Hatutan.com, (22 Fevereiru 2022), Díli-Ministériu Públiku simu ona prosesu investigasaun husi Komisaun Anti Korrupsaun(CAC, sigla porgtugés) ba kazu projetu instalasaun Set-top Box/dexodificador Rádiu Televizaun Timor Leste, Empreza Públiku (RTTL,E.P).

Notísia iha Relasaun:  HAK Sujere Ba PDHJ Atu Ajuda MP Aselera Kazu Set-top Box RTTL,E.P

Prokuradór Jerál Repúblika, Alfonso Lopes. Foto/Hatutan.com

Projetu instalasaun Set-top Box/dexodificador RTTL,E.P ho nia kustu $900,000.00, deskonfia Ministru Asuntu Parlamentár no Komunikasaun Sosiál (MAPKOMS), Francisco Martins da Costa  Pereira Jerónimo, nudár mós Prezidente Federasaun Futeból Timor Leste (FFTL) estabelese kontratu adjudikasaun direta ho empreza   DILI ETERNAL INNOVATION INFORMATION, Lda,  sósiu husi Melánia da Silva Fernandes Capela nudár Sekretaria iha Gabinete Prezidente FFTL.  

Prosesu ba kazu ne’e sei iha ona tramitasaun ne’ebé daudaun lao hela, maka primeiru liuhusi ofisiál sentrál ne’ebé sempre atende, segundu distribuisaun ba Prokuradór titulár no halo númeru sistema (NUC).

“Bainhira CAC remete ona ba MP maka hotu-hotu tenke tuir tramitasaun prosesuál hodi halo distribuisaun ba prokuradór ne’ebé iha, maibé buat hotu tenke tuir dalan hodi respeita legalidade no ami simu ona no nia dalan maka labele rai maibé hodi haree, analiza, investiga no sei deside delega ba CAC maka kontinua halo investigasaun ka MP liu husi Prokuradór titulár maka sei halo, maibé buat hotu tenke tuir dalan. Iha prosesu investigasaun ita labele ko’alia arbiru,” Prokuradór Jerál Republika (PJR), Alfonso Lopes ba Hatutan.com bainhira partisipa iha komemorasaun désimu segundu aniversáriu CAC no lansamentu Plataforma online kona-bá deklarasaun rendimentu no interese ne’ebé hala’o iha salaun CNE, Tersa (22/02/2022).

Notísia iha Relasaun: AJAR Husu CAC ho MP Sériu Investiga Projetu Set-top Box RTTL,E.P

Bainhira kazu ne’e distribui ona ba prokuradór titular maka sei responsabiliza to’o prosesu hotu inklui prosesu investigasaun.

Antes ne’e, Komisaun Anti Korrupsaun (CAC, sigla portugés) submete ona prosesu investigasaun projetu Set-top Box/dexodificador Rádiu Televizaun Timor Leste, Empreza Públiku (RTTL,E.P)  ba Ministériu Públiku (MP) iha fulan Dezembru 2021.

Dokumentu komprovativu (Certidão do Registo Comercial) hosi SERVE,I.P  ne’ebé Hatutan.com asesu hatudu katak empreza DILI ENTERNAL INNOVATION INFORMATION, Lda, nudár sósiu ka shares husi Fan Yuanxiang, natural Hunan-Xina ho nasionalidade Xina no Melánia da Silva Fernandes Capela, timoroan ne’ebé hala’o mós serbisu loron-loron nian hanesan  FFTL.

Notísia iha Relasaun: Akadémiku Husu MP Labele “Budu” Kazu Set-top Box RTTL,E.P

Iha Certidão do Registo Comercial hosi SERVE,I.P  hatudu shares ka kuota ba empreza DILI ENTERNAL INNOVATION INFORMATION, Lda, nia kompozisaun, hanesan Fan Yuanxiang iha sósiu ka kuota 60% ($6,000.00) no Melánia da Silva Fernandes Capela iha 40% ($4,000.00) husi total Kapitál Sósiu $10,000.00. 

Tuir Estatutu DILI ENTERNAL INNOVATION INFORMATION, Lda kona-bá Kontratu Konstitutivu, Kuota Limitada ba Sosiedade, iha artigu 4 (Kapitál Sosiál)  hateten, kapitál sosiál ho inisiál integra ba osan no depozita ona ho valór nominal $10,000.00 ba nain husi empreza DILI ENTERNAL INNOVATION INFORMATION, Lda ne’ebé reprezenta kuota hanesan tuir mai:

Iha Orsamentu Jerál Estadu tinan fiskál  2021, MAPKOMS hetan rubrika transferénsia publika ho montante $3,093,528.00 no husi orsamentu ne’e inklui ona osan $900,000.00 hodi finansia ba projetu  instalasaun Set-top Box/dexodificador RTTL,E.P  hamutuk 30.000 (rihun tolu nulu) ba komunidade iha Munisípiu Dili, Liquiça, Ermera ho Manatuto.

Notísia iha Relasaun: Direitu Bá Resposta Husi MAPKOMS Kona-bá Projetu Intalasaun Set-top Box RTTL,E.P

 Jornalista: Carmelita Isaac