Connect with us
Pakote Ahi

Dili

Iha Vila Verde, Set-top Box RTTL,E.P Rai De’it iha Sede Suku

Published

on

Hatutan.com, (26 Janeiru 2022), Díli—Projetu instalasaun Set-top Box/dexodificador Rádiu Televizaun Timor Leste, Empreza Públiku (RTTL,E.P) nian ho valor $900,000.00  seidauk finaliza tuir kontratu ne’ebé Governu liuhusi Ministru Asuntu Parlamentár no Komunikasaun Sosiál (MAPKOMS), Francisco Pereira da Costa Jerónimo, estabelese ho  kompañia DILI ENTERNAL INNOVATION INFORMATION, Lda.

Notísia iha Relasaun: CAC Investiga Hela Instalasaun Set-top Box RTTL, E.P Ne’ebé Nakfilak Projetu “Fahe” De’it

Set-top Box/dexodificador RTTL,E.P ne’ebé rai de’it iha Sede Vila Verde, Dili, 26 Janeiru 2022. Foto/Hatutan.com

Iha Orsamentu Jerál Estadu tinan fiskál  2021, MAPKOMS hetan rubrika transferénsia publika ho montante $3,093,528.00 no husi orsamentu ne’e inklui ona osan ho montante $900,000.00 hodi finansia ba projetu  instalasaun Set-top Box/dexodificador RTTL,E.P  hamutuk 30.000 (rihun tolu nulu) ba komunidade iha Munisípiu Dili, Liquiça, Ermera ho Manatuto.

Projetu instalasaun ne’ebé MAPKOMS fó ba DILI ENTERNAL INNOVATION INFORMATION, Lda, ne’ebé nu’udar sósiu ka shares (Açães) husi Sekretaria Gabinete Prezidente  Federasaun Futeból Timor Leste (FFTL), Melánia da Silva Fernandes Capela,  ne’e ho nia kustu instalasaun ba kada Set-top Box/ dexodificador RTTL,E.P   ba kada uma-kain $30.00.

Advertisement

Kustu ne’e kobre ona osan operasionál, instalasaun no fee ba ekipa tékniku sira atu halo instalasaun ba benefisiáriu sira (abitante kada uma-kain) iha Munisípiu Dili, Liquiça, Ermera ho Manatuto.

Xefe Suku Villa Verde, Abdul M. Arranhado, informa durante ne’e  ekipa tékniku sira husi DILI ENTERNAL INNOVATION INFORMATION, Lda  mai fahe no entrega de’it  Set-top Box/dexodificador RTTL,E.P ba aldeia sira, hanesan lideransa komunitária. La’ós halo instalasaun.

Notísia Relevante: Deskonfia, MAPKOMS Nu’udar Prezidente FFTL Fó Projetu iha RTTL,E.P Ba Sekretaria FFTL

“Ami observa hela katak komunidade barak mak lakohi mai simu tanba parte kompañia distributor la halo instalasaun Set-top Box/dexodificador RTTL,E.P nune’e komunidade sira mos lakhoi simu no lahatene atu halo instalasaun,” Xefe Suku Villa Verde, Abdul M. Arranhado, informa ba Hatutan.com iha Sede Suku Villa Verde, Dili, Kuarta (26/01/2022).

“Sasán sira  Set-top Box/dexodificador RTTL,E.P barak mak rai de’it iha sede suku,” Abdul M. Arranhado hatutan.

Advertisement

Autoridade lokal ne’e haktuir, iha nia uma rasik mós antena ne’e rai de’it tamba hein hela tékniku kompañia nian atu halo instalasaun, maibé la mosu to’o ohin loron.

Xefe Suku Villa Verde, Abdul M. Arranhado. Foto/Hatutan.com

Lori komunidade Vila Verde nia naran, Xefe Suku Abdul M. Arranhado, husu ba MAPKOMS ho empreza DILI ENTERNAL INNOVATION INFORMATION, atu bele responsabiliza hodi halo instalasaun Set-top Box/dexodificador RTTL,E.P ba komunidade benefisiáriu sira.

“Se rai butuk de’it hanesan bele at no estraga de’it osan Estadu nian ne’ebé gastu ba projetu ne’e,” Abdul M. Arranhado hateten.

Xefe Aldeia 01 de Setembru, Joanico Albano Ximenes, informa nia komunidade kuaze uma-kain 240 mak simu ona Set-top Box/dexodificador RTTL,E.P maibé to’o ohin loron seidauk utiliza tamba kompañia la halo instalasaun.

Notísia iha Relasaun: AJAR Husu CAC ho MP Sériu Investiga Projetu Set-top Box RTTL,E.P

“Mai fahe de’it se mak atu monta? Buat ne’e uza tan Xina nia lian, ami haruka ema seluk mós ta’uk buat ne’e at,” Joanico Albano Ximenes hateten.

