Hatutan.com, (09 Marsu 2023), Díli– Komisaun Nasionál bá Eleisaun (CNE, sigla portugés), halo ezersísiu hodi tama-sai oda-matan konvisaun relijioza sira nian hodi husu kontribuisaun ierarkia konfisaun sira nia tulun haklaken pás iha tempu sira eleisaun parlamentár ne’ebé atu halo iha loron 21 fulan-Maiu 2023.

Lee Mós : Prezidente Repúblika Husu STAE-CNE Profisionál no Labele Monu Bá Manipulasaun Polítika

CNE halo enkontru ho Komunidade Musulmanu Timor-Leste iha Meskita An-nur, Díli, Kinta (9/3/2023). Foto/Elio dos Santos da Costa

Iha loron hirak liubá estrutura CNE halo audiénsia ona ho Arsebispu Metropolitana Arkidioseze Díli, Mgr. Virgílio Cardeal do Carmo da Silva, SDB  iha Kamara Ekleziástika no iha parte seluk mós halo audiénsia ho Enkarregadu Santa Sé iha Timor-Leste,  Mgr. Marco Sprize iha embaixada Santa Sé nian iha Dili hodi husu orasaun no husu apoiu atu bele haklaken pás  bá sarani sira hotu iha ámbitu eleisaun parlamentár mai ne’e.

Iha Kinta (09/3/2023), CNE ne’ebé lidera hosi José Agostinho Belo ho estrutura hakat to’o iha Meskita An-nur iha Kampu Alor, Díli, hodi hasoru malu ho reprezentante komunidade musulmanu hodi kontinua halo konsultasaun no husu apoiu hosi sarani musulmanu bá eleisaun parlamentár ho pás.

Advertisement

“Ami sente dehan antes tama bá eleisaun hakarak husu atu situasaun hotu tenke la’o ho di’ak liu-liu kona-bá pás no estabilidade. Igreja Katólika no parte musulmanu ho konfisaun relijioza sira hotu iha papél atu tulun malu harii pás iha ámbitu eleisaun parlamentár ne’e,”  Prezidente CNE, José Agostinho Belo hateten.

CNE husu atu sarani sira hosi konfisaun relijiozu hotu ne’ebé eziste iha Timor-Leste atu reza bá Timor-Leste nia eleisaun parlamentár ne’e la’ó ho pás no trankuilidade. Nune’e, povu nafatin iha liberdade ezerse ninia direitu polítika ho livre, hakmatek no pás.

Reprezentante Komunidade Musulmanu. Foto/Elio dos Santos da Costa

Prezidente Konsellu Kurador Fundasaun Meskita  An-nur, H. Abaullah Saig Sagran, orgullu tebes tanba foin ba dahuluk CNE  vizita Meskita An-nur  no tau konsiderasaun bá musulmanu sira nia kontribuisaun.

“Ami rona buat barak hosi  Prezidente CNE ho buat sira ne’e ami sente katak ami bele partisipa ho ami nia kbiit atu oinsá ita hotu kaer-liman hamutuk iha prosesu demokrasia ida-ne’e la’o ho pás,” Abaullah Saig Sagran hateten.

Nia dehan, musulmanu hanesan komunidade minoritáriu iha Timor-Leste maibé sente kontenti tebes tanba pratika toleránsia konfisaun relijiozu sira di’ak tebes no respeita malu nafatin.

“Ba oin ita kontínua atu hametin tan ita nia relasaun amizade para kria duni pás amizade iha nasaun Timor Leste ne’e,” Abaullah Saig Sagran hateten tan.

Advertisement

Lee Mós : CNE Preparadu Organiza Eleisaun Parlamentár 2023

Jornalista Estajiáriu : Lazaro Pereira Quefi/Dirce Sandra da Costa Gomes

Advertisement