Hatutan.com, (18 Marsu 2022), Díli-Komandu FALINTIL-Forsa Defeza Timor-Leste (F-FDTL) Komponente Navál, Sesta (18/03/2022), demite nia membru ida ho naran Quintino de Jesus Martins  tanba dezobediénsia ba regra sira militár nian. 

Komandante Komponente Navál, Kapitaun Fragata João da Silva hateten, F-FDTL iha ninia regulamentu dixiplina militár rasik ka iha justisa.

Nune’e, bainhira membru ida halo sala, primeiru halo xamada atensaun, segundu halo detensaun iha sela dixiplinár, no sansaun ida ikus liu hasai hosi servisu.

Notisia iha Relasaun:Koñese Fasilidade Militár iha Komponente Navál F-FDTL

“Ita hasai tuir regra. Ikus liu ne’ebé todan liu maka ita hasai. Signifika nia prosesu ne’e todan,” João da Silva hateten ba jornalista sira, hafoin halo demisaun ba membru ne’e, iha Baze Komponente Navál Hera.

Komandante Komponente Naval ne’e esplika tán, iha prosesu dixiplinár sira militár nian, la ko’alia de’it kona-bá falta, maibé mós bainhira membru ida mak la kumpre ba orden militár, sei tama hotu iha prosesu.

Membru ne’ebé Komandu F-FDTL aplika ona sansaun demisaun ne’e, hosi Munisipiu Maliana, rekrutadu kedan husi tinan 2009, ho postu Cabo Marinha, Númeru Identidade Militár (NIM), 192209.

Jornalista: Rogério Cárceres