Hatutan.com (29 Abríl 2022) Díli—Parlamentu Nasionál (PN) aprova ona Pedidu Prioridade no Urjénsia Orsamentu Jerál Estadu Retifikativu 2022 ho montante Billaun $1.129, ho votus a favór 37, kontra 20 no abstensaun 3.

Aprovasaun ne’e iha sesaun Plenária Parlamentu Nasionál ba Debate Apresiasaun ba karáter Prioridade no Urjénsia Orsamentu Retifikativu ne’e, iha Sesta (29/04/2022).

Lee Mós:Governu Aprezenta Orsamentu Ratifikativu Billaun $1.129 ba PN

Orsamentu Retifikativu ne’e ho montante loloos maka $1.129.857.250, siginifika reseitas konsolidada Setór Públiku Administrativu sa’e ba $3.234.522.481, enkuantu Despezas Konsolidada Setór Públiku Administrativu sa’e ba $3.233.908.681.

Reseitas hosi Órgaun Servisu Administrasaun Sentrál sa’e ba $2.987.140.197, Despezas Órgaun Servisus Administrasaun Sentrál sa’e ba $2.987.140.197, ne’ebé fahe tuir kategoria klasifikasaun ekonómiku hanesan tuir-mai ne’e:

1. Transferénsia Públika ho montante $1.837.634.189;
2. Bens no Servisus ho montante $466.877.382;
3. Kapitál Dezenvolvimentu $390.177.399;
4. Saláriu no Vensimentu $250.537.130;
5. Kapitál Menór $41.914.097.

Orsamentu Retifikativu refere Governu uza Finansia Medida  prioridade 13 hanesan:

1. Kriasaun Fundu Veteranu ho orsamentu alokadu billiaun $1;
2. Atribuisaun Pagamentu Désimu Terseiru $200 ba kada família exeptu funsionáriu públiku sira ho orsamentu alokadu millaun $70;
3. Uma Kbiit Laek Plus ho orsamentu alokadu millaun $25;
4. Bolsa Estudu ba Mellór Graduadu Estudante Ensinu Báziku no Sekundáriu ho orsamentu alokadu millaun $7,5;
5. Programa Mão de Obra ba Postu Administrativu, millaun $7,2;
6. Revitaliza kafé no subsídiu ba kafé Laku-teen ho orsamentu alokadu millaun $6,4;
7. Pagamentu ba diferensa remunerasaun PNTL nian ho rejime salariál foun, ba membru PNTL 4.096 ho orsamentu alokadu millaun $5,1;
8. Harii Sede Arte Marsiál no Rituál millaun $2,5;
9. Programa Eskola iha Uma ho orsamentu alokadu millaun $2,1;
10. Internet gratuita iha eskola sira, millaun $1,1;
11. Subsídiu akomodasaun ba PNTL no F-FDTL ho orsamentu alokadu millaun $1,9; xii)
12. Estabelesimentu Sekretaria ba Asuntu Traballadór Esteriór no Komunidade Timoroan iha Diáspora $500 mil;
13. Empregu ba mellór alunu universitáriu sira $437,5 mil, ne’ebé mak aprova iha Reuniaun Extraordináriu Konsellu Ministru loron 26 fulan Abril 2022, depois halo alterasaun dahuluk ba Lei númeru 01/2022 loron 03 fulan Janeiru Lei Orsamentu Jerál Estadu.

Sesaun Plenária ne’e prezide hosi Prezidente Parlamentu Nasionál, Aniceto Longuinhos Guterres Lopes, akompaña hosi membru-sira hosi Meza Parlamentu Nasionál.

Partisipa iha debate apresiasaun no aprovasaun ne’e Ministru Finansas, Rui Gomes no Vise-Ministru António Freitas, Diretór Jerál, Diretór Gabinete, Diretór Nasionál hosi Ministériu Finansas.

Jornalista: Rogério Pereira Cárceres