Hatutan.com, (03 fevereiru 2022), Díli—Prezidente Repúblika (PR) Francisco Guterres Lú Olo, husu ba sidadaun sira atu mantein pás no estabilidade iha rai-laran, perante preparasaun no periudu eleisaun Prezidensiál ne’ebé sei realiza iha fulan Marsu tinan ne’e.

Primeiru Ministru (PM), Taur Matan Ruak, hala’o reuniaun semanál ho Prezidente Republika (PR) Francisco Guterres Lú Olo, iha Palásiu Prezidensiál Bairru-Pité, Kinta (03/02/2022). Foto/Média PR.

Mensajen Xefe Estadu ne’e, hato’o hosi  Primeiru Ministru (PM), Taur Matan Ruak, hafoin reuniaun semanál ne’ebé hala’o iha Palásiu Prezidensiál Bairru-Pité, Kinta (03/02/2022).

Notisia iha Relasaun:Komandu PNTL Husu Públiku Keixa Membru Ne’ebé Fasilita Joven Tuda-malu

“Prezidente Repúblika hato’o mensajen atu nasaun ne’e presiza hakmatek no pás, nune’e atividade sira bele la’o di’ak. Bainhira kampaña iha eleisaun la’o ho hakmatek no susesu, TL nia naran sei morin tanba hetan prestíjiu tanba hetan avaliasaun di’ak iha mundu,” Taur Matan Ruak fó-sai mensajen ne’e.

Advertisement

Prezidente Repúblika kontra ema sira ne’ebé iha intensaun atu destabiliza rai ne’e. Xefe Estadu husu atu sidadaun ida-idak tenke hadomi nia an liu hosi kooperasaun ho Ministériu Saúde (MS) ba prevensaun no kontrolu ba moras sira hanesan dengue, Covid-19, tuberkuloze no moras hada’et sira ne’ebé hamate ema barak.

Xefe Governu lamenta no triste  tanba haree foin-sa’e ne’ebé nu’udár jerasaun foun la kontribui ba pás no estabilidade, maibé foti nasaun ne’e hanesan riba tun fali ba rai naruk.

Relasiona ho kazu violénsia entre membru Organizasaun Arte Marsiais ne’ebé lori disturbiu ba públiku, Primeiru Ministru apela atu sidadaun hotu hametin nafatin unidade nasionál hodi kontribui ba Timor Leste nia dezenvolvimentu.

Jornalista: Vito Salvadór

Advertisement