Hatutan.com, (19 Marsu 2022), Díli—Kandidata independente ba Prezidente Repúblika 2022-2027 ho númeru sorteiu 7, Maria Helena Lopes de Jesus Pires fiar katak, eleisaun Prezidensiál iha tinan ida ne’e justu no transperénsia.

Kandidata Maria Helena Lopes de Jesus Pires ezerse direitu de votu iha sentru votasaun EP no 5 Kampung Baru, Comoro, Sábadu (19/03/2022). Foto/Hatutan.com.

“Momentu ida-ne’e istóriku tebes hodi muda destinu nasaun nian. Ho esperansa katak, eleisaun ne’e la’o ho justu, transparénsia no pasífiku,” Maria Helena Lopes de Jesus Pires hateten ba jornalista sira hafoin ezerse direitu votu iha sentru votasaun EP no 5 Kampung Baru, Sábdu (19/03/2022).

Notisia iha Relasaun:Eleisaun, Rogério Lobato Konsidera Demokrasia mak Manan

Iha eleisaun ne’e, kandidata Milena Pires forma iha liña ikus hanesan sidadaun bai-bain hodi ezerse nia direitu de votu, maski hanesan kandidatura hetan oportunidade iha liña oin.

Advertisement

Kandidata ne’e hakarak forma iha liña ikus tanba respeita tebes sidadaun seluk nia direitu, nune’e tenki tuir formatura.

Totál eleitores iha suku Comoro hamutuk 30.497 ho sentru votasaun 12 mak hanesan Escola Bázika Filiál Fomentu, EPS Nicolau Lobato, EBF 12 de Outubru, ES Finantil, EBF Aimutin, EPS 30 de Agostu, EPS São Pedro, EP no 5 Kampung Baru, Eskola Alfatera Maslidun, Institutu Ciensia Saude, Edifisiu INAP (sentru Paralelu), Sede aldeia Aimutin.

Totál eleitores iha kapitál Díli hamutuk 190.710 ho sentru votasaun 130, estasaun de votus 237.

Iha sentru votasaun ne’e, hetan akompañamentu hosi observadór internasionál no nasionál, fiskais kandidatura, no hetan seguransa hosi PNTL.

Jornalista: Carmelita Isaac

Advertisement