Hatutan.com, (10 Marsu 2022), Díli-Eventu kampaña ba eleisaun prezidensiál no eleisaun jerál nudár momentu ida atu kandidatu prezidente repúblika ho partidu polítiku sira atu aprezenta sira-nia programa ba povu. La’ós tempu atu halo diskursu sira ódiu-malu, tarata-malu, kee-malu hodi soran povu.

Notísia iha Relasaun: Kandidatu PR sira Aprezenta Programa La’ós “Sukit-Malu” ho Krize 2006

Reitór Universidade da Paz (UNPAZ), Adolmando Amaral. Foto/Hatutan.com

Tuir observasaun akademista husi Universidade da Paz (UNPAZ) ho ONG Lalenok Ba Ema Hotu (LEBEH) nian katak iha eventu kampaña ba loron-sia (02-10 Marsu 2022), partidu boot sira ho lider jerasaun tuan sira barak liu mak aproveita kampaña hodi soe-lia ba malu, kee-malu no tarata-malu hodi haluha tiha ensensi loloos husi kampaña nian.    

Reitór  UNPAZ, Adolmando Amaral hateten, povu mak tenke matenek atu  halo analize ba matéria kampaña husi kandidatu prezidente repúblika no liuliu ekipa susesu sira ne’ebé sempre sukit problema antigu hodi la husik pasadu no la hateke ba futura, ida ne’e hatudu momoos katak sira nia kandidatura la prepara an atu sai prezidente republika.

Advertisement

“Timor Leste agora ne’e atu hateke ba oin para depois hetan kandidatura ida ne’ebé iha interese ba povu nia moris,” Reitór UNPAZ, Adolmando Amaral ba Hatutan.com iha nia knar fatin, Dili, Kinta (10/03/2022).

Reitór ne’e hateten, kampaña nudár momentu oportunu atu kandidatu sira ba aprezenta programa hodi konvense povu atu hili nia, la’ós ba halo insulta ba nia maluk lider seluk hodi soran povu no fó terus ba povu, enkuantu nia fila mai moris diak hela no nafatin goja povu nia kosar-been liu husi pensaun oin-oin  ne’ebé Estadu atribui ba nia.

Diretór Ezekutivu LABEH, Cristopher Henry Samson hateten, propaganda eleitorál garantidu iha lei, maibé propaganda eleitorál la’ós atu tarata-malu no la’ós sukit problema ne’ebé liu tiha ona nia tempu.  

Diretór Ezekutivu LABEH, Cristopher Henry Samson. Foto/Hatutan.com

LABEH haree katak kandidatu barak mak la iha programa, maibé sira uza momentu festa demokratiku ida-ne’e hodi kria odiu, vingansa no hamosu tan problema.

 Tuir loloos kandidatura sira uza oportunidade ida-ne’e hodi hametin unidade, kria dame tanba ne’e festa demokrasia no povu ba iha ne’ebá kontente atu partisipa hodi rona programa atu bainhira sira fila hola desizaun atu vota ba se.

 “Iha uma no eskola foin-sa’e sira aprende atu respeita lider rezistensia sira, maibé iha palku polítika, politiku nain sira ataka-malu ne’e hatudu unidade ne’e naksobu,” Cristopher Henry Samson hateten.

Advertisement

Tuir observasaun LABEH nian durante kampaña kandidatu prezidente republika sira balun la fó edukasaun sivíka ba povu no kampaña sira ne’e iha liu tendensia atu hamosu instabilidade nasionál tanba atake-malu iha palku politika, povu kiik mak vitima tanba sira sente katak uainhira lider polítiku ida ataka sira-nia lideransa sira mós sei halo reasaun atu defende ikus mai hamosu disturbu ne’ebé rezulta estragus ba sasán no hamosu vitíma.

Diretór Ezekutivu LABEH ne’e husu atu maske iha palku polítika, lideransa sira insulta-malu maibé jornalista sira tenke promove jornalismu ba paz (peace journalism) tuir kode étika jornalizmu nian hodi garante istabilidade nasionál.  

Jornalista: Vito Salvador

Advertisement