Hatutan.com, (17 Marsu 2022), Díli— Konsellu Ministru (KM) iha Kuarta 16 Marsu 2022, aprova ona projetu Dekretu-Lei ne’ebé aprezenta hosi Primeiru-Ministru (PM), Taur Matan Ruak, ba alterasaun dahuluk Dekretu-Lei númeru 26/2021, loron 26 fulan-Novembru, kona-bá medida esesionál no temporária sira ba vizilánsia sanitária hodi hatán ba pandemia Covid-19.

Reuniaun Konsellu Ministru (KM), Kuarta (16/03/2022). Foto/KM.

“Ho alterasaun ida-ne’e, primeiru, atu tama mai territóriu nasionál presiza de’it aprezentasaun sertifikadu vasinasaun nian ne’ebé kompletu ka nu’udár alternativa, halo kuarentena; no Segundu, laiha ona limitasaun oráriu funsionamentu nian ba postu fronteira terrestre sira, ne’ebé funsiona filafali hanesan loron baibain,” Hatutan.com sita komunikadu.

Notisia iha Relasaun:KM Aprova Dekretu Lei Foun Aprovizionamentu, Kontratu Públiku no Infrasaun

Konsellu Ministru mós aprova projetu Rezolusaun Governu nian, ne’ebé aprezenta hosi Vise-Ministru Negósius Estranjeirus no Kooperasaun, Julião da Silva, atu aprova akordu entre Governu Timor-Leste no g7+. 

Ho akordu ida-ne’e, ne’ebé ninia objetivu atu kontribui ba atividade sira g7+ nian, Governu sei fó, entre tinan 2022 no 2027, montante millaun $1 tinan-tinan.

Subsídiu ida-ne’e tenke uza ba promosaun kooperasaun nian entre Estadu-Membru sira no ba finansiamentu despeza sira funsionamentu g7+ nian no ba organizasaun hosi reuniaun ministériu nian tinan-tinan.

Aprova mós projetu Proposta Rezolusaun rua Parlamentu Nasionál nian, ne’ebé aprezenta mós hosi Vise-Ministru Negósius Estranjeirus no Kooperasaun, ba aprovasaun akordu sira entre Repúblika Demokrátika Timor-Leste no Reinu Kamboja no Reinu Tailándia nian, atu fó izensaun vistu ba titulár sira pasaporte Diplomátiku  no Servisu nian.

Ikusliu, Ministru Prezidénsia Konsellu Ministru, Fidelis Manuel Leite Magalhães, halo aprezentasaun ida kona-bá preparasaun planu lejizlativu Governu nian ba tinan 2022. 

Planu lejizlativu ne’e sei elabora hela bazeia ba proposta sira ne’ebé submete ona hosi membru sira Konsellu Ministru nian, no sai hanesan previzaun ba intervensaun lejizlativa sira Governu nian, no sira-nia prioridade sira, ne’ebé fahe ona tuir setór sira, ba tinan 2022.

Planeamentu lejizlativu ne’e maka instrumentu ida hosi instrumentu sira ne’ebé konsagra ona hodi hadi’a kualidade hosi atividade lejizlativa Governu nian. 

Jornalista: Carmelita Isaac