatudu iha terrenu katak  DILI ETERNAL INNOVATION INFORMATION, Lda ne’ebé hetan projetu ne’e kauze la halo instalasaun ba Set-top Box/dexodificador  RTTL,E.P, maibé fahe de’it.

Delegada Maucoco Maten, Suku Becora, Martinha Soares ba Hatutan.com, iha Sede Suku Becora, Kinta (27/01/2022), haktuir, iha Suku Becora empreza distributor ba Set-top Box/dexodificador  RTTL,E.P halo distribuisaun iha faze rua no ida dahuluk halo ona instalasaun, maibé iha segunda faze komunidade barak halo instalasaun rasik tamba tékniku husi empreza DILI ETERNAL INNOVATION INFORMATION, Lda, la halo instalasaun tuir kontratu ne’ebé iha.

“Empreza promete maibé to’o ohin loron seidauk mai halo instalasaun, nune’e komunidade sira ho inisiativa rasik halo instalasaun tuir sira nia koñesimentu,” Martinha Soares hateten ho hirus.

Notísia iha Relasaun: CAC Investiga Hela Instalasaun Set-top Box RTTL, E.P Ne’ebé Nakfilak Projetu “Fahe” De’it

Komunidade Becusse Kraik, Suku Becora, Ana Rosa da Costa hateten dezde ba foti Set-top Box/dexodificador RTTL,E.P iha Xefe Aldeia nia uma to’o oras ne’e rai de’it iha nia uma tamba la hatene atu halo instalasaun.

“Tékniku husi empreza DILI ETERNAL INNOVATION INFORMATION, Lda, ne’ebé hetan responsabilidade ba instalasaun tuir kontratu ne’ebé iha la ba halo instalasaun. Ami triste tamba Governu fahe tiha buat ne’e (Set-top Box/dexodificador) maibé ami monta la hatene,” Ana Rosa da Costa haktuir.

Set-top Box RTTL,E.P fahe no rai de’it iha komunidade nia uma iha Becora, Dili, 27 Janeiru 2022. Foto/Hatutan.com

Ana Rosa da Costa hatutan situasaun ne’e lori tristeza ba komunidade sira tamba empreza mak hetan osan,  maibé povu nafatin la sente benefísiu husi programa Governu nian.

Xefe Suku Camea,  Matos da Costa hateten komunidade Suku Camea tomak hamutuk iha aldeia 13 no husi ne’e iha aldeia rua mak simu ona Set-top Box/dexodificador RTTL,E.P husi MAPKOMS no aldeia 11 seluk sei nafatin hein maske to’o oras ne’e seidauk iha informasaun serteza kona-ba distribuisaun faze tuir mai.

“Iha ha’u nia suku foin mak Aldeia Terminal no Bedois mak simu no seluk seidauk to’o agora la hatene bainhira,” Matos da Costa hateten.

Xefe Aldeia Terminal, Manuel Celestino Freitas hateten komunidade barak mak halo hikas dezligasaun ba Set-top Box/dexodificador  RTTL,E.P ne’ebé tékniku sira monta iha sira nia uma tamba dalaruma kanál RTTL sai la moos.

“Set-top Box/dexodificador RTTL,E.P ne’e nia benefísiu ba ami mak simu ne’e de’it, maibé uza la di’ak,” Manuel Celestino Freitas lamenta.

Autoridade lokál ne’e husu atu empreza ne’ebé manan projetu ne’e atu iha responsabilidade hodi halo hikas instalasaun, hodi nune’e, komunidade sira sente dunik benefísiu husi programa Governu nian ne’ebé gasta osan Estadu ho montante $900,000.00.

Xefe Suku Camea, Matos da Costa. Foto/Hatutan.com

Dokumentu komprovativu (Certidão do Registo Comercial) hosi SERVE,I.P  ne’ebé Hatutan.com asesu hatudu katak empreza DILI ENTERNAL INNOVATION INFORMATION, Lda, nu’udar sósiu ka shares husi Fan Yuanxiang, natural Hunan-Xina ho nasionalidade Xina no Melánia da Silva Fernandes Capela, timor-oan ne’ebé hala’o mós serbisu loron-loron nian hanesan  Sekretaria Prezidente Federasaun Futeból Timor Leste (FFTL), Francisco Pereira da Costa Jerónimo nu’udar mós MAPKOMS.

Iha Certidão do Registo Comercial hosi SERVE,I.P  hatudu shares ka kuota ba empreza DILI ENTERNAL INNOVATION INFORMATION, Lda, nia kompozisaun, hanesan Fan Yuanxiang iha sósiu ka kuota 60% no Melánia da Silva Fernandes Capela iha 40% husi total Kapitál Sósiu $10,000.00. 

Tuir Estatutu DILI ENTERNAL INNOVATION INFORMATION, Lda kona-bá Kontratu Konstitutivu, Kuota Limitada ba Sosiedade, iha artigu 4 (Kapitál Sosiál)  hateten, kapitál sosiál ho inisiál integra ba osan no depozita ona ho valór nominal $10,000.00 ba nain husi empreza DILI ENTERNAL INNOVATION INFORMATION, Lda ne’ebé reprezenta kuota hanesan tuir mai:

1. Kuota ida ho valor nominal $6,000.00 vale ba 60% mai husi Fan Yuanxiang
2. Kuota ida ho nia valor nominal $4,000.00 vale ba 40% ho nai na’in ba sósiu ne’e mak Melánia da Silva Fernandes Capela.

Iha Orsamentu Jerál Estadu tinan fiskál  2021, MAPKOMS hetan rubrika transferénsia publika ho montante $3,093,528.00 no husi orsamentu ne’e inklui ona osan $900,000.00 hodi finansia ba projetu  instalasaun Set-top Box/dexodificador RTTL,E.P  hamutuk 30.000 (rihun tolu nulu) ba komunidade iha Munisípiu Dili, Liquiça, Ermera ho Manatuto.

Jornalista: Vito Salvadór