Hatutan.com, (22 Marsu 2022) Díli—Tribunál Distritál Díli (TDD), kontinua hala’o julgamentu ba krime burla agravadu ne’ebé deskonfia involve jerente kompañia Brother Hood arguidu Mario Freitas, relasiona ho projetu pakote referendum hosi Ministériu Agrikultura no Peska (MAP).

Projetu ne’e hodi halo konstrusaun ba moru iha Baucau-Villa ne’ebé ikus mai fó prejuizu ba lezadu José Manuel dos Reis nu’udár diretór kompañia UNIPAZPRO Lda.

Notisia iha Relasaun:Kazu Brother Hood-Unipazpro, Sasin Deklara Arguidu Halo Pedidu Levantamentu Osan

Advertisement

Iha julgamentu kontinuasaun ne’e, sasin eis tezoreira Asosiasaun Emprezáriu Pakote Referendum AECCOP, Silvia Pires Pereira rekoñese AECCOP mak halo pagamentu liu hosi chek ba kompañia.

Maibé, bainhira liña ministeriais asina hotu hanesan koordenadór AECCOP, projetu na’in no Ministériu Agrikultura no Peska inklui autorizasaun hosi estrutura AECCOP no ikus liu maka foin bele halo pagamentu hodi fo chek, enkuantu laiha orientasaun maka tezoreira labele halo pagamentu.

“Na’in ba projetu maka Estadu no osan Estadu aloka mai AECCOP mak halo pagamentu. Tanba ne’e, AECCOP hanesan tekniku Governu nian hodi halo pagamentu, maibé antes ne’e kompañia mak haruka uluk nia pedidu pagamentu ba MAP no aprova ona mak Ministeriu sei orienta fali mai ami hodi halo pagamentu chek. Antes fo chek mós sei hetan asinatura hosi Prezidente AECCOP Júlio Alváro, Vise Vicente Maubossi no Eduardo hodi orienta katak bele halo pagamentu,” deklara sasin iha audénsia Tersa, (22/03/2022).

Depois de pagamentu halo liu fulan ida maka lezadu halo reklamasaun hodi husu fotokopia dokumentu ba pagamentu ne’e, maibé la husu atu suspende pagamentu.

Tanba ne’e, bainhira lezadu hatama reklamasaun antes halo pagamentu maka AECCOP bele suspende pagamentu.

Advertisement

Hafoin rona sasin, juiz prezide marka audiénsia ba loron seluk hodi kontinua rona sasin.

Antes ne’e, tuir akuzasaun hosi Ministériu Públiku (MP) katak iha loron 23 fulan-Setembru 2009, Ministériu Agrikultura no Peska hala’o enkontru ho emprezáriu hosi Munisípiu 13 hodi ko’alia kona-bá “Pakote Referendum”, ne’ebé deside katak projetu ne’ebé atu halo tenke termina iha fulan-tolu nia laran, maibé bele prolonga bainhira obra ne’e atinje ona 50% ka 80%, bainhira la kumpre maka Governu sei la fó tán lisensa.

lha enkontru deside mós bele iha kompañia rua hamutuk hodi kaer obra ne’e, maibé tenke halo akordu konjunta antes hahú asina kontratu no vistu hosi Koordenadór Munisípiu, tanba ne’e, iha loron 23 fulan-Setembru 2009, lezadu ho nia kompañia UNIPAZPRO hamutuk ho arguidu hanesan jerente hosi kompañia Brother Hood Lda ho diretór kompañia Nelson Belo asina akordu hodi halo projetu ne’e.

Iha loron 4 fulan-Outubru 2009u lezadu hamutuk ho arguidu halo enkontru ida ho koordenadór Munisípiu Baucau, Abrão Gabriel dos Santos Oliveira, hodi ka’olia kona-bá osan adiantamentu 20% ho nia valor $27.159.60.

Tanba ne’e, sira dezloka kedan ba fatin konstrusaun hodi hasoru malu ho badaen Mateus da Silva Correia hodi halo kontratu traballu no selu badaen ho valor osan $5.000.00 no termina iha periodu fulan-tolu nia-laran.

Advertisement

Iha loron 19 fulan-Outubru 2009, liuhosi loja Toko Lay fornese material konstrusaun ho valor $27,000.00, maibé iha loron iha loron 30 fulan-Outubru tinan 2009 arguidu halo pedidu ba iha AECCOP sem koñesimentu husi lezadu, koordenadór Munisípiu hodi halo falsifikasaun hodi hetan $135.000.00.

Iha loron 3 fulan-Novembru 2009, lezadu haree projetu ne’ebé sira halo, maibé bada’e sira informa katak labele halo obra, tanba material laiha, ho nune’e, nia mai husu iha Toko Lay atu fornese material.

Maibé sira hatán dehan, arguidu mai foti ona osan 15% ne’ebé iha ho valor $12.697.30 hodi fó informasaun falsu katak arguidu maka diretór ba kompañia Brodher Hood, maibé diretór loloos kompañia maka Nelson Francisco Assis Belo.p

Arguido mós halo falsifikasaun kona-bá relatóriu halo obra liu hosi pedidu ba iha Sekretáriu Estadu Agricultura, Marcos da Cruz hodi informa katak obra ne’e termina ona hodi husu pagamentu.

Maibé, realidade obra sidauk termina ho nune’e koordenadór Pakote Referendu Munisípiu Baucau Abrão de Oliveira lakohi asina.

Advertisement

Ho arguidu nia hahalok ne’e, lezadu simu informasaun hosi José Coelho katak loos dunik arguidu falsifika dokumentu hodi ba foti xeke iha AECCOP hodi ba foti osan iha Banku sem koñesimentu hosi Iezadu no mós koordenadór Pakote Referendu Munisípiu Baucau.

Konsekuénsia husi arguidu nia hahalok fó prejuizu ba lezadu ho montante $53.322,80, tanba ne’e MP akuza arguidu ba pratika krime burla agravadu ne’ebé previstu iha artigu 267 husi kódigu penál TL.

Hafoin rona arguidu ho lezadu, juiz prezide adi’a hikas julgamentu ba loron seluk hodi kontinua rona lezadu no sasin sira.

Audiénsia julgamentu preside hosi juiz koletivu, Argentino Luisa Nunes, José Gonçalves, Alvaro Freitas, MP reprezenta hosi Prokuradór Reinato Berenahak no arguidu hetan asisténsia legál hosi Defensór Públiku Manuel Sarmento.

Jornalista: Carmelita Isaac

Advertisement