Connect with us
Pakote Ahi

Justisa & Krime

Kazu Eis Diretór Merenda Eskolár, Sasin Deklara Konstrusaun Armazén Fos ho Tipu Emerjénsia

Published

on

Hatutan.com, (21 Fevereiru 2022), Díli—Tribunál Distritál Díli (TDD), kontinua hala’o julgamentu ba kazu eis-koordenadór merenda eskolár Postu Administrativu Ataúro, arguidu Ibrahim Soares ba krime abuzu konfiansa agravadu no administrasaun danoza relasiona ho konstrusaun armazén fos iha tinan 2018 no motorizada inklui mobiliáriu ne’ebé Ministériu Edukasaun (ME) oferese ba arguidu.

Julgamentu kontinuasaun iha Segunda 21 fulan ne’e, Diretór Ajénsia Asosiasaun Kolektu Mahana Ataúro ne’ebé sai mós hanesan arguidu nia maun deklara hodi rekoñese katak loos duni iha tempu ne’ebá presiza halo armazén provizóriu atu rai fos, tanba antes ne’e sasin mak oferese sala ida hosi edifísiu asosiasaun nian hodi oferese gratuita ba arguidu hodi rai fos.

Notisia iha Relasaun:TDD Kontinua Julga Kazu Ne’ebé Envolve Eis Koordenadór Merenda Eskolár Ataúro

Advertisement

“Bainhira ha’u ba eskola iha Nova Zelándia arguidu kontaktu ha’u hodi utiliza sala ida, maibé bainhira ha’u fila hosi eskola, ha’u fó hatene katak labele utiliza ona sala asosiasaun nian hodi rai fos, tanba asosiasaun mós iha atividade no servisu barak atu hala’o. Tanba ne’e, ha’u esplika ba NGO Rotary Club of Moruya (IRCM) ne’ebé fó apoiu orsamentu hodi halo konstrusaun armazén fos,” sasin deklara iha Tribunál.

Alende ne’e, sasin deklara konstrusaun armazén la konsege finaliza tanba orsamentu la to’o, maski nune’e bainhira iha ona desizaun hosi TDD ba kazu ne’e, sasin sei esforsu liu hosi NGO ne’ebé nia lidera hodi finaliza konstrusaun ne’e, tanba sasin ne’e mós hanesan ema segundu ne’ebé toma responsabilidade ba konstrusaun ne’e bainhira nia alin arguidu iha problema.

Hafoin rona sasin, TDD adi’a hikas julgamentu ba loron seluk hodi kontinua rona sasin sira seluk.

Antes ne’e, tuir akuzasaun hosi Ministériu Públiku (MP), katak iha tinan 2014 to’o 2018, arguidu selebra kontratu ho Ministériu Edukasaun (ME) númeru Ref. 248/DNRI—IfNWI/2016 ba pozisaun Koordenadór Merenda Eskolár iha Postu Administrativu Ataúro ho saláriu mensál $221, tanba ne’e ME fornese fasilidade ba apoiu serbisu hanesan motór ho marka Honda Mega Pro, matrikula 1012 GA, termu entrega kupon mina, komputadór Desktop I, UPS I, printer HP I, tinta printer unidade 4, surat tahan rim 2 kada periodu trimestrál, armáriu vidru ba arkivu I, armáriu ki’ik ho gaveta l, meza servisu I, kadeira servisu l.

lha fulan-Dezembru 2018, ME hapara kontratu serbisu ba funsionáriu kontratadu hamutuk 273, inklui arguidu liu hosi Ministeriál Nú 14/GMEJD[XlV2018.

Advertisement

Maske nune’e, hahú husi fulan-Dezembru 2018 to’o fulan-Juñu 2020, arguidu Ia entrega fila fasilidade hirak-ne’e ba ME, maibé arguidu rai nafatin sasán hirak ne’e iha ninia uma.

Alende ne’e, arguidu utiliza komputadór, printer no tinta printer, meza no kadeira serbisu nian hodi imprime matéria ba ninia privadu no família nia interese.

