Hatutan.com, (29 Janeiru 20220), Dili-“Apartir horiseik, Sesta 28 Janeiru 2022, ha’u sai jenerál reformadu ho fitun tolu (Tenente Jenerál-red), maibé  ha’u sei hetan fitun ida ba fitun haat, ne’e regra.”

Notísia ih Relasaun: Lú Olo Ezonera Ona Lere husi Xefe Estadu Maiór Jenerál F-FDTL

Lere Anan Timur aprezenta nia kandidatura ba Prezidente Repúblika 2022-2027. Foto/Espesiál

Lia-hirak ne’e hato’o hosi Jenerál reformadu Lere Anan Timur iha nia lia fuan badak bainhira deklara aprezenta an nu’udar kandidatu Prezidente Repúblika periodu 2022-2027 iha nia rezidénsia iha Dili, Sábadu (29/01/2022).   

“Ha’u servisu Estadu tinan 47. Iha Timor so ami uitoan de’it la to’o atus ida. Ami servisu ba  Estadu to’o tinan 47, ha’u halo tinan 70 no ha’u husu ha’u nia reforma. Ha’u agradese ba imi nia aman no imi nia maun Taur Matan Ruak no ha’u mós agradese ba imi nia maun no imi nia aman, Francisco Guterres “Lú Olo”, ba sira-nia laran di’ak no fuan boot aseita ha’u nia ezonerasaun no ha’u nia reforma.”  

Lere hateten nia ho Taur no Lú Olo la’ós ema seluk no ema leet. Maibé mesak maun-alin. La’ós tanba osan  mak sai maun-alin,  maibé tanba kompromisu no juramentu ho ran no isin hamutuk la so’e malu.

“Ami jura iha ai-laran, mate hamutuk no moris hamutuk. Biar barak mate, ami uitoan de’it mai vila, mai hasa’e bandeira ukun rasik an ho  povu maubere. Tanba ne’e maka ha’u servi tinan 47 iha Estadu, maibé maluk camarada no irmaun veteranu sira, rezisténsia nia ema, akonsella dehan katak, ita to’o ona tinan 70 tanba saida mak la bele kandidata aan ba PR 2022-2027. Ha’u hanoin no ha’u simu,” Lere Anan Timur haktuir.  

Lere dehan astu sai ukun nain la difisil ida. fasil tebetebes, maibé so difisil kuandu timor-oan la hamutuk. Kuandu la hamutuk, bele matenek too iha ne’ebé mas todan nafatin lori mesak labele.

“Ha’u hateten ba maun Lú Olo, muda tiha ita-nia naran Palasiu Prezidensiál Ai-Tarak Laran tanba ita tuur fali iha ai-tarak leten. Mas, atu dehan, ha;u hadomi sira hotu. Ha’u dehan nanis katak durante tinan lima ha’u nia mandatu hanesan Xefe Estadu Majór Jenerál F-FDTL, laiha ema ida atu hatún imi tanba ami nia kompromisu no solidariedade hanesan mós maun Xanana,” Lere tenik tan.

“Se maun Xanana uluk ha’u kompromete ha’u bele mate, mas maun Xanana la bele mate. tane sira hanesan manu aman loro-sa’e nian. Agora maun Xanana fó bensaun ba maun José Ramos-Horta.”

Lere promete katak kandidata aan nu’udar Prezidente Repúblika 2022-2027 tanba hakarak marka diferensa. Maibé diferensa ida Lere afirma ne’e seidauk bele ko’alia agora tanba nia hakarak halo no ko’alia bainhira eleitu ona ba iha Palásiu Prezidensiál Au-Tarak Lara, Dili.

“Ha’u sei korrije no troka buat ne’ebé la di’ak. Mas ha’u hanoin katak maun sira ne’ebé troka malu, la’ós halo at de’it, se sira halo sala de’it karik dala-ruama ita seluk ona. Ha’u agradese ba sira-nia servisu no kontribuisaun ba rai ida-ne’e.”

Ba apoiante, simpatizante no ekipa susesu hotu, Lere Anan Timur apela atu badinas servisu no matenek servisu hodi lori nia  ba Palásiu Prezidénsia  Repúblika.  

Lere afirma tan, servisu, servisu no servisu. Nune’e, hotu-hotu ne’ebé apoiu ba nia kandidatura  sei haku’ur mota, haku’ur terus, hamlaha, hamrook no kolen. Mas hotu-hotu sei  la lao mesak tanba matebian sira, rai-lulik no foho-lulik sei lao hamutuk atu to’o vitória ne’ebé ita funu ba.

“Imi haree maun boot, avo Xanana fó bensaun ba maun Ramos-Horta, imi haree imi nia maun Mari Alkatiri lori FRETILIN nia naran fó bensaun ba maun Lú Olo. Ha’u la hatene se mak fó bensaun ba ha’u. Ita-nia povu mak sei fó bensaun. Ita nia foho-lulik no rai-lulik ho hi ran ne’ebé fakar iha ha’u nia leten mak fó bensaun ba ha’u,” Lere hateten.

“Matebian sira sei tau matan ba ha’u no tau matan ba povu hotu atu bele hetan fatin ne’ebé ita hotu hakarak. Ita mesak timor-oan, ita-nia hakarak mak estabilidade, hakmatek atu bele lori ita-nia povu ba moris di’ak.”

Jornalista: Vito Salvadór