Hatutan.com, (16 Fevereiru 2022), Díli- Reitór Universidade da Paz (UNPAZ) nudár akadémiku,  Adolmando Amaral husu ba Ministériu Públiku (MP) atu la bele “budu” kazu projetu instalasaun Set-top Box/dexodificador Rádiu Televizaun Timor Leste, Empreza Públika (RTTL,E.P)  ne’ebé deskonfia iha pratika abuzu podér, korrupsaun nepotizmu no koluzaun (KKN).

Notísia iha Relasaun: JSMP Husu MP Nakloke Ba Públiku Kona-bá Kazu Set-top Box RTTL,E.P

Reitór Universidade da Paz (UNPZ), Adolmando Amaral. Foto/Media UNPAZ

Akademiku husi UNPAZ ne’e ba Hatutan.com iha nia knaar fatin UNPAZ, Osindu, Dili, Kuarta (16/02/2022) hateten, ministru balun halo adjudikasaun direita ba projetu balun iha sira-nia ministériu ne’e problema ida no parte akademiku haree ne’e la reflete ho lei rejime jurídiku aprovizionamentu (RJA) katak so bele halo de’it adjudikasaun direita ba projetu sira ne’ebé emerjénsia no tenke halo imediata atu salva povu nia moris, maibé Set-top Box/ dexodificador RTTL,E.P dalan loos liu mak tenke liu husi prosesu normal katak tenke iha tkonkursu públiku.

“Adjudikasaun direita ministru tenke iha razaun ne’ebé natoon para bele deklara ba públiku no too agora ministru rasik seidauk fó deklarasaun ba públiku kona-ba adjudikasaun direita ne’ebé nia halo ba nia sekretaria iha Federasaun Futebol Timor Leste (FFTL) viola total prosedimentu sira iha RJA nian,” Adolmando Amaral hateten.

Kazu Set-top Box/dexodificador RTTL,E.P nia prosesu, tuir Adolmando, tenke liu dalan legal no Komisaun Anti Korrupsaun (CAC) halo nia servisu hodi lori kazu ne’e too ona iha Ministériu Públiku (MP) maibé MP mak tarde  no kazu barak mak too iha ne’ebá maibé pendente hela liuliu kazu sira ne’ebé liga ho membru Governu sira tamba sira sempre halo arkivu no lakohi prosesa.

Notísia iha Relasaun: CAC Submete Ona Kazu Projetu Set top Box RTTL,E P Bá Ministériu Públiku

Nia hateten, MP tenke funsiona di’ak ba hotu-hotu, tantu membru Governu ka ema setór privadu sira uainhira komete krime ruma tenke halo prosesa, labele ba arkivu fali kazu sira ne’e para depois  haree katak deklarasaun ne’ebé Primeiru-Ministru halo iha fatin-fatin katak VIII Governu mai atu halo reforma no hadi’a ne’e nia lójika iha, maibé se agora akontese nune’e signifika la iha lójika tamba Xefe Governu ko’alia buat ida, MP halo buat seluk no membru Governu halo buat ketak.

“Husu ba MP hatudu sira nia profisionalizmu kona-ba kazu sira hanesan ne’e di’ak liu sira atende lais liu satan kazu sira envolve membru Governu para bele sai ezemplu ba sira seluk,” Adolmando hateten.

“Ita budu hela kazu membru Governu sira nian no tau liu  atensaun ba povu baibain no emprezáriu sira nian ne’e hatudu MP la iha imparsialidade iha nia servisu ba kombate korrupsaun,” nia hateten.

Akademista ne’e subliña, kazu Set-top Box/dexodificador RTTL,E.P  bele kaduka tamba MP nia prestasaun servisu mak la diak hodi halo prosesu ne’e tarde no mesmu publiku nia haree MP tenke tau atensaun ba kazu ne’e.

Tipu kazu sira ne’ebé ligasaun ho korrupsaun direita ne’e barak loos, tuir nia, MP mak la prosesa buat ne’e ho lais. Mezmu MP iha rekursu ne’ebé sufisiente, sira iha mudansa ba prokuradoria tamba ne’e tenke halo jestaun ida di’ak para kazu barak labele arkivu maibé nia prosesu ne’e tenke la’o.

“Uainhira prokuradoria ida, se Governu mak haruka nia sempre asegura interese Governu nian, tamba ne’e tuir lolos selesaun ba prokuradoria ne’e tenke ema ida ne’ebé independente, ema ne’ebé la iha interese no la simu influensia husi partidu. Bianhira Governu mak indika, nia sempre asegura interese Governu nian hanesan kazu Set-top Box RTTL,E.P ne’e sira asegura malu hela,” nia tenik.

Hatutan.com halo esforsu ona atu bele halo konfirmasaun ho Prokuradór Jerál Repúblika (PGR), Alfonso Lopes. Infelizmente to’o agora seidauk bele, maske ba ona hasoru Gabinete PGR hodi tenta hasoru direta PGR no halo apontamentu atu bele halo entrevista ho PGR, mas Hatutan.com seidauk iha responde to’o ohin loron.  

Ministru Asuntu Parlamentár no Komunikasaun Sosiál (MAPKOMS) nu’udar mós Prezidente Federasaun Futeból Timor Leste (FFTL), Francisco Martins da Costa Jerónimo, deskonfia komete pratika “abuzu poder” hodi estabelese kontratu projetu Set-top Box/dexodificador RTTL,E.P ba empreza DILI ENTERNAL INNOVATION INFORMATION, Lda, ne’ebé nu’udar sósiu husi Fan Yuanxiang ho Melánia da Silva Fernandes Capela nu’udar Sekretaria Gabinete Prezidente FFTL.

Dokumentu komprovativu (Certidão do Registo Comercial) hosi SERVE,I.P  ne’ebé Hatutan.com asesu hatudu katak empreza DILI ENTERNAL INNOVATION INFORMATION, Lda, nudár sósiu ka shares husi Fan Yuanxiang, natural Hunan-Xina ho nasionalidade Xina no Melánia da Silva Fernandes Capela, timoroan ne’ebé hala’o mós serbisu loron-loron nian hanesan  FFTL.

Iha Certidão do Registo Comercial hosi SERVE,I.P  hatudu shares ka kuota ba empreza DILI ENTERNAL INNOVATION INFORMATION, Lda, nia kompozisaun, hanesan Fan Yuanxiang iha sósiu ka kuota 60% ($6,000.00) no Melánia da Silva Fernandes Capela iha 40% ($4,000.00) husi total Kapitál Sósiu $10,000.00. 

Tuir Estatutu DILI ENTERNAL INNOVATION INFORMATION, Lda kona-bá Kontratu Konstitutivu, Kuota Limitada ba Sosiedade, iha artigu 4 (Kapitál Sosiál)  hateten, kapitál sosiál ho inisiál integra ba osan no depozita ona ho valór nominal $10,000.00 ba nain husi empreza DILI ENTERNAL INNOVATION INFORMATION, Lda ne’ebé reprezenta kuota hanesan tuir mai:

Iha Orsamentu Jerál Estadu tinan fiskál  2021, MAPKOMS hetan rubrika transferénsia publika ho montante $3,093,528.00 no husi orsamentu ne’e inklui ona osan $900,000.00 hodi finansia ba projetu  instalasaun Set-top Box/dexodificador RTTL,E.P  hamutuk 30.000 (rihun tolu nulu) ba komunidade iha Munisípiu Dili, Liquiça, Ermera ho Manatuto.

Jornalista: Vito Salvadór