Hatutan.com, (09 Abríl 2022), Dili- Movimentu União Patriota Urbana (MUPU) ne’ebé halibur eis-militár timoroan ne’ebé sai husi Kuartél Jenerál FALINTIL-Forsa Defeza Timor Leste (F-FDTL) iha tinan 2006 husu ho respeitu ba lider polítiku sira, atu labele kontinua esplora bei-beik situasaun “petisionáriu” sira-nian ba interese atu ukun no interese ekonomia.  

Movimentu União Patriota Urbana (MUPU). Foto/Hatutan.com

Portavós Movimentu União Patriota Urbana (MUPU), Nelson da Silva Pereira, husu ho respeitu ba parte  atu hapara ona hahalok ne’ebé hakarak esplora de’it  eis-militár nia ezisténsia hodi atinje sira-nia interese polítika.

“Ami eis-militár timoroan (2006) lamenta no kondena makaas ba hahalok simpatizante no polítiku na’in balun ne’ebé duun matak dehan Ramos-Horta ho Maun boot Xanana Gusmão núdar autór ba krize 2006. Ami haree  realidade no lia-loos katak  Ramos-Horta no maun Xanana mós sai vítima iha krize ne’e,”  portavós MUPU, Nelson da Silva Pereira, hateten liuhusi konferénsia imprensa ne’ebé realiza iha Aldeia 01, Suku Fatu-Hada, Postu Administrativu Dom Aleixo, Munisipiu Díli, Sábadu (09/04/2020).

Eis-militár timoroan sira ne’e alerta nafatin ba lider no simpatizante partidu polítiku sira atu lalika hatudu liman ba malu kona-bá krize 2006 nian iha kampaíña Eleisaun Prezidensiál iha tinan ida ne’e, maibé konsentra de’it ba programa hirak ne’ebé ho objetivu atu hadi’a povu nia moris no hadi’a nasaun nia vida.

Iha biban ida ne’e, eis-militár timoroan (2006) ne’e kontinua firme no labele monu ba lasu propaganda falsu sira husi kualkér lideransa polítiku ka grupu interesadu ruma, ne’ebé mak bele estraga fali pás no estabilidade iha Timor-Leste.

Portavós ne’e hateten ba eis-militár timoroan (2006) mai hamutuk hodi fó apoiu másimu ba vitória Kandidatu Prezidente Repúblika, José Ramos-Horta, iha Eleisaun Prezidensiál segundu volta, 19 Abríl 2022, hodi nune’e bele ba hatuur hikas orden konstitusionál RDTL no rekupera hikas imajen RDTL iha mundu internasionál.

“Husu ba maluk eis militár timoroan (2006) sira, atu kontinua firme ho ita-nia pozisaun polítika no kompromisu hodi serbisu makaas  liután iha liña koordenasaun partidu CNRT nian ba Eleisaun Parlamentár  hodi lori hikas Maun boot, Kay Rala Xanana Gusmão ba Primeiru-Ministru 2022-2027,” Nelson da Silva Pereira hateten.

Movimentu União Patriota Urbana (MUPU), husu ba parte hotu-hotu, liu-liu juventude timoroan iha territóriu Timor laran tomak, atu kontinua kontribui nafatin ba pás no estabilidade iha rai doben Timor-Leste

Koordenadór Movimentu União Patriota Urbana (MUPU), Antonio Savio, dehan ba polítika nain sira labele uza nafatin eis militár sira ne’ebé sai ona vítima iha sir- nia interese polítika iha Eleisaun Parlamentár iha tinan oin mai.

 Movimentu União Patriota Urbana, sei organiza malu hodi kondena nafatin hahalok sira ne’e. Movimentu União Patriota Urbana (MUPU) nudár organizasaun ida, ne’ebé foin estabelese hodi halibur pesoál eis militár timoroan (2006) sira, ne’ebé mak iha vizaun hanesan ba promove unidade, pás, estabilidade no dezenvolvimentu nasionál iha Timor-Leste.

Tuir sira-nia haree, durante nee hatudu katak, iha parte barak mak sempre utiliza ona nia ezisténsia, nudár instrumentu iha atividade/movimentu polítiku oin-oin, hodi ikus mai fó de’it benefísiu polítiku no liu-liu benefísiu ekonomia. Tanba ne’e, sira husu  atu hapara tiha hahalok irresponsabilidade hirak ne’e.

Mari Alkatiri Promete Dignifika “Petisionáriu” sira

Iha kampaña polítika apoiu Kandidatu Prezidente Repúblika 2022-2027, Francisco Guterres “Lú Olo” iha Munisípiu Ermera, Covalima no Baucau,  loron hirak liubá, Sekretáriu Jerál partidu FRETILIN, Marí Bin Amude Alkatiri, promete iha apoiante no simpatizante sira-nia oin, katak bainhira Lú Olo manan iha eleisaun prezidensiál ne’e, nia rasik sei ko’alia ho Governu atu oinsá mak tau matan no dignifika eis-militár sira ne’ebé koñesidu ho naran petisionáriu sira ka “rebelde”.

Sekretáriu Jerál partidu RETILIN, Marí Alkatiri mós afirma tán katak, sei ko’alia mós ho Governu, atu oinsá mak bele hadi’a kondisaun petisionáriu sira-nian ne’ebé iha 2006 sai vítima ba krize to’o ema bolu “rebelde”.

“Ida tán, ha’u hanoin ne’e, kamarada sira balu sei duvida ka ragu-ragu atu aseita. Tanba ha’u uluk 2006, iha grupu ida ke hetan ha’u, sira oho. Petisionáriu, loos ka lae? Krize 2006, sira hetan ha’u, sira oho. Ha’u mak dehan, sira sala. Sira mak sai vítima ba krize ida ne’e. Entaun, ita tenke hadi’a sira nia situasaun polítika, ka kondisaun ba sidadaun, direitu da sidadaun. Sira ida ne’ebé hetan sira oho, ha’u mak dehan ida ne’e,” Alkatiri promete tán.

Jornalista: Elio dos Santos da Costa