Hatutan.com (31 Janeiru 2022) Díli—Kandidatu Pezidente Repúblika ba períudu tinan 2022-2027, hosi Partidu FRETILIN Francisco Guterres Luo-Olo atuál Prezidente Repúblika rejistadu iha Tribunál Rekursu (TR).

Ekipa Susesu Kandidatu Prezidente Repúblika, Francisco Guterres Lú Olo, rejistu iha Tribunál Rekursu, Segunda (31/01/2022). Foto/Hatutan.com.

Kandidatu ne’e rejistadu hafoin submete dokumentu hanesan karta deklarasaun no aseitasaun hosi kandidatu rasik, karta designasaun reprezentante, dokumentu komprovativu hanesan lista asinatura, kartaun eleitorál hosi sidadaun na’in rihun sia.

Notisia iha Relasaun:Apoiante 125.000 Garante Lori Fila Lú Olo Ba “Aitarak Laran”

Rejistu no submisaun dokumentu hosi kandidatu Francisco Guterres Lú Olo reprezenta hosi koordenadór ekipa susesu, Fernando Dias Gusmão, iha tuku 14:50.

“Dokumentus hotu ne’ebé militante intrega mai ami hamutuk 125.000 no dokumentu hirak ne’e ami labele lori mai hotu, tanba atu hafásil TR hodi halo verifikasaun lais liu. Ami hatama de’it 9.000 ba TR, atu dehan de’it katak, PR rekandidata an hodi kompete iha eleisaun tuir-mai,” Fernando Dias Gusmão hateten, hafoin submete dokumentu iha TR, Segunda (31/01/2022).

Iha oras ne’ebé diferente, tuku 15:00 ekipa susesu hosi Partidu Kmanek Haburas Unidade Nasionál Timor Oan (KHUNTO), submete dokumentu eletróniku hosi kandidatura Prezidente Repúblika, Armanda Berta dos Santos ba TR, tanba antes ne’e la aprezenta dokumentu eletróniku.

Hafoin submete dokumentu kandidatura Armanda Berta no rejistadu iha TR  ho lista proponente hamutuk 8.641 hosi Munisípiu 12, inklui Rejiaun Administrativa Espesiál Oé-Cusse Ambeno (RAEOA).

Lista sira-ne’e mai hosi Munisípiu Dili 1.470, Manatuto 804, Ermera 801, Baucau 742, Liquiça 612, RAEOA 599, Aileu 578, Manufahi 507, Viqueque 476, Bobonaro 447, Covalima 493, Lautém 404, Ainaro 588 no Ataúro 140.

“Ami mai kompleta dokumentu eletróniku ne’ebé iha Sesta liu ba seidauk kompleta. Maibé, ohin rejistadu iha TR, hodi hein fali notifikasaun TR nian,” Prezidente ekipa susesu, Marito Magno, hateten.

Tuir planu, Kmanek Haburas Unidade Nasionál Timor Oan (KHUNTO), sei hala’o abertura kompaña iha Munisípiu Ainaro.

Kona-bá ba kandidatura independente Virgílio Guterres “Lamukan” to’o iha TR iha tuku 16:00 hodi submete dokumentu, maibé TR seidauk bele rejista no husu kandidatu ne’e atu kompleta dokumentu balun.

“Depois de TR identifika, presija kompleta dokumentu balun primeiru reprezentante rua. Entaun, presija deklarasaun de aseitasaun rua no ha’u mai lori ida de’it. Tanba ne’e, presija halo tán ida, segundu lista proponente ami tau hamutuk de’it tanba ne’e TR sujere atu tau tuir munisípiu maske iha lista eletróniku tau tuir munisípiu,” Lamukan hateten.

Tanba ne’e, kandidatura independente ne’e sei kompleta dokumentu no iha tempu badak sei rejistu iha TR ho proponente hamutuk 7.000-resin.

Tuir informasaun ne’ebe Hatutan.com hetan hosi TR katak, to’o loron 31 fulan Janeiru 2022, kandidatura hamutuk na’in-neen mak rejistadu.

Kandidatu rejistadu ne’e kompostu hosi kandidatura hosi partidu CNRT, José Manuel Ramos Horta, partidu KHUNTO Armanda Berta dos Santos, Partidu FRETILIN, Francisco Guterres Luo-Olo, kandidatura independente kompostu hosi Felisberto Araújo Duarte, Milena Pires no Angela Freitas.

Jornalista: Carmelita Isaac