Hatutan.com, (28 Fevereiru 2022), Díli-Atu kampaña eleitorál eleisaun  Prezidente  Repúblika 2022-2027 la’o ho susesu no kumpre ba norma legal sira kampaña nian,  Segunda (28/02/2022), Komisaun Nasionál ba Eleisaun (CNE) realiza atividade Paktu Eleisaun Pasífiku hamutuk ho kandidatura prezidente repúblika sira asina paktu eleisaun pasífiku ho haktuir ba kostume no lisan timoroan sira nian.

Notísia iha Relasaun: CNE Define Programa “Haree Manu-Aten” To’o Debate Públiku

Kadidatu Prezidente Repúblika 2022-2027 asina Paktu Eleisaun Pasifiku, 28 Fevereiru 2022. Foto/Hatutan.com

Tema ba Paktu Eleisaun Pasífiku ne’e mak “Ho kultura ita promove pás no unidade iha eleisaun prezidente 2022”. Paktu Eleisaun Pasífiku ne’e CNE realiza tamba servisu hamutuk ho Sekretáriu Estadu Arte no Kultura (SEAK) liu husi lia nain sira organiza ona iha kada munisípiu hamutuk ho veteranu sira ho objetivu atu husu matak-malirin ba kandidatura prezidente repúblika períodu 2022-2027, atu durante kampaña eleisaun prezidensiál, kandidatu sira hamutuk ho militante, apoiante no simpatizante sira nafatin garante pás no estabilidade tuir kompromisu polítiku ne’ebé kada kandidatura sira iha.

Husi kandidatu 16 ne’ebé iha, kandidatu 12 mak marka prezensa hanesan Hermens da Rosa Correia Barros ho númeru sorteiu 2, Maria Angela Freitas da Silva (3), Rogério Tiago Lobato (4), Anacleto Bento Pereira (5), Francisco Guterres Lú-Olo (6), Milena Pires (7), Lere Anan Timur (8), Constancio Pinto (11), Virgílio Guterres (12), Martinho Gusmão (13), José Ramos Horta (14) no Felisberto Araujo Duarte (15).

Advertisement

Enkuantu kandidatu seluk mak la marka prezensa mak hanesan Isabel da Costa Ferreira (1), Armanda Berta dos Santos (9), Benedito da Silva (10) no Mariano Assanami Sabino Lopes (16).

Durante serimónia ritual ba Paktu Eleisaun Pasífiku ne’e, reprezentante lia-nain sira husi munisípiu 12 inklui RAEOA hamulak ho lian materna munisípiu ida-idak nian no hafoin hamulak lia-nain sira oferese bee-lulik ne’ebé kuru iha bee matan usi uma lisan Lakoto ba kandidatura sira, hafoin ne’e kandidatura sira mós hemu tua ttradisionálál ne’ebé lia-nain sira prepara.

Lia nain sira husi Munisípiu 12 inklui RAEOA hala’o serímonia kultura hodi husu matak-malirin ba bei’ala sira iha kampaña to’o eleisaun PR 2022-2027. Foto/Hatutan.com

Hafoin serimónia kultural ne’e, kandidatura sira halo kompromisu liu husi deklarasaun paktu Eleisaun pasífiku ne’ebé lee husi Komisária CNE Odete Maria Belo, ho pontu hirak tuir mai:

1. Kumpre konstituisaun, lei dekretu governu ba iha eleisaun prezidente tinan 2022.
2. Respeita prinsípiu universal kampaña eleitorál.
3. Promove direitu umanu no igualdade jéneru nudár fundasaun hodi haburas demokrasia.
4. Konsidera no promove diálogu nudár meius atu hametin pás, estabilidade no unidade nasional ba dezenvolve nasaun Timor Leste.
5. Prontu simu rezultadu eleisaun no fó apoiu ba kandidatu ne’ebé eleitu nudár Prezidente Repúblika Timor Leste ba períodu 2022-2027.

Hafoin lee deklarasaun ne’e, kandidatu nain-12 no reprezentante kandidatu na’in-haat (4) seluk kontinua ho asinatura paktu eleisaun pasífiku no prezidente CN no komisáriu/a sira mak sai sasin hamutuk ho lia nain no reprezentante partidu polítiku no mós entidade sivíl no militár sira ne’ebé prezente.

Prezidente CNE, José Agustino Belo ba jornalista sira iha salaun Laline-Larigutu, CNE, hateten paktu unidade nasionál ne’e nudár jestu  responsabilidade ne’ebé kandidatura sira hatudu ba povu tomak katak mezmu iha diferensa ideia, maibé sira nafatin iha vizaun no misaun ida atu sai ezemplu pás no unidade ba eleitór tomak.

“Husu ba sira atu kumpre sira-nia promesa no sai ezemplu ba sosiedade,” José Agustino Belo hateten.

Jornalista: Vito Salvador

Advertisement