Hatutan.com, (02 Maiu 2022), Díli- Governu liu husi Gabinete Apoiu Sosiedade Sivíl (GASC, sigla Portugés) kada tinan fó apoiu ba Igreja Musulmanu iha Timor Leste ho montante $500,000.00 hodi hala’o atividade relijiaun nian atu benefisia komunidade musulmanu iha Timor-Leste.

Lee Mós: Mensajen PR Lú Olo iha Loron Idul Fitri, Hakle’an Domin no Respeita Malu

Koordenadór GASC, Felipe da Costa. Foto/Hatutan.com

Koordenadór GASC, Felipe da Costa, esklarese katak tanba saida mak Governu presiza hanoin tau ketak fundus bá relijiaun ida-idak, tanba Timor-Leste ema hotu nian, ema hotu tenke hetan benefísiu husi apoiu Governu nian.

“Ida ne’e mak sai hanesan vontade Governu Timor Leste nian atu fó apoiu bá komunidade musulmanu,”  Felipe da Costa haktuir bá jornalista sira iha Meskita An-Nur, Díli, segunda (02/05/2022), bainhira partisipa iha selebrasaun loron Idul Fitri 1443 Hijriah.

Advertisement

“Ita kada tinan $500 míl ba kada relijiaun, mós apoiu ba relijiaun protestante ho musulmanu mós montante hanesan $500 míl. Ita espera katak tinan 2022 sira hetan tan, maibé tinan kotuk sira hetan $500 míl, bazeia ba proposta ne’ebé sira hatama ami haree katak sira halo atividade barak,”  nia hateten.

Koordenadór GASC hatutan, Governu fó mós fasilidade bá joven sira, fatin bá orfanatu sira, fatin estuda no hela fatin, maibé sira mós halo serimónia sira hanesan sentru juventude sira, nune’e mós atividade edukasaun ninian mak halo hanesan kompetisaun entre estudante musulmanu sira.

Parte Governu haree katak liu husi apoiu sira ne’ebé iha, komunidade musulmanu Timor-Leste organiza atividade kapás tebes, Governu kontente ho apoiu hanesan ne’e no espera katak ho apoiu sira-ne’e bele hasa’e liután kualidade timoroan sira ne’ebé ho relijiaun musulmanu.

Koordenadór GASC, Felipe da Costa partisipa iha selebrasaun loron Idul Fitri 1443 Hijriah, 02 Maiu 2022. Foto/Hatutan.com

Hafoin simu apoiu husi Governu, igreja musulmanu Timor-Leste halo relatóriu regulár, relatóriu kada fulan nian mós iha, relatóriu trimestrál nian mós iha, relatóriu ne’ebé Governu simu hatudu katak fundu ne’e implementa ho di’ak tanba ne’e mak hanesan instituisaun ne’ebé jere fundus ida-ne’e kontente servisu hamutuk ho komunidade musulmanu sira.

Aproveita oportunidade ne’e lori Primeiru-Ministru nia naran hato’o parabéns ba komunidade musulmanu Timor-Leste ne’ebé selebra loron boot Idul Fitri.

Nia dehan, Xefe Governu labele partisipa tanba iha fali atividade seluk ne’ebé monu iha oras ne’ebé hanesan.

Advertisement

“Primeiru Ministru hakarak hato’o ninia hakuak boot, fó mós boas festa Felís Idul Fitri nian bá família musulmanu Timor-Leste tomak,” Felipe da Costa haktuir.

Jornalista: Vito Salvador