Hatutan.com, (05 Jullu 2022), Díli—Tribunál Distritál Díli (TDD), Tersa (05/07/2022), kontinua hala’o julgamentu bá kazu eis-koordenadór merenda eskolár Postu Administrativu Ataúro, arguidu IS, bá krime abuzu konfiansa agravadu no administrasaun danoza relasiona ho konstrusaun armazén foos iha tinan 2018 no motorizada eskolár inklui mobiliáriu ne’ebé Ministériu Edukasaun (ME) oferese bá arguidu.

Lee Mós : Kazu Eis Diretór Merenda Eskolár, Sasin Utiliza Sala Eskola Hodi Rai Foos

Tribunál Distritál Dili (TDD). Foto/Hatutan.com

Iha julgamentu kontinuasaun ne’e, funsionáriu Komisaun Anti-Korrupsaun (CAC, sigla portugés) Domingos Lopes ne’ebé iha tempu ne’ebá hanesan investigadór deklara simu keixa ka informasaun husi komunidade no laiha mandadu buska no apreensaun bá sasán ne’ebé arguidu uza tanba ne’e CAC halo de’it identifikasaun.

Maske CAC konsege hetan motór iha ema fa’an ikan fatin, tanba ne’e husu bá arguidu atu lori bá hatama iha Ministériu Edukasaun.

Hafoin rona arguidu Tribunal adia hikas julgamentu bá loron seluk hodi rona alegasaun husi Ministériu Públiku no Advogadu.

Advertisement

Tuir akuzasaun hosi Ministériu Públiku (MP), katak iha tinan 2014 to’o 2018, arguidu selebra kontratu ho Ministériu Edukasaun (ME) númeru Ref. 248/DNRI—IfNWI/2016 ba pozisaun Koordenadór Merenda Eskolár iha Postu Administrativu Ataúro ho saláriu mensál $221.00, tanba ne’e ME fornese fasilidade ba apoiu serbisu hanesan motór ho marka Honda Mega Pro, matrikula 1012 GA, termu entrega kupaun mina, komputadór Desktop I, UPS I, printer HP I, tinta printer unidade 4, surat tahan rim 2 kada periodu trimestrál, armáriu vidru ba arkivu I, armáriu ki’ik ho gaveta l, meza servisu I, kadeira servisu l.

lha fulan-Dezembru 2018, ME hapara kontratu serbisu ba funsionáriu kontratadu hamutuk 273, inklui arguidu liu hosi Ministeriál Nú 14/GMEJD[XlV2018. Maske nune’e, hahú husi fulan-Dezembru 2018 to’o fulan-Juñu 2020, arguidu Ia entrega fila fasilidade hirak-ne’e ba ME, maibé arguidu rai nafatin sasán hirak ne’e iha ninia uma.

Alende ne’e, arguidu utiliza komputadór, printer no tinta printer, meza no kadeira serbisu nian hodi imprime matéria bá ninia privadu no família nia interese.

Lee Mós : Kazu Eis Diretór Merenda Eskolár, Sasin Haruka Koordena ho Autoridade Lokál

Iha 2018, arguidu hanesan funsionáriu kontratadu ba Ajente Administrasaun Públika, halo proposta konstrusaun armazén merenda eskolár iha Postu Administrativu Ataúro utiliza ME ba iha Rotary Club of Moruya (IRCM) iha Austrália ho apoiu osan dolar Austrália $14.250.00, ekivalente ho dolar amérikanu $10.241,50.

Advertisement

Rezultadu hosi proposta ne’e, arguidu mak jere rasik hodi harii konstrusaun armazén ho medida naruk metru 12, Iuan metru 6 no as metru 3 iha arguidu nia pai rasik nia kintál-laran, ho totál osan ne’ebé fundasaun IRCM transfere mai iha testemuña BH nia konta bankária iha ANZ Díli no entrega ba arguidu ho montante AuS$14.250.00, ekivalente ho US$10.241,50.

Arguidu aproveita oportunidade no konfiansa ne’ebé IRCM fó, tanba funsaun ne’ebé nia okupa iha momentu faktu ne’e akontese no arguidu hatene katak, apoiu osan ho montante $10.241,50 ne’e la’ós pertense ba nia, maibé arguidu jere no utiliza osan ne’e tuir ninia interese hodi fó benefísiu ba nia aan.

Arguidu hatene katak, fasilidade ne’ebé ME entrega ba arguidu liu hosi Diresaun Nasionál Lojístika, tanba funsaun ne’ebé arguidu okupa iha altura ne’ebá nu’udár koordenadór Merenda Eskolár iha Postu Administrativu Ataúro.

Fasilidade hirak ne’e, hetan ona apreensaun hosi Komisaun Anti-Korrupsaun (CAC, sigla portugés), hafoin hetan delegasaun kompeténsia hosi Ministériu Públiku hodi halo investigasaun ba arguidu no ekipamentu hirak ne’e agora CAC entrega ona ba MP.

Ho hahalok arguidu nian, MP akuza arguidu ba pratika krime rua mak hanesan abuzu konfiansa agravadu, administrasaun danoza ne’ebé previstu iha artigu 257, 274 hosi kódigu penál TL.

Advertisement

Audiénsia julgamentu ne’e prezide hosi juis koletivu Alvaro Maria Freitas, José Gonçalves, Argentino Nunes, MP reprezenta hosi Prokuradór Rogério Viegas no arguidu hetan asisténsia legál hosi advogadu privadu Tomazia Umbelina Magno no Xisto Pedroso.

Jornalista : Carmelita Isaac