Hatutan.com, (01 Marsu 2023), Díli—Governu sei fó subsídiu bá José Ramos-Horta ho Francisco Guterres “Lú-Olo”, nu’udár kandidatu Prezidente Repúblika (2022-2027) ne’ebé konkorre iha eleisaun Prezidensiál hosi primeira to’o segunda volta.

Kandidatu Prezidente Repúblika periudu 2022-2027, José Manuel Ramos Horta no Francisco Guterres Lú Olo. Foto/repro.

Atribuisaun valór subsídiu nian bá kandidatu PR na’in-rua ne’e ho baze Dekretu-Lei númeru 6/2018. Iha Kuarta, 01 Marsu 2023, Governu liuhosi surumutu Konsellu Ministru ordináriu aprova ona alterasaun dahuluk bá Projetu Dekretu-Lei ne’e.

Lee Mós: Tribunál Rekursu Proklama Ramos-Horta Eleitu ba Prezidente Repúblika 2022-2027

“Konsellu Ministru aprova proposta ida ne’ebé aprezenta hosi Primeiru Ministru, kona-bá alterasaun dahuluk Dekteru-Lei númeru 6/2018, loron 14 fulan Marsu, ne’ebé fiksa valór subvensaun ka subsídiu ne’ebé Estadu atu fó bá kandidatu sira Prezidénsia Repúblika bá kampaña eleitóral sira,” Ministru Prezidénsia Konsellu Ministru, Fidelis Manuel Leite Magalhães hateten, hafoin sorumutu ordináriu KM iha Palásiu Governu, Díli, Kuarta (01/03/2023).

Alterasaun ida-ne’e ninia objetivu atu fó kompensasaun bá kandidatu sira Prezidente Repúblika nian, bainhira presiza halo votasaun bá dala-rua iha ámbitu Eleisaun Prezidensiál.

Fidelis Magalhães dehan, Lei antes ne’e hatuur katak, Estadu fó de’it subsídiu ka subvensaun bá iha primeira ronda.

Maibé, hafoin iha proposta sira, Konsellu Ministru ohin konkorda atu iha alterasaun ida. Maibé, alterasaun ida-ne’e, hatuur katak, labele iha repetisaun bá votu.

“Entaun, ne’ebé mak hetan ona iha primeira ronde, labele repete fali iha segunda ronde. Iha segunda ronde ne’e nia valór tenke menus, labele 100% fali, hosi númeru votantes,” Fidelis esplika.

Signifika, hakarak dehan katak ho subvensaun ida-ne’e, fó de’it, halo kobertura de’it bá diferensiál votu ne’ebé hetan entre primeira ronde ho segunda ronde bá eleisaun prizidensiais.

“Ninian destináriu, sé mak sei hetan bá ida ne’e, kandidatu sira Prezidente nian, liu-liu iha kazu ida-ne’e, kandidatu bá segunda ronde nian, maka Prezidente atuál nomós eis Prezidente Repúblika,” Fidelis Magalhães hateten tán.

Jornalista: Rogério Pereira Cárceres