Advertisement

Xefe aldeia ne’e hatutan, komunidade sira sempre ezije atu autoridade sira halo komunikasaun ho empreza distribuidór hodi halo instalasaun  ba Set-top Box/dexodificador RTTL,E.P ne’ebé simu tiha ona, maibé dezde fulan-Outubru 2021, empreza ne’e la iha ona kontaktu ho autoridade no komunidade sira iha Suku Vila Verde.

Komunidade Aldeia 02, Suku Caicoli, Filomena Martins Moniz Varela hateten nia uma-kain simu ona Set-top Box/dexodificador RTTL,E.P, maibé seidauk utiliza tamba tékniku sira la mai halo instalasaun no iha komunidade balun monta rasik tuir koñesimentu ne’ebé iha maibé la sai.

Komunidade Aldeia 02, Suku Caicoli, Filomena Martins Moniz Varela. Foto/Hatutan.com

“Ami iha suku Caicoli simu hotu ona, maibé seidauk uza tamba  kompañia mai fahe de’it,” Filomena Martins Moniz Varela haktuir.

Xefe Suku Santa Cruz, Marciano Juvinal, informs, suku Santa Cruz rasik kuaze populasaun 70% mak seidauk hetan Set-top Box/dexodificador RTTL,E.P tamba ne’e komunidade sira ezije hela bainhira mak sira bele hetan.

“Komunidade barak mak husu hela mo ami hein to’o agora Set-top Box/dexodificador RTTL,E.P sira ne’e seidauk mai,”  Marciano Juvinal hateten.

Autoridade lokal ne’e hateten sei buka tuir preokupasaun komunidade nian atu tau iha konsiderasaun no hato’o ba iha parte Governu no empreza hodi bele iha solusaun.

Advertisement

Xefe Aldeia Danoge, Hermenezilda do Rosario Alves haktuir, komunidade  Aldeia Danoge kuaze simu hotu ona Set-top Box/dexodificador RTTL,E.P parte tékniku husi empreza halo ona instalasaun, maibé komunidade balun  sei enfrenta problema tamba dalaruma iha fallansu iha tékniku instalasaun tanba programa televizaun nian lasai.

Iha parte seluk Xefe Aldeia Babaliurai Oeste, José do Carmo hateten implementasaun programa fahe Set-top Box/dexodificador RTTL,E.P ba komunidade sira hamosu diskriminasaun tamba komunidade sira barak la satisfás ho programa ne’ebé maioria Xina nian.

“Sira mai dehan iha programa barak, maibé hafoin monta tiha programa ualu de’it no Xina nian mak barak,” Xefe Aldeia Babaliurai Oeste, José do Carmo  haktuir.

Antes ne’e, iha Kuarta (19/01/2022), iha Palásiu Governu,  hafoin reuniaun Konsellu Ministru, Hatutan.com halo konfirmasaun ho Ministru Asuntu Parlamentar no Komunikasaun Sosiál (MAPKOMS), Francisco Pereira da Costa Jerónimo, ba projetu Set-top Box/dexodificador RTTL,E.P ne’e, maibé  nia husu ba jornalista Hatutan.com atu bele buka informasaun hodi bele hetan sasán Set-top Box/dexodificador RTTL,E.P ne’e empreza distribui (fahe) de’it ka halo instalasaun.

“Ita boot bele ba halo investigasaun kompañia ba distribui de’it ka halo mós montajen pois lori informasaun mai,” Francisco da Costa Jeronimo hateten. Nia informa tan katak projetu ne’e remata ona, tamba ne’e, buat hotu liu husi dalan legal.

Advertisement

Jornalista: Vito Salvador

Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Dili

Reabilitasaun Merkadu Manleu Atinje Porsentu 73 no Merkadu Taibessi Porsentu 85

Published

on

Hatutan.com, (19 Jullu 2024), Díli–Reabilitasaun merkadu Manleu atinje  73% no merkadu Taibessi atinje ona 85%.

(more…)

Kontinua Le'e

Dili

Projetu Emerjénsia Sira iha Díli Laran Atinje Porsentu 80

Published

on

Hatutan.com, (19 Jullu 2024), Díli-Maioria projetu emerjénsia sira ne’ebé Ministériu Obras Públikas (MOP) halo adjudikasaun direta bá kompañia sira hodi halo reabilitasaun estrada sira iha kapitál Díli kuaze atinje  porsentu 80 (80%).

(more…)

Kontinua Le'e

Dili

Governu Seidauk Fó Indenizasaun bá Komunidade Afetadu Eviksaun SEATOU

Published

on

Hatutan.com, (16 Jullu 2024), Díli Parlamentu Nasionál liuhosi Deputadu Bankada FRETILIN, António Calau preokupa ho promesa Governu nian atu fó  indenizasaun bá komunidade afetadu evokasaun husi polítika  Sekretará Estadu asuntu Toponomia  no Urbanizasaun (SEATOU).

(more…)

Kontinua Le'e
Advertisement

Trending