Hatutan.com, (24 Fevereiru 2022), Díli—Comissão Nacionál ba Eleição (CNE) realiza serimónia kulturál, hamutuk ho kandidadtu Prezidente Repúblika Periudu 2022 to’o 2027 na’in 16, halo juramentu iha lia-na’in sira nia oin kompromete la hatún-malu durante periúdu kampaña.

Serimónia kulturál ba juramentu entre kandidatu Prezidente Repúblika Periudu 2022-2027 atu la hatun malu durante kampaña. Foto/Hatutan.

Perante juramentu ne’e, lia-na’in mós hamulak ba matebian, bei-ala, uma-lisan atu bele fó matak malirin no kbiit natureza ba kandidatu sira atu bele realiza kampaña ho di’ak no susesu to’o prosesu votasaun.

Notisia iha Relasaun:Kalendáriu Eleitorál ba Eleisaun Prezidente Repúblika 2022

“Serimónia rituál ne’e lia-na’in sira hamulak hodi husu matak malirin no kbiit natureza ba kandidatu sira atu bele realiza sira nia kampaña ho di’ak, laiha lia-fuan kro’at no insulta-malu, maibé respeita-malu hanesan Timor-oan nune’e bele tau a’as interese nasaun liu interese pesoál,” Komisária CNE, Odete Maria Belo hatetn, iha salaun CNE, Kinta (24/02/2022).

Advertisement

Objetivu hosi serimónia kulturál ne’e hodi garante mós pás no estabilidade iha eleisaun, sei hato’o ba kandidatura sira iha loron 28 fulan ne’e ho asina paktu eleisaun pasífika entre kandidatu sira hodi sai kompromisiu politiku no tara-bandu entre kandidatu, bainhira la halo tuir maka iha sansaun kulturál.

Lia-na’in Eugénio Sarmento ne’ebé prezide serimónia kulturál ne’e, esplika formalmente kandidatu sira halo ona juramentu liu hosi mama-fatin no tua ne’ebé sira hemu, signifika kandidatu tenki respeita-malu no labele buka atu hatun-malu, dezintendimentu hosi lia-fuan kro’at.

Jornalista: Carmelita Isaac

Advertisement