Hatutan.com, (02 Maiu 2022), Díli-Prezidente Repúblika, Francisco Guterres “Lú Olo” husu atu ho selebrasaun loron vitória (Idul Fitri) família uma laran hakle’an nafatin sira-nia domin no respeitu bá malu. Tanba ne’e, importante tebes bá Timor-Leste valoriza loron Idul Fitri.
Lee Mós : Komunidade Musulmanu Hahú Tempu Hadera-An
Musulmanu sira iha mundu no iha Timor, Segunda (02/05/2022), selbra loron Idul Fitri 1443 Hijriah. Foto/Hatutan.com
Liuhusi mensajen Prezidente Repúblika nian ne’ebé haktuir husi Diretur Jerál Gabinete Prezidénsia Repúblika, Domingos Amaral iha Meskita An-Nur, Dili, Segunda (02/05/2022), iha ámbitu selebrasaun loron Idul Fitri 1443 Hijriah, Prezidente Repúblika, saúda kompatriota musulmanu sira hotu iha Timor-Leste no iha rai-li’ur ne’ebé selebra Idul Fitri hamutuk, hafoin tuir faze Ramadhan ho ritual jejún durante fulan ida.
“Ha’u aproveita loron espesiál, ohin, atu husu dala ida tan bá sidadaun ida-idak, atu fó liman bá malu, nu’udár timoroan, no tanen hamutuk prinsípiu no valór sira ne’ebé hametin ita nu’udár povu ida de’it, moris iha uma lisan boot ida de’it: Timor-Leste!,” PR Lú Olo hateten.
Maluk musulmanu sira selebra loron ohin ho laran moos tanba fase ona sala, perdua-malu ona, halo ona rekonsiliasaun nu’udár família no nu’udár komunidade.
Iha loron 19 fulan-Maiu tuir mai, Prezidente Repúblika Francisco Guterres “Lú Olo” sei ramata nia mandatu nu’udár Prezidente Repúblika, maibé sei la hakotu nia misaun nu’udár servidór nasaun no Povu Timor-Leste. Hamutuk nafatin ho kompatriota ida-idak, tuir kbiit no matenek ida-idak nian, hotu-hotu sei fó liman bá malu hodi hametin Estadu Direitu Demokrátiku, kuda pás no estabilidade, dezenvolvimentu mai rai doben no hasa’e moris-di’ak ba povu tomak.
“Hako’ak boot espesiál bá komunidade musulmana iha Timor-Leste no mós iha Indonézia no rai sira seluk,” Prezidente Repúblika, Francisco Guterres “Lú Olo” hateten.
Jornalista: Vito Salvador