Connect with us
Pakote Ahi

Nasionál

May Day, Traballadór Sira Husu Governu Hasa’e Saláriu Mínimu Bá $200

Published

on

Hatutan.com, (01 Maiu 2022), Díli-Selebrasaun loron mundiál traballadór ka may day, 01 fulan-Maiu 2022, sai momentu ida importante tebes. Liuhusi komemorasaun ida-ne’e, traballadór sira ne’ebé organiza husi Konfederasaun Sindikatu Timor-Leste (KSTL) husu  Governu atu hasa’e saláriu mínimu traballadór sira nian husi $115/fulan bá $200/fulan.

Traballadór sira halo marxa hodi komemora loron mundiál traballadór ka may day, 01 fulan-Maiu 2022. Foto/Hatutan.com

Prezidente KSTL, Almério J. Vilanova hateten, iha Timor-Leste presiza timoroan sira atu bele selebra nafatin may day ne’e hodi nune’e bele refleta nafatin bá espíritu luta traballadór sira nian iha tempu uluk liubá, ne’ebé hato’o mós ezijénsia katak, atu halo redusaun bá oras servisu nian hosi oras 18 tun bá oras ualu (8).

“Ita Timor-Leste, ita halo ida ne’e, no ita kontinua nafatin atu fó hanoin ba Governu, ezije bá Governu, kona-bá preokupasaun traballadór sira hotu-hotu ne’ebé maka enfrenta to’o ohin loron, hanesan saláriu mínimu, ne’ebé maka nunka sa’e bá $200,” Almério Vilanova, hateten ba jornalista sira, hafoin atividade la’o ain iha Palásiu Governu nia oin, Domingu (01/05/2022).

La’ós ne’e de’it, KSTL mós preokupa kona-bá empregu bá juventude sira, no bá ema hotu, kona-bá kondisaun servisu fatin sira ne’ebé mak to’o ohin loron la’o seidauk di’ak, no mós lei ba traballu doméstika, lei kódigu laborál, no lei ba saláriu mínimu ninian, iha ne’ebé importante tebes atu Governu bele aselera, hodi kria kondisaun ne’ebé di’ak ba traballadór sira hotu, iha setór privadu no públika no setór informál.

Advertisement

Prezidente KSTL kompromete katak, hafoin asaun ida-ne’e, sira sei submete karta petisaun, nu’udár ezijénsia ida hodi hato’o bá iha  Parlamentu Nasionál bá iha Governu, no mós instituisaun relevante sira, atu bele konsidera preokupasaun sira ne’ebé mak durante ne’e, traballadór sira enfrenta.

“Ita triste tebes, tanba saláriu mínimu iha 10 nia laran, laiha mudansa. Iha nasaun hotu-hotu, saláriu mínimu ne’e, bele halo revizaun kada tinan, kada tinan rua, dala-ida. Maibé iha Timor-Leste, ida ne’e la akontese,” nia dehan.

Iha loron hirak liubá, KSTL rona informasaun katak, Governu sei halo revizaun bá saláriu mínimu iha tinan oin 2023. Tanba ne’e maka, KSTL hakarak aproveita nafatin ho tempu id- ne’e, hakarak ezije nafatin bá Governu atu realiza saláriu mínimu iha tinan 2022 ida ne’e, la’ós 2023.

“Ida ne’e kleur loos ona. Saláriu mínimu ne’e pendente tinan rua ka tolu, maibé tinan 10. Sé tinan oin, tinan 11 ona. Tanba ne’e maka, tinan ida ne’e mak momentu ida ne’ebé di’ak ba estadu atu revee fila-fali ita nia saláriu mínimu ne’e. Proposta ne’ebé mak hatama ona liuhosi konsellu nasionál do traballu, governu tenke konsidera ida ne’e,” Almério Vilanova hateten tán.

KSTL husu ba Governu atu revee no hatuur saláriu ida ne’ebé dignu bá saláriu ida ne’ebé mak bele kondís ho situasaun moris iha tempu ida agora, tanba inflasaun sa’e maka’as.

Advertisement

Rejista Kazu 212 Violasaun Hasoru Direitu Traballadór

Traballadór sira komemora loron mundiál traballadór nian, 01 fulan-Maiu 2022. Foto/Hatutan.com

Prezidente KSTL, Almério Vilanova hatutan, durante tinan 2021 sira rejista kazu sira kona-bá violasaun hasoru direitu traballadór sira nian hamutuk 212. Kazu sira ne’e mai hosi setór públiku, privadu, no informál.

“Iha fulan-Janeiru to’o fulan-Marsu 2022, iha kazu 36. Kazu sira, barak liu mak kazu hapara servisu, depois problema kona-bá saláriu no seguransa sosiál maka sai nafatin problema iha tinan rua bá kotuk, iha empregadór balu mak tahan fali sira nia osan. Situasaun ida ne’e mak durante ne’e KSTL luta bá,” Almério afirma.

Forsa traballu ne’ebé oras ne’e KSTL rejista hamutuk rihun 300 resin, iha territóriu nasionál.

Liafuan protestu ne’ebé traballadór sira hakerek iha espanduk sira mak, kria kondisaun servisu ne’ebé justu ba traballadór doméstika. Ema ho defisiénsia iha direitu no devér atu servisu no hili profisaun ne’ebé nia hakarak. Fó intensivu emprezariál bá ema ho defisiénsia. Oportunidade bá ema ho defisiénsia nu’udár traballadór Sazonal. Asesibilidade bá ema ho defisiénsia iha servisu fatin.

Observasaun Hatutan.com iha terrenu nota, durante atividade marxa ne’e, hetan seguransa másimu hosi membru Polisia Nasional Timor-Leste (PNTL) liuhosi Unidade Polísia Tránzitu Nasionál.

Advertisement

Jornalista: Rogério Pereira Cárceres

Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Nasionál

Rede Bá Rai Konsidera Projetu Sistema Nasionál Kadastru Gasta Millaun $57 Laiha Rezultadu

Published

on

Hatuta.com, (12 Juñu 2024), Díli –ONG Rede ba Rai konsidera projetu  Sistema Nasionál Kadastru (SNC, sigla portugés) ne’ebé ezekuta husi  kompañia Timor-Leste GMN Holding ho kompañia Portugal ARM-Apprize ho kustu millaun $57  iha tinan 2014 to’o ohin loron la hatudu rezultadu no parsiál barak mak la publika iha mapa to’o agora.

(more…)

Kontinua Le'e

Nasionál

Horta ho Winston Piters Deskute Unidade ASEAN no Kestaun Myanmar

Published

on

Hatutan.com (12 Juñu 2024), Díli- Prezidente Repúblika (PR), José Ramos-Horta ho Vise-Primeiru-Ministru Nova Zelándia Winston Piters diskute unidade nasaun sira iha Association of Southeast Asian Nations (ASEAN) no kestaun  Myanmar.

(more…)

Kontinua Le'e

Nasionál

Sidadaun Estranjeiru Besik 1100 Sei Partisipa Vizita Papa Francisco iha Timor-Leste

Published

on

Hatutan.com, (12 Juñu 2024), Díli-Diretóra Jerál Servisu Migrasaun (SM), Adelaide da Rosa informa, posibilidade sidadaun estranjeiru hamutuk 1100 sei partisipa misa ne’ebé prezide husi Papa Francisco iha Tasi-Tolu,  Díli, Timor-Leste.

(more…)

Kontinua Le'e
Advertisement

Trending