Hatutan.com, (19 Abríl 2022), Díli—Kandidatu Prezidente Repúblika ho númeru sorteiu ida (1), José Manuel Ramos-Horta manan ho votu 349 iha sentru votasaun Sede Suku Balibar, Postu Administrativu Kristu-Rei, Munisípiu Díli.

Lee Mós: Xanana: Desizaun iha Povu no Ema Hotu Tenke Respeita

Prezidente CNRT, Kay Rala Xanana Gusmão vota iha Sentru Votasaun Suku Balibar, Postu Administrativu Kristu-Rei, Díli, 19 Abríl 2022. Foto/Espesiál

Iha fatin ne’ebé prezidente partidu CNRT, Kay Rala Xanana Gusmão, vota bá ne’e, hatudu kandidatu Prezidente Repúblika ho númeru sorteiu rua (2), Francisco Guterres “Lú Olo” hetan de’it votu 41.

Sentru votasaun Sede Suku Balibar ho kódigu sentru votasaun 00491/00491 0001 ne’e hatudu votu nulu tolu (3), branku zero (0), reklamadu zero (0), rezeitadu zero (0) no abandonadu mós zero (0).

Tuir observasaun Hatutan.com nian iha Sentru votasaun refere hatudu katak dezde tuku 07:00 dadeer, brigada STAE ho CNE loke ona sentru votasaun hodi fasilita abitante sira ba ejerse sira-nia direitu síviku to’o tuku 15:00 Otl.

Situasaun seguransa iha área sentru votasaun refere la’o ho hakmatek no durante prosesu votasaun iha fatin ne’e hetan observasaun husi observadór nasionál no internasionál sira.  

Jornalista: Elio dos Santos da Costa