Hatutan.com, (09 Marsu 2022), Díli—Kandidata independente ba Prezidente Repúblika períudu 2022-2027 Angela Freitas promete atu hakotu krize polítika iha Timor-Leste (TL) hodi fo-hanoin ba Governu atu halo diversifikasaun ba ekonomia povu maubere nian liu hosi kréditu ba moris di’ak.

Kandidata Angela Freitas hala’o mini kampaña ho tipu diálogu ne’ebé hala’o iha sede nasionál, bairru Formoza, Díli, Kuarta (09/03/2022). Foto/Hatutan.com.

Programa ne’e tanba Angela Freitas konsidera povu mak na’in ba ukun an, tanba ne’e povu iha direitu atu moris ho livre no independentemente tuir konstituisaun haruka no Prezidente Repúblika hanesan Xefe Estadu iha obrigasaun atu servisu hamutuk ho órgaun Estadu sira seluk hodi hadi’a povu nia moris.

Notisia iha Relasaun:Anacleto Bento Promete Asuntu Importante Lima

“Diversifikasaun ekonomia ne’e ita presija atu tau mós atensaun ba meiu ambiente hodi investe iha seitór turizmu, fó kréditu ba povu atu sira bele iha kapitál hodi hahú halo produsaun iha seitór agrikultura atu ita labele moris dependénsia ba produtu importadu,” Angela Freitas hateten ba apoiante sira iha mini diálogu ne’ebé hala’o iha sede nasionál, bairru Formoza, Díli, Kuarta (09/03/2022).

Sei servisu hamutuk ho Governu no Parlamentu Nasionál atu iha politika no estratejia di’ak hodi kontrola jestaun finanseira públika tanba durante tinan 20 Timor Leste ukun an, Orsamentu Jerál Estadu kada tinan ba bens de servisu aas maibé ba bem estar povu nian tun.

Ezemplu konkretu mak orsamentu ba iha seitór edukasaun no agrikultura kada tinan menus hosi 10% enkuantu Governu ezekuta de’it orsamentu Estadu atu benefisia individu ka grupu balun no povu nafatin moris iha ki’ak no mukit nian laran.

“Hanesan Xefe Estadu sei fó atensaun sériu ba OJE no karik la afavór ba povu nia moris sei veta,” nia subliña.

Servisu Prezidente Repúblika iha interdependénsia ho órgaun Estadu sira seluk, nune’e Prezidente Republika nia knaar ida maka superviziona no regulariza instituisaun sira hotu-hotu nia servisu maibé respeita separasaun de podér hodi garante demokratizasaun iha Timor-Leste.

Kampaña ho tipu diálogu ne’e hetan observasaun hosi observadór nasionál no internasionál inklui hetan seguransa hosi Polísia Nasionál Timor Leste (PNTL).

Jornalista: Vito Salvadór