Hatutan.com, (07 Abríl 2022), Baucau-Kandidatu Prezidente Repúblika (PR) ho númeru rua (2), Francisco Guterres “Lú Olo” husu ba militante no apoiante sira partidu FRETILIN ho Baucau-oan tomak atu iha eleisaun prezidensiál ba segunda volta ne’e, vota ba nia atu kontinua mandatu hanesan Prezidente Repúblika 2022-2027 hodi bele hametin estabilidade ho pás ba povu iha rai-laran.

Notísia iha Relasaun: Ekipa Susesu Lere Anan Timur iha Díli Apoiu Lú Olo

Kandidatu Prezidente Repúblika Francisco Guterres Lú Olo. Foto/Hatutan.com.

“Permite ba ha’u atu hateten ba Baucau-oan sira, atu ita hotu-hotu tenke matan-moos, neon na’in nafatin, tanba iha eleisaun ida agora daudaun, eleisaun ida ne’ebé mak importante tebetebes, hodi hili prezidente repúblika ida ba povu Timor-Leste ninian ka hili prezidente ida ne’ebé, para atu bele ba sobu fila-fali órgaun  soberania sira. Prezidente Repúblika ida ne’ebé bele garante pás ho estabilidade, la’ós prezidente Repúblika ida ne’ebé atu kria krize nafatin de’it,” Francisco Guterres “Lú Olo” hateten durante halo diálogu ho komunidade sira iha Jináziu Munisípiu Baucau, Kinta (07/04/2022).

Lú Olo argumenta katak  daudaun ne’e konkorre  ho nia iha eleisaun segunda ronde, deklara publikamente katak, bainhira manán, sei dissolve Parlamentu Nasionál, no hatún mós Taur Matan Ruak nia Governu.

Advertisement

“Presiza atensaun ba buat sira ne’e hotu, para atu bele fihir, atu bele sukat hanoin, atu bele hakat, no atu bele vota. Krize mosu, bainhira órgaun  soberania sira soke malu, lalika tán krize, ita hili prezidente ida, ne’ebé atu garante pás ho estabilidade,” Lú Olo hateten tán.

Lú Olo esplika, Prezidente Repúblika maka titulár órgaun soberania ida ne’ebé boot tebetebes iha Timor-Leste. Maibé, presiza PR ida ne’ebé mak tenke iha lejitimidade direta ida, liuhosi votu povu ninian, atu bele tuir mai nia halo ezersísiu no polítiku Estadu nian iha reprezentasaun povu no nasaun.

Kandidatu PR ho númeru sorteiu 2 ne’e sente iha onra ne’ebé boot tebetebes, tanba hamutuk ona ho partidu Kmanek Haburas Unidade Nasionál Timoroan (KHUNTO), Partidu Libertasaun Populár (PLP), ho Os Verdes de Timor, no hamutuk mós ho povu Baucau, hakat dala-ida tán ba segundu ronde eleisaun prezidensiál.

Prezidente partidu Frente Revolusionáriu Timor-Leste Independente (FRETILIN), Francisco Guterres “Lú Olo” sente orgullu ba Baucau oan sira tanba iha eleisaun primeira volta, kontribui ona votus ba nia hodi manán kedas iha primeira ronda, liu-liu manán líder boot Kay Rala Xanana Gusmão ho José Ramos Horta, iha Munisipiu Baucau.

“Manán lider boot na’in-rua ne’ebé mak sira na’in-rua tau hamutuk iha bulletin  votu, ida Xanana Gusmão, ida Ramos Horta. Ha’u manán sira na’in-rua iha Baucau, dala-ida tán ha’u hakarak atu repete. Maibé mezmu  sira na’in-rua, doutór Ramos Horta manán iha fatin, iha distritu sira seluk, iha distritu sira seluk mós, Lú Olo nia votu la mamuk ida. Hamutuk ho Baucau, Viqueque, ho Lautem nian, ho munisipiu sira seluk ba to’o iha fronteira, Lú Olo nia votus iha. Ba segunda ronde ida ne’e, Baucau mai simplesmente konfirma de’it ha’u nia vitória ba segunda ronde ida ne’e,” Lú Olo hateten ho otimista.

Advertisement

Baucau Prontu Fó Vitória Dala-Ida tán ba “Lú Olo”

Koordenadór partidu FRETILIN Munisípiu Baucau, Abrão de Oliveira. Foto/Espesiál

Koordenadór partidu FRETILIN Munisipíu Baucau, Abrão de Oliveira promete katak, iha eleisaun segunda volta, militante no apoiante sira iha munisipiu ne’e, sei fó vitória dala-ida tán ba kandidatu PR Francisco Guterres “Lú Olo” hodi re-eleitu ba prezidente repúblika periodu 2022 to’o 2027.

“Lori kamarada sira hotu, belun sira hotu, kampanáriu sira hotu iha ne’e, ami Baucau hato’o katak, prontu fó vitória dala-ida ita tán ba kamarada prezidente Lú Olo. Ha’u hanoin, ha’u la ko’alia barak, ida ne’e iha ita-boot nia knuuk, iha ita boot nia fatin, garante vitória ba segundu mandatu prezidente repúblika, kamarada doutór Francisco Guterres “Lú Olo,” Abrão Oliveira hateten durante abertura diálogu iha Baucau.

Observasaun Hatutan.com iha terrenu nota, kampaña eleitorál ho modelu diálogu ne’e, la’o ho seguru no hakmatek, tanba hetan seguransa hosi membru sira PNTL nian Komandu Munisípiu Baucau, no hetan mós observasaun hosi Ofisiál Monitorizasaun ba Eleisaun (OME) hosi Comissão Nacional de Eleições (CNE) no observadór sira seluk tan nasionál ho internasionál.

Jornalista: Rogério Pereira Cárcres

Advertisement