Hatutan.com, (03 Fevereiru 2022), Díli-Kandidatu Prezidente Repúblika 2022-2027, Virgílio da Silva Guterres “Lamukan”, Kinta (03/02/2022), kompleta ona dokumentu iha Tribunál Rekursu (TR) hodi kompete iha eleisaun prezidensiál ne’ebé atu hala’o iha loron 19 Marsu 2022.

Notísia iha Relasaun: Kandidatu PR Lú Olo ho Armanda Berta Rejistadu, Lamukan Presiza Kompleta Dokumentu

Kandidatu PR 2022-2027, Virgílio Guterres “Lamukan”. Foto/Espesiál

Constâncio da Conceição Pinto. Foto/Espesiál

Virgílio Guterres “Lamukan” avansa independente ba kandidatu Prezidente Repúblika. Nune’e, nia tenke kompleta dokumentu tuir rekizitu rejistu kandidatura Prezidente Repúblika nian, liuliu   hanesan karta deklarasaun no aseitasaun husi kandidatu inklui lista proponente iha kada munisípiu.

Virgílio Guterres “Lamukan” ho nia ekipa ba rasik submete dokumentu iha TR tuku 14;30 ho dokumentu proponente sira hamutuk ema na’in-6.275.

“Ami rejista ona no TR mós simu ona dokumentu ne’ebé antes ne’e haruka ami kompleta inklui dokumentu sira seluk no karik presiza kompleta buat balun depois maka TR sei notifika no konfirma ho ami,” Virgílio Guterres “Lamukan” hateten ba jornalista sira hafoin rejistu iha TR.

Iha tuku 15:00 Otl, kandidatura independente Constâncio da Conceição Pinto mós rejistadu iha TR hafoin submete dokumentu ho proponente ema na’in-5,000-liu.

“Ohin ami kompleta ona dokumentu hodi rejistu ami nia kandidatu independente Constâncio da Conceição Pinto ho apoiante hamutuk 5,000-resin,” portavoz ekipa susesu Adi Pinto.

To’o loron 03 fulan-Fevereiru tinan 2022, kandidatura hamutuk na’in-13 maka rejistadu  ona iha Tribunál Rekursu (TR), kompostu hosi kandidatu José Manuel Ramos-Horta husi partidu CNRT, Armanda Berta dos Santos (KHUNTO), Francisco Guterres “Lú-Olo” (FRETILIN), Mariano “Asanami” Sabino (PD) no kandidatu independente kompostu hosi Felisberto Araújo Duarte, Milena Pires, Angela Freitas, Isabel da Costa Ferreira, Hermes da Rosa Correia Barros, Lere Anan Timur, Rogério Tiago Lobato, Virgílio Guterres “Lamukan”,  ho Constâncio da Conceição Pinto.

Jornalista: Carmelita Isaac