Hatutan.com, (09 Marsu 2022), Díli—Consumer Internacional admite ona Associação TANE Konsumidór nu’udár membru assosiadu ba organizasaun ne´e nian.

Prezidente ATKTL, António Ramos da Silva. Foto/Hatutan.com.

Organizasaun internasionál ne´ebé halibur Assosiasaun no federasaun ba defeza konsumidór iha mundu tomak ne´e hato’o ona karta ofisiál ba Prezidente Diresaun Assosiasaun Tane Konsumidór, António Ramos da Silva, iha loron Segunda 07 Marsu 2022.

Notisia iha Relasaun:TANE Konsumidór Preokupa ho Folin Convustível iha Merkadu “Karun”

“Oportunidade hodi iha ligasaun ho Assosiasaun no federasaun ba defeza konsumidór nian iha mundu tomak. Hosi sorin seluk, hanesan biban ba TANE Konsumidór hodi hasa’e tán kbiit no hetan asesu ba informasaun no apreende ba esperiénsia ba membru sira Consumers Internacional nian,” Hatutan.com sita deklarasaun Prezidente TANE Konsumidór, António Ramos da Silva liu hosi komunikadu.

Ho sai membru Consumers Internacional, TANE Konsumidór nia lian la’ós rona de’it iha Timor-Leste maibé rona mós iha mundu liu hosi rede bóot ida ne´e tanba Consumers Internacional mós nu’udár organizasaun reprezenta sosiedade sivíl ne´ebé sai hanesan membru konsultivu ba ONU, ba WTO/OMC no servisu direta ho UNCTAD.

TANE Konsumidór hanesan asosiasaun ida ne’ebé defende konsumidór, privadu, sen fin lukrativa, harii iha fulan Fevereiru tinan 2018. Organizasaun independente no sem fins politiku ka relijiozu.

Asosiasaun rejista no sertidaun númeru 12/2018 no sertivika ho númeru 7/DNRN-MJ/I/2018.

Karta Ofisiál hosi Consumer Internacional.

Misaun hosi TANE Konsumidór Defende direitu no lejitimu interese konsumidór sira hotu iha Timor Leste, kontribui atu rezolve sira nia problema konsumu nian no ajuda sira atu ezerse direitu fundamentál sira, asesu ba informasaun, ba kualidade sasán sira, ba edukasaun, justisa no direitu ba saúde no seguransa.

Valór sira ne’ebé norteia ka guia TANE maka Independénsia, Rigór ho Prosimidade.

Independensia, atu bele foti pozisaun kona-bá asuntu sira oi-oin sem presaun ou limitasaun, TANE Konsumidór independente hosi podér polítiku, ekonómiku no entidade relijioza sira.

Finansia hosi nia asosiadu sira, hosi reseitas ne’ebé hetan hosi servisu sira no publikasaun sira no hosi projetu ne’ebé sei hetan finansiamentu públiku ih kontextu konkursu sira ne’ebé transparente.

Rigór, TANE Konsumidór hakarak sai referénsia nasionál ida ba konsumidór sira no ba entidade públika no privada sira hotu. Atu hari reputasaun ne’ebé ho konfiansa, iha nia servisu hatur iha prinsípiu ba kualidade, integridade no profesionalizmu iha nia órgaun sosiál sira no ekuipa téknika sira.

Proximidade, TANE konsumidór servisu permanente atu hatán ba nesesidade Konsumidór sira nian. Nune’e alénde halo promosaun ba relasaun proximidade nian ho konsumidór, buka mós servisu hamutuk ho interlocutor oioin – meius komunikasaun sosiál, podér politiku sira, entidade públika ho privada, entidade relijioza ho sira seluk.

Jornalista: Carmelita Isaac