Hatutan.com, (14 Fevereiru 2022), Díli- Organizasaun sosiedade sivíl Programa Monitorizasaun ba Sistema Judisiál (JSMP) husu ba Ministériu Públiku (MP) atu fó sai ba públiku hodi akompaña kona-bá informasaun kazu indísiu korrupsaun, koluzaun no nepotizmu (KKN) iha projetu instalasaun Set-top Box/dexodificador Rádiu Televizaun Timor Leste, Empreza Públiku (RTTL,E.P).

Notísia iha Relasaun: CAC Submete Ona Kazu Projetu Set top Box RTTL,E P Bá Ministériu Públiku

Diretora JSMP, Ana Paula Marcal. Foto/JSMP

Kazu projetu instalasaun Set-top Box/dexodificador RTTL,E.P ho nia kustu $900,000.00 deskonfia Ministru  Asuntu Parlamentár no Komunikasaun Sosiál (MAPKOMS), Francisco Martins da Costa Jerónimo, nudár mós  Prezidente  Federasaun Futeból Timor Leste (FFTL) estabelese akordu adjudikasaun direita ba nia sekretaria iha FFTL, Melánia da Silva Fernandes Capela nudár na’in no sósiu ho porsentu 40 (40%) iha kompañia DILI ETERNAL INOVATION INFORMATION, Lda.

 Kazu ne’e rasik Comição Anti Corupcão (CAC)  liuhusi Unidade Informasaun no Seguransa husi Diresaun Investigasaun halo ona investigasaun no haruka ona ba MP iha loron 21 fulan-Dezembru 2021.

Advertisement

JSMP apresia ba CAC nia servisu no tuir prinsípiu lei bainhira kazu ida iha hela prosesu ne’e konsidera nudár segredu justisa, nune’e nia substánsia husi kazu labele divulga ka fó sai ba públiku, maibé MP bele dehan de’it katak kazu ne’e MP simu ona husi CAC maibé tamba ida ne’e sei iha prosesu investigasaun nia laran hodi halo analiza ba kazu ne’e.

“MP presiza hato’o informasaun ba públiku atu nune’e públiku labele julga katak MP la halo servisu no budu de’it kazu sira ne’e,” Diretora Ezekutiva JSMP, Ana Paula Marcal hateten ba Hatutan.com via WhatsApp, Segunda (14/02/2022).

Notísia iha Relasaun: CEPAD Husu Ministériu Públiku Imparsiál iha Investigasaun ba Kazu Projetu Set Top Box RTTL,E P

Nia esplika katak lei medida prevensaun no kombate korrupsaun artigu 26 hateten promove no fó informasaun ba jornalista sira atu iha informasaun ida ne’ebé kompetente liu bainhira fó sai ba públiku hodi prevene korrupsaun atu públiku asesu informasaun ho di’ak, tamba ne’e, la bele sees-an husi mídia.

Relasiona ho lei aprovizionamentu númeru 1/2010 alterasaun datoluk kona-bá Rejime Jurídiku Aprovizionamentu  (RJA) hateten, adjudikasaun direita so bele akontese de’it ba kazu emerjénsia sira ne’ebé urjente no karik ida-ne’e la halo iha tempu badak nia laran afeta ba ema nia vida ka bele mós akontese adjudikasaun direita kuandu la iha tan empreza ida mak bele fornese servisu ne’ebé ministériu nesesita.

Advertisement

Ministériu Públiku kaer metin mak segredu justisa tamba kazu ne’e sei iha prosesu nia laran tamba ne’e JSMP husu ba Ministériu Públiku atu iha kolaborasaun hodi prevene no kombate korrupsaun atu ema hotu bele hatene.

JSMP konkorda katak bainhira kazu ida sei iha prosesu nia laran tenke taka ba públiku, maibé informasaun kona-ba servisu ne’ebé Ministériu Públiku halo kona-bá kazu ne’e to’o iha ne’ebé ona tenke fó sai ba públiku.

Notísia iha Relasaun: Projetu Set-top Box RTTL,E.P, MAPKOMS Prontu Ba Hatán iha Tribunál

“JSMP rekomenda atu MP fó informasaun katak simu ona husi CAC ka seidauk, no karik simu ona MP sei investiga no presiza mós analiza, nune’e MP labele fó sai kazu nia konteúdu ka susbstánsia ba públiku, maibé iha tempu badak, instituisaun hotu koopera ho di’ak no testemuña MP arrola hotu ona, MP sei rejista ba Tribunál hodi halo julgamentu,” nia rekomenda.

Ministru Asuntu Parlamentár no Komunikasaun Sosiál (MAPKOMS), Francisco Jerónimo Martins da Costa Pereira, ba jornalista sira, Tersa (08/02/2022), deklara katak, nia prontu ba hatán iha tribunál kona-bá projetu instalasaun Set-top Box/dexodificador Rádiu Televizaun Timor-Leste, Empreza Públika (RTTL, E.P).

Advertisement

“Ha’u prontu kualkér tempu bainhira Ministériu Públiku bolu atu ba investiga ka ba hatán,” Ministru Asuntu Parlamentár no Komunikasaun Sosiál (MAPKOMS), Francisco Jerónimo Martins da Costa Pereira, deklara ba jornalista sira, hafoin sorumutuk regulár ho Primeiru-Ministru (PM), Taur Matan Ruak, iha rezidénsia ofisiál Primeiru-Ministru  nian iha Faról, Dili.

Ministru Francisco Jerónimo esplika katak, projetu instalasaun Set-top Box/dexodificador ne’e, nudár projetu bilaterál ida ne’ebé iha kooperasaun entre Governu Xina ho Timor-Leste.

Notísia iha Relasaun: Direitu Bá Resposta Husi MAPKOMS Kona-bá Projetu Intalasaun Set-top Box RTTL,E.P

Jornalista: Vito salvador

Advertisement