Hatutan.com, (28 Abríl 2022), Díli—Tebes! Iha ai-knanoik klásiku dehan, “iha mundu polítika,  laiha inimigu eterna no la iha mós amigu eterna, buat ne’ebé eterna mak interese.”

Lee Mós: Lú Olo Prepara Daudaun Relatóriu ba Ramos-Horta

Ramos-Horta hasoru-malu ho Mari Alkatiri, Kinta (28/04/2022). Foto/Espesiál

Ida-ne’e hatudu duni iha lala’ok polítika Timor nian ohin loron no lisaun ida di’ak tebes.  Iha ámbitu kampaña polítika eleisaun bá Prezidente Repúblika iha primeira volta to’o mai segunda volta nian, Sekretáriu Jerál partidu FRETILIN, Mari Bin Amude Alkatiri sempre soe-lia hasoru nia adversáriu polítika José Ramos-Horta.  Nune’e mós Ramos-Horta soe-lia hasoru Mari Alkatiri ho kandidatu Prezidente Repúblika, Francisco Guterres “Lú Olo” ne’ebé mai husi partidu FRETILIN.

Durante halo kampaña polítika hale’u munisípiu to’o iha aldeia sira, Ramos-Horta ne’ebé hetan apoiu másimu husi partidu CNRT ho lider karizmátiku Kay Rala Xanana Gusmão, dala-ruma la kontrola linguajen sira hodi soe-lia bá malu to’o sadik malu no dezafia malu  iha palku polítika nia leten.   

Hafoin hakur liu tiha faze polítika iha ámbitu eleisaun prezidensiál nian,  Ramos-Horta ne’ebé sai ona hanesan Preizdente Repúblika Eleitu bá períodu 2022-2027, komesa la’o bá diálogu no rona entidade hotu-hotu, inklui hasoru-malu no rona ema sira ne’ebé sai adversáriu boot no todan tebes  bá Ramos-Horta iha tempu kampaña prezidensiál, hanesan Mari Alkatiri ho Francisco Guterres ‘Lú Olo”.

Lee Mós: Ramos-Horta Aprofunda Komunikasaun ho Igreja Katólika

Iha loron hirak liubá, Ramos-Horta hola inisiativa bá hasoru ona Prezidente Repúblika ne’ebé hanesan nia rivál boot iha eleisaun prezidensiál nian, Francisco Guterres “Lú Olo”, hodi ko’alia bá malu kona-bá situasaun sira Timor nian no buka solusaun bá krize ekonomia mundiál ne’ebé afeta mós mai Timor-Leste.

Mezmu Lú Olo ho Ramos-Horta ko’alia barak liu kona-bá preparasaun sira bá festa restaurasaun independénsia bá dala-20 (20 Maiu 2002-2022) no tomada de posse bá Prezidente Repúblika Eleitu, maibé sira mós foku ko’alia oinsá mak lider nasionál sira bele tuur hamutuk halo diálogu solusiona problema ne’ebé nasaun no povu enfrenta ohin loron.

Iha Kinta (28/04/2022), Laureadu Nobel bá Pás nian, José Ramos-Horta, hakat to’o iha Gabinete eis titular Mari Alkatiri nian iha Faról, Díli, hodi ko’alia oras ida kona-bá investidura Prezidensiál iha loron 19 fulan-Maiu, selebrasaun tinan 20 aniversáriu restaurasaun independénsia.

Sita husi  pájina Facebook  José Ramos-Horta  relata katak iha sorumutuk entre nia ho Mari Alkatiri ko’alia mós kona ba krize ekonómika mundiál ne’ebé iha impaktu maka’as iha TL nia ekonomia no oinsá Líder Nasional sira atu fera-ulun, halo estratéjia ida urjente para hamenus povu mukit nia terus.

“Tuir ha’u nia knar nu’udár Prezidente Repúblika, ha’u sei serbisu maka’as para hametin dame, demokrasia liu hosi diálogu ho lider hotu-hotu no mós sosiedade sivíl e Igreja,” Ramos-Horta hateten.

“Ikus liu, ha’u husu Dr. Mari Alkatiri apoiu Deklarasaun Fraternidade Humana ne’ebé Amu Papa Francisco no Grand Iman Muhammad Al-Tayyeb hosi Cairo maka autór no asina. Atan ha’u nia rekomendasaun bá Governu no Parlamentu Timor-Leste aprova rezolusaun ke aprova Deklarasaun Fraternidade Humana tama kurríkulu eskolár. TL sei sai primeiru Nasaun iha Mundu ke simu Deklarasaun ne’e iha kurríkulu eskolár. Maun Mari simu dokumentu ho reasaun pozitivu,” Ramos-Horta haktuir iha nia konta Facebook.

Ramos-Horta kompromete katak diálogu sei kontinua ho partidu polítiku  hotu-hotu  iha Parlamentu no sira  ne’ebé seidauk iha fatin iha Parlamentu.

Lee Mós : Lú Olo Kongratula Ramos-Horta, Espera Sei Koopera ho Órgaun Soberania Tolu

Jornalista: Vito Salvadór