Hatutan.com (28 Fevereiru 2022), Díli—Provedoria Direitu Umanu no Justisa (PDHJ), Komisaun Funsaun Públika (KFP), Comissão Anti Corrupção (CAC) no Inspesaun Jerál Estadu (IJE) ofisialmente husik ekipa fiskalizadór na’in 28 ba terrenu hodi hala’o monitorizasaun no fiskalizasaun ba kampaña Eleisaun Prezidénsiál 2022-2027.

Serimónia Despedida ba ekipa fiskalizadór kampaña Prezidensiál 2022-2027. Foto/CAC.

Komisariu CAC Sérgio Hornai hateten, ekipa fiskalizadór hirak ne’e sei tulun liu tán  órgaun  kontrollu sira seluk, liu-liu CAC rásik atu bele halo deskobrimentu kona-bá infrasaun sira ne’ebé bele akontese durante kampaña eleitorál iha terrenu, liu-liu aktus krime korrupsaun sira hanesan pekulatu de uzu, abuzu podér, tantu funsionáriu instituisaun balun nia reprezentante sira ne’ebé hola parte iha komisiu kampaña ne’e la kumpre ba regras no lei ne’ebé iha.

“Ho monitorizasaun ida ne’e, Sira bele deskobre buat ruma no relata mai órgaun kontrolu hanesan CAC no órgaun kontrollu sira seluk, nune’e Ita bele halo melloramentu ba Ita nia sistema sira, liu liu partidu polítiku ho nia apoiante sira bele tau konsiderasaun hodi garante prosesu eleisaun ida di’ak no demokrátiku,” Komisáriu Sérgio Hornai hateten iha edifísiu PDHJ, Caicoli, Segunda (28/02/2022).

Monitorizasaun iha prosesu kampaña no eleisaun ne’e sei akompaña mós husi ekipa CAC rásik ne’ebé sei hala’o atividade monitorizasaun absoluta durante kampaña, prosesu votasaun nian to’o ba apuramentu finál tuir tempu ne’ebé temi iha kalendáriu publikasaun CNE nian.

Advertisement

CAC nu’udár órgaun polisiál espesializada ba krime korrupsaun ninian iha kualkér momentu sei tun ba fatin kampaña, eleisaun no apuramentu finál atu akompaña halo observasaun no fiskalizasaun ba aktus eleitorál sira.

Partisipa iha atividade ne’e, Komisáriu CAC Sérgio Hornai, líder másimu Provedoria Direitu Umanu no Justisa (PDHJ), Inspetór Jerál Estadu (IJE), reprezentante Komisaun Funsaun Públika (KFP) no ekipa fiskalizadór sira.

Jornalista: Vito Salvadór

Advertisement