Hatutan.com, (27 Abríl 2022), Díli-Governu liuhosi Ministériu Obra Públikas (MOP)  komprometidu atu iha tinan 2022 ne’e nia laran harii bairru foun ho uma hamutuk rihun-rua iha Suku Hera,  Munisípiu Díli.

Ministru Obra Publikas, Abel Pires. Foto/Hatutan.com.

Ministru Obra Públikas (MOP), Abel Pires, informa nia parte tenta hela atu harii bairru foun iha Hera ho uma hamutuk rihun-rua. Tanba ne’e, ekipa MOP halo daudaun konsultasaun públiku bá populasaun sira iha Hera, no iha semana kotuk mós, atividade konsultasaun  la’o di’ak tebes.

“Dezeñu agora iha prosesu hela, iha ministériu nian dezeñu ne’e prontu ona, agora hein tán konsultór mai, para haree apoiu liután, ne’e ita bele halo konstrusaun. Mais, ne’e tenke iha konkursu públiku, tanba ita hakarak halo mekanizmu entre Governu ho entidade privadu,” Ministru Abel Pires hateten.

Hatán kona-bá Governu garantia ka lae, atu implementa planu ne’e iha tinan ne’e, Ministru Abel Pires promete katak, iha 2022 nia laran ne’e sei implementa duni.

Mudansa Barak ba Estrada Sira Iha Dili

Ministru Obra Públikas, Abel Pires afirma katak, liga bá estrada sira ne’ebé hetan estragu iha área sira kapitál Dili nian, Governu hahú halo mudansa ne’ebé barak. Ezemplu konkretu ida mak, estrada ligasaun ba Sarlala nian, oras ne’e, komunidade sira bele asesu ona.

Kona-bá estrada boot, ka estrada públiku sira mak ligasaun hosi Postu Administrativu Laga ba to’o Baguia, ne’ebé uluk ema barak kestiona, oras ne’e, hahú iha mudansa boot.

Estrada ligasaun ba postu administrativu rua ne’e, ninia prosesu sira bá verifikasaun nian hosi Ajénsia Dezenvolvimentu Nasionál (ADN) konklui ona, no agora hein de’it aprovasaun hosi CAFI (Conselho Administração Fundo Insfraestrutura.

“Karta atu hatama ba CAFI ne’e, ha’u asina tiha ona, ne’ebé dentru de tinan ida ne’e, ami sei halo konstrusaun. Ida tán, hosi Weaca Quelicai ba Ossú, ne’e mós ami hatama ona mai Konsellu Ministru atu halo aprovasaun. Ne’ebé tinan ida ne’e, ita sei halo konstrusaun foun barak,” Ministru Abel informa tán.

Alende ne’e, planu reabilitasaun estrada hosi Munisípiu Manatuto Vila bá Postu Administrativu Lacló, oras ne’e, tama hotu ona iha lista aprovizionament, no iha tempu besik Governu sei halo intervensaun.

Jornalista: Rogério Pereira Cárceres