Hatutan.com, (08 Marsu 2022), Díli—Kandidatu Prezidente Repúblika (PR), Martinho Germano da Silva Gusmão, hala’o kampaña ho programa prioridade tolu (2022-2027) ne’ebé sei implementa durante ukun tinan lima, bainhira eleitu nu’udár Prezidente Repúblika.

Kandidatu Prezidente Repúblika (PR), Martinho Germano da Silva Gusmão, hala’o kampaña iha Munisípiu Manatuto. Domingu (06/03/2022). Foto/Ekipa Susesu Kandidatu númeru 13.

Progarama prioridade tolu ne’e, primeiru maka revolusaun ba edukasaun, segundu hatuur justisa iha nia fatin, no terseiru maka hametin kultura dame ba povu tomak.

Notisia iha Relasaun:Martinho Gusmão Deklara Ofisialmente Kandidata an ba Prezidente Repúblika 2022-2027

Iha programa revolusaun ba edukasaun, buat ne’ebé sai alvu importante liu maka mestre sira, tanba edukasaun tenke iha kualidade liu hosi sustentabilidade no tratamentu moris ne’ebé dignu ba mestre sira.

“Sira ne’ebé hanorin kleur ona, vensimentu tenke sa’e ba $500, $600, ka $700. Sira labele kontinua moris ho $300,” Martinho Gusmão, hateten ba Hatutan.com via telefónika.

Politika hasa’e saláriu ba manorin-na’in sira ne’e, bá de’it mestre no mestra sira ne’ebé sei hanorin iha eskola sira ensinu báziku filiál no ensinu báziku sentrál nian, tanba eskola sira ho nível universidade, sira tama ona iha rejíme ketak.

Programa ida ne’e mós Martinho Gusmão hakarak kria lei pensaun ida ba mestre sira, ka funsionáriu públiku sira ne’ebé idade avansadu ona, sira tenke iha pensaun nune’e sira hatene ona katak, bainhira idade tama ona ba reforma, sira iha ona garantia ruma.

Liu tán ida ne’e, sei hala’o formasaun ba manorin-na’in sira atu sira bele iha kualidade nu’udár moris materiál nian, maibé sira mós iha kualidade iha vida intelektuál no akadémiku.

Nune’e, bainhira nia sai duni PR iha periúdu 2022 to’o 20127, nia hakarak Orsamentu Jerál Estadu (OJE) nian ne’ebé aprova kada tinan, orsamentu ho 10% atribui ba iha setór edukasaun.

Nia mesniona kona-bá konkordata entre Estadu Santa-Se ho Estadu Timor-Leste nian katak, importante liu maka edukasaun. Iha Igreja Katólika, iha liafuan rua, ida edukasaun Katólika no ida eskola Katólika.

Eskola Katólika ne’e iha parókia balun mós Padre sira hari’i hotu eskola Katólika, maibé, iha Parókia balun, laiha eskola Katólika.

Kandidatu Prezidente Repúblika (PR), Martinho Germano da Silva Gusmão, hala’o kampaña iha Munisípiu Manatuto. Domingu (06/03/2022). Foto/Ekipa Susesu Kandidatu númeru 13.

Maibé, komunidade sira nia oan ne’ebé simu sakamentu Batizmu sai sarani ne’e maiória mak eskola iha eskola públika. Nune’e, hirak ne’e hotu, tenke iha edukasaun Katólika, la’ós eskola Katólia.

“Ida ne’e ha’u sei luta maka’as ho Igreja Katólika atu suporta oinsá mak edukasaun ne’e sai hanesan buat ida xáve,” Martinho Gusmão hateten tán.

Iha programa segundu maka, sei hatuur fila-fali justisa iha ninia fatin. Hosi programa ida ne’e, Martinho Gusmão haree katak, lei inan konstituisaun Repúblika Demokrátika Timor-Leste (RDTL), laiha problema. Maibé, fatór ne’ebé ba hamosu problema ne’e maka ema ne’ebé kaer ukun, la lee didi’ak lei sira iha konstituisaun RDTL.

Programa Terseiru maka, hari’i kultura dame nian. Vizaun politika ida-ne’e mosu tanba, Martinho Gusmão haree katak, durante tinan 20-resin nia laran ona, ema barak koko ho violénsia ka problema oioin.

Vizaun polítika ida ne’e mosu tanba Martinho Gusmão iha ona esperiénsia rasik, oinsá mak lori dame bá líder másimu sira, ezemplu boot ida maka, fórum Maubisse I, II, no III.

“Ha’u nia tugas atu lori dame. Neduni, hosi kandidatu hotu-hotu, ha’u iha esperiénsia ne’ebé mantap tebe-tebes, atu bele lídera prosesu atu oinsá mak lider katuas sira bele ajuda ita lider foinsa’e sira atu lori ba dalan loos nian,” Martinho Gusmão informa tán.

Kandidatu ho numeru sorteiu 13 ne’e hetan apoiu hosi Partidu Unidade Dezenvolvimentu Demokratiku (PUDD).

Jornalista: Rogério Pereira Cárceres