Polítika
Xanana Ba Dubai-Alkatiri Fila Hosi Portugal To’o Sees-Malu Iha Aeroportu
Hatutan.com, (27 Janeiru 2022), Díli-Aeroportu Prezidente Nicolau Lobato, Comoro, Dili, sai ona sasin ba lideransa no ema hotu nia viajen tama-sai Timor Leste. Kinta ohin (27/01/2022), Aeroportu Comoro sai tan sasin ba viajen sees-malu entre lider na’in-rua; Kay Rala Xanana Gusmão, Prezidente partidu CNRT ho Mari Alkatiri, Sekretáriu Jerál Partidu FRETILIN.
Notísia iha Relasaun: Mari Alkatiri Iha Dalan Mai Dili
Sekretáriu Jerál Partidu FRETILIN, Mari Alkatiri. Foto/Hatutan
Lider Karizmátiku Kay Rala Xanana Gusmão ho nia ekipa halo viajen ba Dubai hodi responde ba konvite importante husi Nasaun Uniaun Emiradu Árabe (UEA) hodi fahe esperiénsia kona-bá susesu negosiasaun fronteira marítima entre Timor-Leste ho Austrália. Nune’e, Mari Alkatiri, fila mai Timor-Leste hafoin pasa ferias tinan foun, 01 Janeiru 2022 iha Portugal.
Mari Alkatiri hala’o viajen privadu ba Portugal iha loron 29 fulan-Dezembru 2021, hodi pasa ferias ho família, ne’ebé maioria hela hotu iha Portugal. Nune’e, ho Aviaun komersiál CITILINK, Mari Alkatiri to’o fali ona iha Dili no ho duni Aviaun CITILINK, Xanana halo viajen ba Dubai.
Informasaun ne’ebé Hatutan.com asesu hosi fonte sira besik Xanana katak iha Dubai Kay Rala Xanana Gusmão sei ko’alia kona-bá Fronteira marítima no Portugal sei hasoru malu ho Advogadu sira ba asuntu Fronteira nian inklui halo mós tratamentu saúde.
Vizita Kay Rala Xanana nian ne’e akompaña mós hosi Xefe Ekipa Téknika ba negosiasaun, Embaixadór Roberto Soares no ekipa jurista no tékniku sira seluk tan.
Mari Alkatiri ne’ebé foin tuun husi aviaun CITILINK liu kedas mai Sede Comite Central FRETILIN (CCF) hodi halo konferénsia imprensa no afirma pozisaun partidu FRETILIN nian hodi apoia kandidatura Prezidente Repúblika 2022-2027, Francisco Guterres “Lú Olo”.
Mari Alkatiri informa iha ona planu atu konvoka komisaun polítika nasionál atu hetan informasaun no reafirma dala ida tan apoiu FRETILIN nian ba kandidatu Lú Olo.
Mari Alkatiri tuun husi aviaun CITILIK iha Aeroportu Comoro, Dili, 27 Janeiru 2022. Foto/Hatutan.com
“Ne’e apoiu FRETILIN nian, husi leten to’o ba iha baze, mákina FRETILIN tomak sei fó apoiu ba Lú Olo. Fó apoiu ba Lú Olo, la’ós la gosta seluk, mas vizaun ne’ebé Lú Olo kria durante mandatu nu’udar Prezidente Repúblika vizaun ida inkluziva, nasionál no nia hakarak kontinua ho nia programa ne’e para atu hametin Estadu ida ne’e no hametin dezenvolvimentu sustentavel.” Mari Alkatiri afirma.
Mari Alkatiri sei organiza no apela ba militante partidu FRETILIN hotu atu tenke mantein disiplina institusionál atu apoiu nia kandidatura rasik iha eleisaun prezidensiál 2022.
“Uluk Lú Olo sai Prezidente Repúblika tanba FRETILIN mak kandidata nia no durante ukun iha ona vizaun nasionál, nia rasik hakarak kandidata an hanesan independente, maibé obrigasaun FRETILIN nian atu fo apoiu ba nian tamba ne’e mak FRETILIN no iha estatutu FRETILIN haktuir prezidente FRETILIN automatikamente sei sai Prezidente Repúblika,” Mari afirma tan.
Jornalista sira konfirma ho Alkatiri kona-bá durante ferias hala’o vizita ba Ró Haksolok, nia afirma, nunka halo vizita ba estaleiru fatin konstrusaun Ró Haksolok tamba nia la’ós ona prezidente autoridade Rejiaun Administrativu Espesiál Oé-Cusse Ambeno (RAEOA).
