Hatutan.com, (11 Fevereiru 2022), Díli—Iha Kinta, 10 Fevereiru 2022, tuku 20:00 oras kalan, akontese udan no anin boot to’o estraga inan-faluk Josefa Fátima Soares (73) nia uma, iha aldeia Fahilacor Suku Uma-naruc, Postu Administrativu Laclo, Munisípiu Manatuto.

Anin estraga inan-faluk Josefa Fátima Soares (73) nia uma, iha aldeia Fahilacor Suku Uma-naruc, Postu Administrativu Laclo, Munisípiu Manatuto, Kinta (10/Fevereiru/2022). Foto/Hatutan.com.

Xefe aldeia Fahilacor, Florindo da Costa Oliveira, via telefónika ba Hatutan.com informa, dezastre naturál ne’e estraga inan-faluk Josefa nia uma, to’o sasan uma laran nian lubuk ida mak la konsege salva.

“Sasan uma-laran nian ne’e hanesan bikan, sanan, no seluk tán tanba uma monu, taka tomak. Uma ne’e mós hanesan uma-lisan ida iha suku ne’e no ferik ho nia oan feto ida mak hela,” Florindo da Costa Oliveira, informa ba Hatutan.com, Sesta (10/02/2022).

Durante tinan-neen ona, inan-faluk Josefa hela mesak ho nia oan feto Judit da Costa, tanba nia kaben Alfredo dos Santos mate dezde tinan 2016.

“Inan faluk ne’e, nia katuas ona mate ona, hela de’it ho nia oan feto ida,” Xefe aldeia ne’e konta-tuir.

Hafoin akontesimentu, autoridade komunitáriu, liu-liu Xefe Aldeia Fahilacor rasik, hamutuk ho nia delegadu aldeia sira, halo kedan identifikasaun ba sasán sira ne’ebé hetan estragus, no hato’o ona ba Xefe Suku Uma-naruc, Estanislau de Carvalho, atu bele hatutan inan-faluk ne’e nia susar ba Governu, liuhosi Ministériu Solidariedade Sosiál no Inkluzaun (MSSI).

Totál Uma-ka’in iha aldeia Fahilacor hamutuk 71 ho populasaun hamutuk 328. Distánsia entre aldeia Fahilacor ba Laclo-Villa, kuaze kilómetru 19.

Jornalista: Rogério Pereira Cárceres