Hatutan.com, (03 Fevereiru 2022), Díli- Ministériu Saúde (MS) kontinua halo medida prevensaun hodi neutraliza kazu surtu dengue ne’ebé hamate ona ema na’in-22, kazu ativu 1.407.  

Pasiente Dengue na’in-rua okupa maka ida tanba kama la to’o. Foto/Hatutan.com

Governu halo daudaun medida prevensaun rua hodi neutraliza kazu surtu dengue liu husi limpeza jerál no fumigasaun iha fatin sira ne’ebé identifika nu’udar fatin risku ba dengue. Maske nune’e, Primeiru Ministru Taur Matan Ruak, kontinua  husu ba komunidade sira kontribui ba atividade limpeza jerál hodi neutraliza moras dengue.

Komunikadu imprensa husi Ministériu Saúde Timor Leste ne’ebé Hatutan.com iha Kuarta (02/02/2022),  hatudu katak iha Timor Leste rejista kazu dengue hamutuk 1.407 no kumulativu óbitu 22.

Munisipiu Díli nafatin rejista númeru kazu dengue as ho total 925, Manatuto (92),  Ermera (77), Baucau (68),  Manufahi (58), Covalima (50), Viqueque (21), Aileu  (20),  Ainaro (14) no RAEOA iha kazu 3.

Iha klasifikasaun ba kazu dengue hanesan dengue Fever (DF) ho total kazu 784, dengue Hemorrhagic Fever (DHF) kazu 70 no Dengue Shock Syndrome (DSS) total kazu 71.

Hafoin enkontru ho Prezidente Repúblika, Primeiru Ministru (PM) Taur Matan Ruak ba jornalista sira iha Palásiu Prezidensiál , Dili, Kinta (03/02/2022), konfirma katak Governu iha preokupasaun boot ho moras dengue, nune’e ministériu saúde halo hela medida prevensaun.

 “Ita halo hela esforsu hodi minimiza moras dengue iha komunidade nia let, ita espera katak bele ultrapasa faze ida-ne’e liu husi kolaborasaun mútua entidade hotu nian,” Taur Matan Ruak hateten.

Atu neutraliza hikas komunidade husi surtu dengue komunidade hotu tenke iha konsiénsia atu halo limpeza, hamoos valeta sira, tau kalén at tuir nia fatin, labele husik bee-nalihun no troka bee iha vazu ai-funan nian, atu susuk labele tolun no importante tau fo’er iha nia fatin.

Jornalista: Vito Salvadór