“Ha’u nein dala ida ba to’o iha ne’ebá tamba ha’u hatene ona ema hafuhu barak, mauhuu barak. Ha’u la ba nein dala ida evita tamba agora prezidente autoridade la’ós ha’u ona, ha’u nia gabinete eis titular iha sorin kedas, ha’u sai husi ne’ebá ha’u nunka mais tau ain iha ne’ebá ne’e mak Mari Alkatiri,” nia hateten.
Ba jornalista sira, Mari Alkatiri mós konfesa katak nia mai ho preokupasaun boot ida atu kontribui ba eleisaun prezidensiál hodi konsolida pas, estabilidade ba estadu direitu demokrátiku. Tamba ne’e, tuir nia, tempu ona ba jerasaun 1974/1975 atu buka halibur-malu para halo balansu ba Timor Leste de pois de restaurasaun.
“Balansu ne’e importante tebes atu ita hatene ho momoos se mak halo saida, se mak la halo buat ida, maibé ko’alia barak,” Alkatiri hateten.
Xanana Gusmão ho aviaun CITILINK halo viajen ba estranjeiru, 27 Janeiru 2022/ Foto/Hatutan.com
Alkatiri mós deklara sente triste tamba rona katak iha kandidatu Prezidente Repúblika ida ne’ebé mai la’ós atu hakotu krize maibé atu kria krize.
“Ne’e halo ha’u laran taridu. Ita labele kandidata an dehan kedas atu kria krize. Ita atu sai Prezidente Repúblika muito bem no ne’e direitu hotu-hotu nian, mais la’ós para atu hahú krize foun. Uainhira, ita kandidata an no komesa dehan katak órgaun soberania estadu halo desizaun sala no la imparsiál ne’e ita kontra ona funsionamentu normal Estadu direitu demokrátiku,” Alkatiri hateten.
Biar nune’e Sekretáriu Jerál partidu FRETILIN ne’e subliña prontu hasoru-malu oin ho oin (empat mata) atu halo balansu no tetu hamutuk, se mak hetan forsa bainhira kria krize no se mak husi 2006 to’o ohin loron sempre buka hadook krize.
Jornalista: Vito Salvador
Hatutan.com (15 Outubro 2026), Díli-Governu sei halo inaugurasaun ba uma dignu hamutuk 25 iha munisípiu Manatuto, Postu Administrativu Natarbora, no Munisípiu Manufahi postu administrativu Fatuberliu, nu’udar parte husi programa uma dignu ne’ebé sei kontinua dezenvolve iha munisípiu sira seluk.
Inaugurasaun ne’e sei fó prioridade ba uma sira ne’ebé konstrusaun kompletu ona no prontu atu hetan utilizasaun husi família benefisiária, atu nune’e sira bele hahú hela iha uma foun ne’ebé seguru no dignu.
“Iha loron 22 agora ne’e ita sei halo inaugurasaun ba uma dignu primeiru iha Fatuberliu no depois tuir mai sei iha Natarbora, no restu ne’e sei iha prosesu, uma sira ne’ebé atu inaugura ne’e tenki prontu 100%. Ita tenki inaugura ona uma ne’e para ema bele hela ona, lae hein fali uma ne’ebé mak seidauk hotu dala ruma ema labele hela lalais, uma ne’ebé kompletu los ona mak iha Fatuberliu, dau-daun ne’e iha uma 25 mak ita sei halo inaugurasaun,” Dehan Vise-Primeiru-Ministru, Ministru Sosiál no Ministru Dezenvolvimentu Rurál no Abitasaun Komunitáriu, Mariano Assanami Sabino ba Hatutan.com iha Ministérii Finansas, Aitarak-laran, Kuarta14/10/2026.
Iha faze tuir mai, iha mós planu atu halo estudu kona-ba konstrusaun uma tanba sei halo uma ho vertikál.
Programa uma dignu ne’e sai parte husi prioridade iha planu ministériu, depois durante tinan 20 independénsia, Governu fó atensaun bo’ot ba infraestrutura bázika, hanesan estrada, eletrisidade no bee-moos.
Agora, Governu hakarak aumenta investimentu iha setór uma, liu-liu atu garante katak juventude ho idade 18 ba leten bele asesu ba uma dignu.
“Ita iha moto katak ha’u nia uma mak ha’u nia moris mak sai nu’udar mensajen prinsipál husi programa ne’e. Uma la’ós de’it fatin atu hela, maibé mós símbolu dignidade, seguransa no estabilidade ba moris família ida,” Hatete Vise-Primeiru-Ministru
Programa ne’e sei kontinua to’o responde ba nesesidade populasaun, tanba iha konstituisaun hatete katak sidadaun hotu-hotu iha direitu atu asesu ba uma ne’ebé dignu no apropriadu.