Iha tinan 2018, arguidu hanesan funsionáriu kontratadu ba Ajente Administrasaun Públika, halo proposta konstrusaun armazén merenda eskolár iha Postu Administrativu Ataúro utiliza ME ba iha Rotary Club of Moruya (IRCM) iha Austrália ho apoiu osan Dolar Austrália 14.250, ekivalente ho dolar amérikanu $10. 241,50.

Rezultadu hosi proposta ne’e, arguidu mak jere rasik hodi harii konstrusaun armazén ho medida naruk metru 12, Iu’an metru 6 no as metru 3 iha arguidu nia pai rasik nia kintál-laran, ho totál osan ne’ebé fundasaun IRCM transfere mai iha testemuña BH nia konta bankária iha ANZ Díli no entrega ba arguidu ho montante dolar Austrália 14.250, ekivalente ho $10.241,50.

Arguidu aproveita oportunidade no konfiansa ne’ebé IRCM fó, tanba funsaun ne’ebé nia okupa iha momentu faktu ne’e akontese no arguidu hatene katak, apoiu osan ho montante $10.241,50 ne’e la’ós pertense ba nia, maibé arguidu jere no utiliza osan ne’e tuir ninia interese hodi fó benefísiu ba nia aan.

Advertisement

Arguidu hatene katak, fasilidade ne’ebé ME entrega ba arguidu liu hosi Diresaun Nasionál Lojístika, tanba funsaun ne’ebé arguidu okupa iha altura ne’ebá nu’udár koordenadór Merenda Eskolár iha Postu Administrativu Ataúro.

Fasilidade hirak ne’e, hetan ona apreensaun hosi Komisaun Anti-Korrupsaun (CAC, sigla portugés), hafoin hetan delegasaun kompeténsia hosi Ministériu Públiku hodi halo investigasaun ba arguidu no ekipamentu hirak ne’e agora CAC entrega ona ba MP.

Ho hahalok arguidu nian, MP akuza arguidu ba pratika krime rua mak hanesan abuzu konfiansa agravadu, administrasaun danoza ne’ebé previstu iha artigu 257, 274 hosi kódigu penál TL.

Audiénsia julgamentu ne’e prezide hosi juiz koletivu Alvaro Maria Freitas, José Gonçalves, Argentino Nunes, MP reprezenta hosi Prokuradór Rogério Viegas no arguidu hetan asisténsia legál hosi advogadu privadu Tomazia Umbelina Magno no Xisto Pedroso.

Jornalista: Carmelita Isaac

Advertisement

Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Justisa & Krime

Kona-bá Estradisaun Fujitivu Teves Jr, Governu Hein Desizaun Definitiva Husi Tribunál Rekursu

Published

on

Hatutan.com, (17 Jullu 2024), Díli-Prosesu sira bá estradisaun fujitivu Arnolfo Teves Jr ho nasionalidade Filipinu ne’e, Ministériu Justisa (MJ) hein de’it desizaun definitiva husi Tribunál Rekursu (TR) ka Tribunál Supremu Justisa (TSJ).

(more…)

Kontinua Le'e

Justisa & Krime

PGR Konfirma Kazu Instalasaun Set-Top Box RTTL,E.P Kontínua La’o iha Prokuradór Titulár

Published

on

Hatutan.com, (16 Jullu 2024), Díli- Prokuradór Jerál Republika (PGR, sigla portugés), Alfonso  Lopes, konfirma kazu instalasaun Set-Top Box Rádiu Televizaun Timor-Leste, Empreza Públika (RTTL,E.P) nia prosesu kontínua iha prokuradór titulár nia liman.

(more…)

Kontinua Le'e

Justisa & Krime

Naimori bá Hatán MP Kona-bá Kazu $130,000

Published

on

Hatutan.com, (10 Jullu 2024), Díli-Konselleiru Supremu  Partidu Kmanek Haburas Unidade Nasional Timor Oan nian (KHUNTO), José dos Santos “Naimori” Bucar,  Kuarta (10/07/2024), marka prezensa iha edifísiu Prokuradoria Jerál Repúblika (PGR) hodi kumpre notifikasaun husi Ministériu Públiku (MP) atu hatán kona-bá kazu osan isin-lolon (cash) ho montante $130,000 ne’ebé atu lori sai husi Timor-Leste iha tinan 2022.

(more…)

Kontinua Le'e
Advertisement

Trending