Hatutan.com (31 Marsu 2022), Díli—Tribunál Distritál Díli (TDD) iha Kinta 31 fulan ne’e, hala’o primeiru julgamentu ba krime pekulatu relasiona ho estudu komparativu deputadu komisaun E ne’ebé hala’o iha Nasaun Xina no Macau iha tinan 2019.

Hosi estudu komparativu ne’e, lori funsionáriu públiku Diresaun Apoiu Tékniku Parlamentu Nasionál (PN), arguidu JdJSB hatán iha Tribunál tanba deskonfia utiliza osan restu ho montante $7,507.75 hosi totál apoiu fundu rezerva $10.000 ba estudu komparativu Deputadu sira iha Xina no Macau iha loron 30 fulan Jullu to’o 14 Agosto.

Notisia iha Relasaun:Funsionáriu Ne’ebé Faan Komputadór PN Simu Pena Suspensaun Tinan Lima

Iha primeiru julgamentu ne’ebé prezide hosi juiz kolektivu Afonso Carmona, Ana Paula Fonseca no Maria Solana ne’e, arguidu konfesa katak loos duni osan restu refere nia utiliza ba interese privadu, maibé antes julgamentu arguidu devolve ona.

Ho konviksaun arguidu nian, Tribunál konsidera la presiza rona tán sasin sira, tanba ne’e liu hosi alegasaun ne’ebé prezide hosi Prokuradór Adérito Tilman husu ba Tribunál atu aplika pena prizaun tinan tolu no suspende tinan tolu ba arguidu.

MP husu pena suspensaun, tanba konsidera faktus provadu bazeia ba konviksaun arguidu nian iha audiénsia, maibé konsidera mós ba arguidu nia hahalok liu-liu kolabora di’ak ho justisa hodi konfesa faktus hotu ne’ebé iha.

Advogada privada Adelina Lobo husu ba Tribunál atu tetu didi’ak uza konviksaun bazeia ba provas ne’ebé iha.

Hafoin alegasaun juiz prezide marka hikas audiénsia ba loron seluk hodi rona leitura sentensa.

Antes ne’e, iha loron 09 fulan Jullu 2019, Prezidente Comissão E Assuntu Infraestrutura, Abel Pires da Silva, haruka pedidu ba Prezidente Parlamentu Nasionál hodi husu apoiu fundu rezerva ho montante $10.000, atu utiliza ba estudu komparativu Deputadu sira iha Xina no Macau iha loron 30 Jullu ate 14 Agosto no iha loron 23 Jullu 2019, Prezidente PN aprova duni pedidu ne’e.

Iha loron 02 fulan Setembru 2019, Abel Pires da Silva haruka karta ba PPN hodi informa kona-bá alterasaun ba loron dezlokasaun Deputadu hosi komisaun E ba Xina.

Iha loron 03 fulan Setembru Ofisiál Finansas Lina Fatima Baptista prepara Payment Request, ne’ebé sertifika hosi Zélia Maria da Costa Fátima no hetan aprovasaun hosi Adelino Afonso de Jesus.

Iha loron hanesan Herman de O. Soares no Lina Fátima Baptista prepara documentu Commitment And Payment Voucher ne’ebé sertifika hosi Maria da Costa Fátima no autoriza hosi Adelino Afonso de Jesus.

Iha loron 04 fulan Setembru 2019, Diresaun Finansa PN hasai cek ho númeru 0017321 ho montante $ 10.000, liu hosi ofisiál finansas Isabel Alves Ximenes entrega osan ho montante refere ba arguidu hodi utiliza ba nesesidade deputadu nian iha estudu kompativu iha Xina-Macau.

Iha loron 05 fulan Setembru 2019, Deputadu Komisaun E Abel Pires da Silva hamutuk ho deputadu sira seluk aranka hosi Dili ba Denpasar no kontinua viajen ba Xina-Macau no iha loron 19 fulan Setembru 2019, deputadu sira dezloka ba Beijing no Tmor-Leste.

Iha loron 23 fulan Dezembru 2019, Prezidente Komisaun E, Abel Pires da Silva haruka karta ida ba sekretária Jerál PN Cedelizia Fária dos Santos, hodi informa katak durante vizita estudu komparativu iha Xinan no Macau deputadu hosi komisaun E utiliza osan hosi fundu rezerva ho montante $ 2,492.25, tanba ne’e komisaun E sei fó fila osan restu ho montante de $7,507.75.

Maibé osan restu ne’ebé arguidu kaer la konsege fó fila ba sekretária PN to’o ohin loron hodi utiliza fali ba interese privadu, tanba ne’e Diretór Joaquim Vicente, haruka karta xamada ba arguidu hodi devolve hikas osan restu.

Iha loron 30 fulan Setembru 2020, arguidu haruka karta ida ba sekretáriu jerál PN, Cedelizia Faria dos Santos, hodi informa kona-bá disponibilidade arguidu nian hodi devolve hikas osan restu ne’e liu hosi kontratu sosa sasan iha terenu durante deputadu sira nia estudu kompativu iha Xina no Macau, tanba osan restu ho montante $7,507.75 utiliza hotu ba atividade estudu komparativu Deputadu no ba interese privadu.

Ho hahalok arguidu, fó prezuizu ba Estadu ho montante $7,507.75 tanba ne’e MP akuza arguidu ba prátika krime pekulatu ne’ebé previstu iha artigu 295 hosi kódigu penál Timor Leste.

Audiénsia julgamentu prezide hosi juiz koletivu Afonso Carmona, Ana Paula Fonseca, Maria Solana, MP reprezenta hosi Prokuradór Adérito Tilman no arguidu sira hetan asisténsia legál hosi Advogada privada Adelina Lobo, Virna Carvalho.

Jornalista: Carmelita Isaac