Hatutan.com (28 Marsu 2022), Díli—Durante periudu eleisaun Prezidensiál,  Polísia Nasionál Timor-Leste (PNTL) enfrenta difikuldade barak, liuliu kona-bá rádiu komunikasaun nian, inklui ekipamentu nesesáriu sira seluk ba membru sira iha terrenu.

Komandu Jerál hala’o avaliasaun jerál ho komandante sira munisípiu, komandante operasionál inklui komandante seksaun sira, ba eleisaun Prezidensiál ne’ebé liu ona. Timor-Plaza, Segunda (28/03). Foto/PNTL.

Ho realidade ne’ebé membru sira enfrenta, maka ohin Segunda 28 Marsu, Komandu konvoka reuniaun ho komandante sira hosi munisípiu, komandante operasionál inklui komandante seksaun sira, hodi halo avaliasaun jerál atu hadi’a situasaun ne’e bainhira haka tba eleisaun tuir mai.

Notisia iha Relasaun:FRETILIN-KHUNTO Saling Lempar di Baucau, Militan FRETILIN Halangi CNRT di Manufahi

Durante avaliasaun ne’e, Komandante Jerál PNTL Komisáriu Polísia Faustino da Costa rona aprezentasaun hosi Komandante munisipiu ida-idak ninian atu bele halo sumáriu ba problema prinsipál no dezafiu saida mak sira hasoru, maibé situasaun jerál buat hotu la’o di’ak tanba hetan mós apoiu seguransa hosi ema hotu.

“Komandu esforsu nafatin hodi hadi’a difikuldade hirak ne’ebé mak iha tuir kbiit Komandu nian no buka dalan seluk atu haree rádiu komunikasaun balun ne’ebé iha atu bele halo distribuisaun liu-liu ba sentru votasaun sira. Kondisaun seluk maka ekipamentu nesesáriu liu-liu ba seguransa pessoál membru sira nian. Ida ne’e mak ita haree hela oinsa ba oin ita responde kuandu ita sei hakat pasu ida tán ba Eleisaun Prezidensiál segunda ronde,” Komisáriu Polísia Faustino da Costa hateten iha Timor-Plaza, Segunda (28/03).

Dezafiu balun ne’ebé mak PNTL hasoru nafatin maka dezastre naturais ne’ebé mak sei sai nafatin hanesan dezafiu ida tanba atu asesu ba sentru votasaun sira no mós movimentu transporte iha tempu kampaña balun sai difikuldade boot tanba kondisaun estrada liga munisipiu ida ba munisípiu seluk grave.

Ezemplu hanesan buat ne’ebé akontese iha Maliana, Covalima, inklui parte Manatuto durante semana balun nia laran dalaruma kompañia operadór telekomunikasaun sira mós difikulta teb-tebes oinsa fasilita tanba komunikasaun mak meiu ida ne’ebé instituisaun PNTL mós bele hetan lalais informasaun no atualiza lalais ba entidade hotu.

Kona-bá rekursu umanu Komandu kontinua nafatin halo jestaun ba ninia membru sira hanesan oras-ne’e daudaun PNTL sei foti nafatin hosi Komandu Jerál no Unidade sira ne’ebé iha, hodi reforsa munisipiu sira ne’ebé nesesita ka presizatán apoiu ba sira liu-liu iha tempu eleisaun nian.

Komandu mós hakarak fó parabens ba Komandante no membru PNTL hotu ba selebrasaun aniversáriu ba dala XXII no mós parabens ba sira nia esforsu tomak ne’ebé membru hotu halo hahú hosi kampaña to’o iha eleisaun iha loron 19 Marsu, Parabens mós ba média, públiku, ekipa susesu no kandidatu Prezidente Repúblika periudu 2022-2027 na’in 16 no hein katak rezultadu ne’ebé mai sei lori buat ne’ebé di’ak ba timor oan tomak.

Iha avaliasaun ne’e Komandante Jerál mós fó referénsia ba komandante munisipiu no Komandante Unidade sira kona-bá oinsa mantein seguransa iha periudu semana santa nomós kampaña Eleitorál segunda volta tanba loron 15 fulan Abril ne’e Sesta Fera Santa, babain molok Sesta feira Santa iha Kinta fera Santa to’o Sábadu Aleluia iha momentu ida ne’ebá PNTL mós tenke asegura Igreja, Kapela, Parokia iha fatin hotu-hotu signifika katak Komandante sira tenke hatene oinsa uza ka jere rekursu humanus ne’ebé sira iha munisipiu no unidade sira.

Avaliasaun Servisu Operasionál Festa Demokrasia Eleisaun Prezidensiál 2022 ne’e organiza hosi Komandante Komandu Operasaun no partisipa huoi Inspetór Jerál, Komandante Komandu Administrasaun, Komandante CFP, Komandante munisipiu, Komandante Unidade UEP, UPM no UPF, Xefe Gabinete, Xefe Departamentu no Segundu Komandante TLPDP.

Jornalista: Rogério Pereira Cárceres