Hatutan.com, (14 Marsu 2022), Díli—Polísia Nasionál Timor-Leste (PNTL), liuhosi Portavós Komandu Jerál, Superintendente Xefe Polísia, Armando Monteiro konfirma katak, apoiante hosi kandidatu Prezidente Repúblika (PR) Francisco Guterres Lú Olo, ho naran João Ximenes ne’ebé sai vítima durante partisipa iha kampaña eleitóral iha aldeia Darasula, Suku Gari Uai, Postu Administrativu Baucau-Vila ne’e, mate duni iha kampaña laran.

Mate isin tau hela iha mortuáriu Ospitál Referal Eduardo Ximenes, Baucau. Foto/Espesiál

“Iha prosesu kampaña nia laran, ne’ebé ita sei iha koordenasaun, komunikasaun ho ekipa susesu, no órgaun das eleições CNE ho STAE iha Baucau. Agora daudaun kontinua nafatin koordenasaun komunikasaun,” Portavós Komandu Jerál PNTL, Superintendente Xefe Polísia, Armando Monteiro informa ba jornalista liuhosi konferénsia imprensa iha Kuartél Jerál, Caicoli, Segunda (14/03/2022).

Notisia iha Relasaun:Na’in-ida Mate iha Ámbitu Kampaña Lú Olo iha Baucau

Alende kazu asaltu ofensa integridade fízika simples no agravadu, hodi rezulta vítima João Ximenes fatal ka mate, iha mós vítima ida ho inisiál LR hetan kanek grave no oras-ne’e transporta ona hosi Ospitál Referál Baucau, mai halo asisténsia saúde iha Hospitál Nacionál Guido Valadáres (HNGV), inklui na’in-rua seluk hetan mós kanek-kmaan.

Komandante Armando esplika, bainhira kazu ne’e tama iha krime eleitóral, PNTL sei kanaliza nia prosesu sira ba órgaun eleitóral rua hanesan Comissão Nacional das Eleições (CNE), Sekretariadu Tékniku ba Administrasaun Eleitóral (STAE). Maibé, bainhira krime públiku, normalmente PNTL mak sei no halo prosesu.

Maske nune’e, oras-ne’e, Komandu PNTL Munisípiu Baucau halo ona mós identifikasaun ba ema na’in-tolu, tanba deskonfia involve iha kazu ofensa integridade agravadu ida-ne’e.

“Tanba ne’e, ita akompaña nafatin, ami mós atualiza, nune’e ita hotu hatene motivu hosi akontesimentu ida-ne’e. Hein investigasaun la’o daudaun hela no finalidade, investigasaun ida ne’e ita sei suspeita ba ema ne’ebé mak agora daudaun PNTL identifika iha prosesu ida ne’e,” Komandante Armando hateten tán.

Relasiona ho kazu ne’e, Hatutan.com tenta konfirma ho ekipa susesu sira kandidatu PR Lú Olo nian iha Otél Luz Clarita, Díli, maibé okupadu hotu.

Komandu Jerál PNTL, liuhosi portavós husu kontribuisaun hosi apoiante no militante sira kandidatu PR na’in-16 nian inklui CNE ho STAE rasik atu koolabora nafatin ho PNTL.     

Durante kampaña eleitóral hosi kandidatu PR sira, PNTL rejista kazu insidente ne’ebé mak akontese hamutuk rua  no kazu asidente tráfegu grave iha totál tolu ne’ebé mak akontese iha territóriu nasionál.

Iha loron 12 fulan Marsu 2022, Kampaña Kandidatu Prezidente Repúblika (PR) períodu 2022-2027, Francisco Guterres Lú Olo nian iha Munisípiu Baucau, termina ho insidente tuda-malu hodi rezulta apoiante ida mate ka lakon vida.

Kampaña ne’ebé halibur maiória simpatizante no militante FRETILIN hosi Postu Administrativu  neen (6); Baucau Vila, Baguia, Laga, Quilicai, Venilale ho Vemasse ne’e konsentra iha Kampu Komemorasaun 28 Novembru 2021  iha Aldeia Darasula, Suku Gariuai, Postu Administrativu Baucau, Munisípiu Baucau.

Tuir informasaun ne’ebé Hatutan.com asesu hosi abitante balun iha Aldeia Darasula katak bainhira kampaña atu hahú no Kandidatu Prezidente Repúblika Francisco Guterres Lú Olo husik manu-falur (pombu) semo mosu kedan ona dezintendimentu iha massa nia-leet no barullu iha palku oin.

Fontes ne’e fó-sasin katak, bainhira komisaun organizadora haree situasaun ne’e, sira hahú halo alerta iha palku leten atu hotu-hotu kalma no mantein trankuilidade.

Maibé, hosi palku okos hakilar  dehan laiha problema tanba sira hakarak duni manu-falur ne’ebé kandidatu PR Lú Olo husik ne’e atu sira kaer ba haki’ak.

“Teki-teki de’it, purvolta tuku 14:00 Otl, atu ba tuku 15:00 Otl, massa sira duni-malu, tuku-malu no balun halai namkari, ema deskoñesidu lansa tuda ho fatuk mai massa nia-leet, maibé kampaña la’o nafatin. To’o kampaña hotu no kandidatu PR Lú Olo ho nia kometiva sira fila ona, maka ami rona fali dehan, maluk Buibau oan ida mak sai vitima no avakua urjente  ba Ospitál Referál  Eduardo Ximenes, Baucau, mas la konsege salva nia vida,” fontes ne’e informa.

Bainhira situasaun barullu ne’e akontese, halo ema balun trauma no ta’uk hodi halai soe hela sira-nia motór. Nune’e, iha rai atu kalan daudaun, maka joventude sira Aldeia Darasula nian ajuda fali hodi buka fasilita motór na’in mai foti.

Infomasaun seluk hosi fontes konfirmadu iha Ospitál Referál Eduardo Ximenes, Baucau konfirma katak, vítima joven ida ho idade 21 hosi Buibau ne’e nia isin-mate sei tau hela iha Motuáriu laran hodi hein família sira atu bele lori ba halo prosesu funerál.

Jornalista: Rogério Pereira Cárceres