Hatutan.com, (12 Marsu 2022), Díli-Kandidata Prezidente Repúblika ho númeru sorteiu ida (1), Isabel da Costa Ferreira, promete kontinua luta ba dirietu umanu iha Timor-Leste, liuliu ba direitu ho ema difisiensia atu labele hetan diskriminasaun iha sosiedade.

Notísia iha Relasaun: Kampaña iha Baucau, Isabel Ferreira Husu Ba Povu Foti Desizaun Ho Loos

Movimentu Apoiu Inkluzaun Defisiente (MAID) deklara fó apoiu ba Kandidata Prezidente Repúblika 2022-2027, Isabel da Costa Ferreira. Foto/Hatutan.com

Kaben husi Primeiru-Ministru (PM) Taur Matan Ruak ne’e afirma bainhira simu Movimentu Apoiu Inkluzaun Defisiente (MAID) ne’ebé deklara  fó apoiu ba Kandidata Prezidente Repúblika 2022-2027, Isabel da Costa Ferreira iha Casa da Cidadania, Colmera, Díli, Sábadu (12/03/2022).

Isabel da Costa Ferreira, hato’o agradese ba MAID ne’ebé ho voluntariamente apoiu nia kandidatura, tanba ne’e, kompremete atu tane-ás konfiansa ne’ebé iha hodi nafatin luta ba diretu umanu iha Timor-Leste no la bele iha diskriminasaun ba timoroan hotu iha Timor-Leste.

Isabel Ferreira salienta karik eleitu ba Prezidente Repúblika períodu 2022-2027, sei investe maka’as ba família tanba Isabel konsidera família nudár nekleu ki’ik-oan ida ne’ebé prepara fini nasaun nian.

“Familia kuandu la organiza an di’ak maka sosiedade mós sei la moris ho hakmatek,” Isabel Ferreira hateten.

Isabel da Costa Ferreira kompromete mós atu sai prezidente ida besik liu ba povu, besik liu ba família no besik mós ba maluk defisiente sira no ba ema sira lian laiha, atu hamutuk buka solusaun ba problema ne’ebé família no sosiedade ne’e enfrenta. Nune’e, nia hakarak tau prioridade investe iha setór edukasaun ida inkluzivu liutan atu husi ne’e bele kria kondisaun ba família sira bele hetan empregu tuir kbiit no abilidade ne’ebé iha.

“Ha’u la mai buka prezidente, previlejiu ha’u la presija, ha’u hakarak sai prezidente hanesan meius ida de’it atu uza influensia majislatura prezidente nian para ha’u bele hakbesik an ba família iha Timor laran hodi buka solusaun ba problema ne’ebé família hothotu enfrenta,” nia argumenta.

Movimentu Apoiu Inkluzaun Defisiente (MAID) deklara sei fo apoiu ba Isabel da Costa Ferreira tanba konsidera kandidatura ho númeru soreteiu ida (1) ne’e iha vizaun, fuan-boot no empatia ba sosiedade ne’ebé konsidradu vulneravel iha komunidade.

MAID nia desizaun ne’e mai husi esforsu koletivu ida liu husi enkontru regular no avaliasaun ne’ebé ekipa membru MAID sira halo liu husi avaliasaun konjunta ba programa sira ne’ebé kandidatu prezidente republiku períodu 2022-2027 sira aprezenta iha kampaña durante ne’e.

MAID fó apoiu ba Kandidata Prezidente Repúblika 2022-2027, Isabel da Costa Ferreira. Foto/Hatutan.com

MAID deside fó apoiu ba Isabel  da Costa Ferreira tanba konsidera iha nia polítika no programa sira afavor ba povu no liliu ba família no sosiedade inkluzivu ne’ebé respeita ba direitu umanu.

Port voz MAID, Jacinta Ana Paula da Costa Freitas, iha nia deklarasaun, hateten kandidata PR 2022-2027, Isabel da Costa Ferreira hatudu nia simplisidade iha sosiedade no sai família ezemplar no promotora ba sosiedadeno iha vizaun boot ba promove pás no estabilidade ho maneira simples ne’ebé hatudu hodi hametin unidade nanasionál.

“ami konsidera katak asuntu inkluzaun no defisiente la’ós kandidata Isabel  Ferreira foin ko’alia iha kampaña, maibé nia hatudu ona asaun konkreta balun iha knar lor-loron nian, maske uituan ka kiik, maibé ba MAID importante mak nia halo no halo beibeik ba sosiedade ida ne’e,” Jacinta Ana Paula da Costa Freitas hateten.

MAID mós konsidera kandidata PR Isabel da Costa Ferreira hanesan kandidata feto independente ne’ebé nakonu ho responsabilidade no respeita ba valor solidariedade, onestidade, toletante no hadomi pás. 

Jornalista: Vito Salvador