Além husi fornese uma ne’e integra mós ho atividade ekonómika no dezenvolvimentu rurál, atu ajuda família benefisiária hasa’e rendimentu no hadi’a sira-nia kondisaun moris.
“Uma dignu ne’e integra mós ho oinsá mak atu hamenus kiak tanba ne’e mak ita integra ho atividade ekonomika, dezenbolvimentu rurál sei fasilita oinsá para sira bele iha rendimentu, tanba uma dignu sira ne’e sei selu la’os gratuita, selu mais kuandu nia rendimentu ne’e to’o ona $500 ba leten, katak tenki hadia nia ekonomia para ita halo uma nia dihnu iha laran tanba nia ekonomia komesa iha ona para bele halo manutensaun ba uma no bele iha sustentabilidade,” Assanami informa
Programa uma dignu ne’e mós sei liga ho edukasaun, liuhusi AHHA Education, ne’ebé sei oferese kursu lian Inglés no Portugés gratuitu ba labarik sira husi família benefisiária.
Além ne’e, kondisaun edukasaun no asesu ba eskola ne’ebé di’ak sei sai parte importante atu prepara labarik sira ba futuru, no ajuda sira iha oportunidade atu dezenvolve an no kontribui ba família no sosiedade.
“Konstrusaun uma ne’e tekniku sira hare’e katak maximu tau iha $40.000 mil mais agora sira atu hadia fali parese sei liu uitoan husi ida ne’e, mais realidade ne’e uma kuartu 4, uma ne’e se ita halo privadu mós ho $40.000 ne’e mós dala ruma ita la halo uma hanesan ne’e. Tanba ne’e mak ha’u husu ba tékniku sira tenki seriedade, survey no kompañia mós tenki iha lukru, tanba ne’e mak difikuldade kompañia mós dala ruma sira menan tiha tender mais la iha benefisiu, ida ne’e tékniku sira tenki hare’e para kada programa ka projetu ne’ebé mak ita halo tenki iha benefisiu ba kompañia para sira bele esforsu halo servisu,” Termina Assanami.
Jornalista: Maria Angelita Sandi Belo
PILAR AZUL NE’EBÉ ITA HALUHA TIHA IHA TASI OE-CUSSE: VIZAUN OSEANOGRÁFIKA NO EKOLÓJIKA
Opozisaun kestiona prioridade orsamentu sira kontinua konsentra de’it ba setór petroliferu
FRETILIN Kestiona no Duvida, Sé Mak Benefisiáriu Direta OJE 2027
Governu ho PN Hahú Diskute OJE 2027 ho Total Montante Billiaun US$2.57
Austrália fó oportunidade bolsa estudu ba jornalista joven Timor-oan na’in-rua
DIT Hahú Introdús ba Estudante Sira Kona bá Seguransa ba Dadus Importante
IGJ Legaliza Corais Timor bá Atividade Futu-Manu
STOP PRESS: Ministru Nino Pereira Konsumu Dose Kontamina ho Frasku Halo Nanál Kanek no Ran
Indonesia dan Timor-Leste Perkuat Kerjasama Ekonomi, Sosial Budaya, dan Pariwisata
Governu Indika BTK Hadi’a Trotoár Naksobu iha Área Bebora
Asesu Gratuita HATUTAN.com
Hafoin Ferias Judisiáriu PGR Sei Ko’alia Kazu Set-top Box RTTL,E.P
Xefe Estadu TL Kondekora Militár Korea Súl Ne’ebé Mate iha Oé-Cusse
PCIC Detein MG Lori Osan Falsu Hosi Inglaterra
PR Simu Karta Kredensial Husi Embaixadór Brunei Darussalam ho Reinu España
-
Nasionál5 days agoXanana: Pesoalmente ha’u sei apoia feto kandidata ba Prezidente Repúblika períodu 2027–2032
-
Nasionál2 days agoGovernu ho PN Hahú Diskute OJE 2027 ho Total Montante Billiaun US$2.57
-
Nasionál1 week agoPR José Ramos-Horta Hala’o Vizita Ba Repúblika Koreia
-
Defeza & Seguransa6 days agoDurante Períodu Finadu, Mosu Asidente 23 no Rezulta Vitíma ida Lakon Vida
-
Nasionál5 days agoEleitór Timor-Oan Liu 11.600 Halo Resensiamentu iha Diaspora Iha Ámbitu Preparasaun Eleisaun Prezidénsial 2027
-
Polítika20 hours agoOpozisaun kestiona prioridade orsamentu sira kontinua konsentra de’it ba setór petroliferu
-
Nasionál4 days agoAustrália fó oportunidade bolsa estudu ba jornalista joven Timor-oan na’in-rua
-
Polítika2 days agoFRETILIN Kestiona no Duvida, Sé Mak Benefisiáriu Direta OJE 2027