Hatutan.com, (01 Abríl 2022), Díli—Ministru Administrasaun Estatál (MAE), Miguel Pereira de Carvalho akompaña hosi Vise Ministru Lino de Jesus Torrezão fó posse ba Ataúro oan Domingos Soares nu’udár Administradór dahuluk Munisípiu Ataúro nian.

Ministru Administrasaun Estatál (MAE), Miguel Pereira de Carvalho akompaña hosi Vise Ministru Lino de Jesus Torrezão fó posse ba Ataúro oan Domingos Soares nu’udár Administradór dahuluk Munisípiu Ataúro nian iha administrasaun Ataúro, Sesta (01/04/2022). Foto/MAE.

Iha Tinan ida-ne’e liuhosi sirkunskrisaun administrativa ho primeira eskalaun nian maka Ataúro hetan definisaun hanesan Munisípiu ida iha Timor-Leste liu hosi Lei númeru 14/2021, ne’ebé hetan alterasaun daruak sai Lei númeru 11/2009 kona-bá Divizaun Administrativa Territóriu.

“Administradór Munisipál mak reprezentante Governu nian iha munisípiu no nia mak simu knaar atu dirije administrasaun munisipál hodi assegura funsionamentu ba servisu hirak iha administrasaun lokál Estadu nian iha munisípiu, hodi hatán, liu hosi ninia atividade, ba membru Governu responsável,” Hatutan.com sita deklarasaun Miguel Pereira de Carvalho iha komunikadu  durante serimónia pose iha administrasaun Ataúro, Sesta (01/04/2022).

Hanesan reprezentante Governu nian iha nível Munisipál, maka Administradór Munisipál Ataúro, sei dirije no hala’o kompeténsia hirak ne’ebé Governu deskonsentra ona ba munisípiu sira.

Miguel fó-hanoin katak,  ba mandatu ida-ne’e bele mosu dezafiu hirak boot, nune bele assegura katak servisu administrasaun públika ne’ebé deskonsentra ona ba munisípiu foun, bele implementa hotu, hodi bele garante atu alkansa objektivu hirak hosi desentralizasaun administrativa tuir refere iha PEDN 2011-2030, hanesan (i) atu garante dezenvolvimentu setór privadu iha área hirak rurál (ii) atu kria oportunidade sira ba partisipasaun demokrátika iha nível lokál (iii) Atu promove harí Estadu ida forte; no (iv) atu assegura harí prestasaun servisu públiku ida efetivu, efisiente no ekuitativu liu.

Atu finansia programa no projetu hirak ne’ebé anuál no plurianuál, sósiu-ekonómiku no sustentabilidade ambientál no destina ba dezenvolve territóriu no populasaun Munisípiu Ataúro nian, maka aprova tiha ona iha Konsellu Ministru, iha 30 Marsu, tuir hakerek iha artigu 15.º Lei nº 1/2022, loron 03 fulan Janeiru, kona-bá Orsamentu Jerál Estadu ba 2022, Dekretu-Lei ne’ebé Kria Fundu Espesiál Dezenvolvimentu ba Ataúro (FEDA).

Knaar Administradór ne’e hanesan responsabilidade ida importante tebes ba moris sidadaun sira nian iha munisípiu.

Servisu no misaun ne’ebé nia simu ne’e, iha ejijénsia boot kona-bá sakrifísiu no dedikasaun. Administradór Munisipál tenke prontu atu simu responsabilidade no dezafiu hirak ne’e.

Nomeasaun Administradór Munisipál Ataúro ne’e hala’o liu hosi Rezolusaun Governu, ba mandatu ida ho tinan tolu nian, no bele renova fali, mínimu dala ida, ba períudu ida hanesan, liu hosi proposta membru Governu responsável ba administrasaun estatál, hafoin rona tiha Konsellu Konsultivu Munisip’al no Grupu Tékniku Interministeriál ba Desentralizasaun Administrativa.

Jornalista: Rogério Pereira Carceres