Hatutan.com (22 Marsu 2021), Díli—Tribunál Distritál Díli (TDD), liu hosi julgamentu sumáriu ne’ebé prezide hosi juiza singulár Ercilia de Jesus deside aplika pena admoestasaun ba arguidu na’in rua ho inisiál O no T, tanba deskonfia halo perturbasaun ba prosesu votasaun iha sentru votasaun paralelu  Institutu Nasional Administrasaun Publika (INAP) Comoro,  Sábadu (19/03/22).

Urna sensetivu Eleisaun ba Prezindente Repúblika 2022-2027. Foto/Hatutan.com

Alende ne’e, Tribunál mós deside arguidu na’in-rua selu kustu judisiáriu ho montante kada ema $10.

Razaun TDD aplika pena refere tanba Tribunál konsidera faktus la provadu katak arguidu na’in-rua mak organiza ema hodi perturba prosesu votasaun ne’ebé la’o hela.

Arguidu na’in-rua hakarak atu ezerse sira nia direitu hodi vota maske momentu ne’ebá rejista naran iha sentru votasaun paralelu, maibé naran laiha.

Advertisement

Julgamentu sumáriu ne’e MP akuza arguidu na’in-rua ba pratika krime Perturbasaun aktu eleitorál ne’ebé previstu iha artigu 235 hosi kódigu penál TL.

Antes ne’e, tuir kronolojia katak iha loron 19 fulan ne’e iha tuku 13:40 iha sentru votasaun Comoro (INAP) mosu perturbasaun ne’ebé halo hosi arguidu na’in-rua, tanba bainhira atu vota maibé naran laiha lista.

Tanba ne’e argudu na’in-rua lamenta hodi hato’o protestu  hasoru brigada STAE ne’ebé mak tau matan iha sentru votasaun refere, hodi esplika razaun tanba saida mak naran laiha maski antes ne’e rejistu ona.

Tanba ne’e, arguidu na’in-rua ho votante barak konsege hamriik hodi taka fatin votasaun ne’ebé difikulta ema seluk atu ba vota.

Ho situasaun ne’e, PNTL Munisípiu Díli halo intervesaun hodi kaer no halo detensaun ba arguidu na’in-rua durante oras 72 hafoin submete ba julgamentu sumáriu.

Advertisement

Audiénsia Julgamentu iha Tersa 22 fulan ne’e, prezide hosi juiza singulár Ercilia de Jesus, Ministériu Públiku reprezenta hosi Prokuradór José Elo no Arguidu hetan asisténsia hosi Advogadu Privadu.

Jornalista: Carmelita Isaac