Hatutan.com, (19 Abríl 2022), Díli–Kandidatu Prezidente Repúblika, José Manuel Ramos-Horta, manan maioria iha sentru votasaun Sede Suku Metiaut, Postu Administrativu Kristu-Rei, Munisípiu Díli.

Lee Mós : Iha Fatin Xanana Vota, Ramos-Horta Manan ho Votu 349

Rezultadu eleisaun prezidensiál segunda volta iha Sentru Votasaun Sede Suku Metiaut, Díli, 19 Abríl 2022. Foto/Hatutan.com

Iha Suku Metiaut rasik estabelese Sentru Votasaun rua; kompostu husi  Sentru votasaun ida iha Sede Suku Metiaut  hanesan mós fatin kandidatu Prezidente Repúblika José Manuel Ramos-Horta  ezerse nia direitu  votu no manan ho votu 337 enkuantu kandidatu Prezidente Repúblika, Francisco Guterres “Lú Olo” hetan votu 129.

Iha Sentru Votasaun EBF Metiaut, fatin Primeiru-Ministru nu’udár mós Prezidente Partidu Libertasaun Popular (PLP) vota bá hatudu katak, kandidatu Francisco Guterres “Lú Olo” derrota no hetan de’it votu 274 enkuantu kandidatu ho númeru sorteiu ida, José Manuel Ramos-Horta hetan votu 332.

Taur Matan Ruak, hanesan prezidente PLP hatama lisensa iha tempu kampaña eleisaun prezidensiál segunda volta nian, husi loron 02 to’o loron 13 fulan-Abríl 2022, hodi apoiu kandidatu Prezidente Repúblika ho numéru sorteiu rua (2), Francisco Guterres “Lú Olo”.  

Husi total sentru votasaun rua ne’e kandidatu Prezidente Repúblika José Manuel Ramos-Horta hetan total votu 669 no Francisco Guterres “Lú Olo” hetan votu 403.

Sede Suku Metiaut rejista votu nulu haat (4), branku rua (2), reklamadu zero (0), rezeitadu zero (0), abandonadu zero (0) no kanseladu mós zero (0).

Brigada STAE no prezidente meza iha sentru votasaun Suku Metiaut, Marcos de Almeida hateten iha sentru ne’e rezultadu hatudu kandidatu númeru sorteiu ida, José Manuel Ramos-Horta maka manan.

“Ita iha sentru votasaun-rua, Sede Suku Metiaut ho sentru votasaun EBF Metiaut hatudu rezultadu  José Manuel Ramos -orta mak manan,” Marcos Almeida hateten.

Suku Metiaut rejista total eleitór 1.209 husi númeru ne’ebé iha eleitór ne’ebé ezerse sira-nia direitu votu  hamutuk 1078 no eleitór ne’ebé la vota hamutuk 131.

 Jornalista: Vito Salvador