Hatutan.com, (21 Marsu 2022), Díli—Governu liuhosi Ministériu Negósiu Estranjeiru no Kooperasaun (MNEK), atribui ona orsamentu ho totál millaun $1 ba organizasaun rejionál g7+, hodi bele finansia nia despeza ba atividade sira ne’ebé mak hala’o iha nível globál nomós nasionál.

Asina akordu entre Vise Ministru Negósiu Estranjeiru no Kooperasaun (MNEK), Julião da Silva ho Sekretáriu Jerál g7+, Helder da Costa Lopes. Foto/g7+.

Sekretáriu Jerál G7+, Helder da Costa Lopes hateten, akordu ida-ne’e nu’udár kompromísu ida hosi governu Timor-Leste no hetan mós aprovasaun hosi Parlamentu Nasionál (PN), ne’ebé kompromete ona katak apoia osan millaun $1 kada tinan, no ba prósima tinan lima hosi 2022 to’o 2027.

“Signifika, Governu Timor-Leste iha duni kompromísiu boot atu suporta g7+ liuhosi finansiamentu hodi finansia despeza g7+ nian iha nível globál, nomós iha nível nasionál,” Helder da Costa Lopes hateten ba jornalista sira iha Palásiu Governu, Díli, Segunda (21/03/2022).

Atribuisaun fundu ho valór millaun $1 ne’e, liuhosi akordu ne’ebé asina entre Vise Ministru Negósiu Estranjeiru no Kooperasaun (MNEK), Julião da Silva ho Sekretáriu Jerál g7+.   

Orsamentu ne’e sei finansia ba área tolu ne’ebé antes ne’e hala’o ona mak hanesan, ida, kona-bá halo advokasia no diplomasia iha nível globál, partilla mós TL nia esperiénsia ho rai seluk iha área bar-barak, eleisaun sira, rekursu naturais no mós kona-bá pás ho rekonsiliasaun.

“Iha laran, ita mós halo autrix ba grupu arte marsiál, joven sira mantein kalma ho pás no trankilidade, nune’e ita hakat ba dezenvolvimentu ne’ebé mak hakmatek,” Helder da Costa subliña.

Timor-Leste sente orgullu tanba iha organizasaun rua mak TL sai hanesan pioneiru, ida mak g7+ no ida fali maka Comuniddae dos Paises da Língua Portuguesa (CPLP), tanba TL mós halo parte.

“Ho grupu rua ne’e ita bele brilla ita nia papél iha multilateralizmu iha nível globálno hamutuk ho país sira seluk ita ko’alia forte liután. Tanba ne’e mak g7+ mós hakarak atu kompromete atu ajuda Timor-Leste nia kandidatura ba konsellu direitus umanus ne’ebé Timor-Leste sei avansa iha tinan oin,” nia promete.

Vise Ministru MNEK, Julião da Silva haktuir akordu ne’e bele hala’o ho g7+ tanba iha semana kotuk Governu halo ona aprovasaun iha Konsellu Ministru.

Durante impase polítika iha TL, Governu iha de’it osan hosi orsamentu duadésimu nian, nune’e iha tinan lima ba kotuk Governu laiha orsamentu ruma atu apoia ba organizasaun ne’e.

Tanba ne’e, apoiu ida ne’e nu’udár Governu nia komitmentu atu suporta nafatin organizasaun g7+ nune’e membru sira bele hala’o atividade.

Organizasaun rejionál g7+ funda iha 2010 hosi nasaun hitu no Kay Rala Xanana Gusmão nu’udár pessoa eminente ne’ebé oras ne’e iha ona nasaun membru hamutuk 20.

Organizasaun rejionál g7+  harii ho objetivu atu halibur nasaun frajilidade sira iha mundu, no nasaun sira ne’ebé sai ona membru iha obrigasaun atu kontribui finanseira no rekursu umanu.

Jornalista: Rogério Pereira Cárceres